بۇعاتتاۋ جۇيەسى ەنگىزىلگەلى بەرى الماتىدا ۇيالى تەلەفوندار ۇرلىعى ازايدى

الماتى. قازاقپارات - بۇعاتتاۋ جۇيەسى ەنگىزىلگەلى بەرى ۇيالى تەلەفونداردى ۇرلاۋ ارەكەتتەرى ازايدى، - دەپ حابارلايدى بۇگىن الماتى قالالىق ءى ءى د- نىڭ باسپا ءسوز قىزمەتىنەن.

ەستەرىڭىزگە سالا كەتەلىك، الماتى پوليتسەيلەرى سوتقا دەيىنگى تەرگەۋ اياسىندا وتكەن جىلدىڭ جەلتوقسان ايىنان باستاپ، ۇرلانعان ۇيالى تەلەفوندار مەن باسقا دا موبيلدى قۇرىلعىلاردى IMEI كودتارى بويىنشا بۇعاتتاۋعا كىرىسكەن بولاتىن. بۇل شاراعا ۇيالى وپەراتورلار قولداۋ كورسەتىپ جاتىر.

«سودان بەرى قالالىق ءى ءى د بولىمشەلەرى مەن قىزمەتتەرى جانە اۋداندىق ءى ءى ب تاراپىنان ۇيالى بايلانىس وپەراتورلارىنا موبيلدى قۇرىلعىلاردى بۇعاتتاۋ بويىنشا 700 دەن استام ارىز جىبەرىلدى. بۇل ءىس- شارا تەلەفون يەسىنىڭ جازباشا كەلىسىمى نەگىزىندە جۇزەگە اسىرىلىپ جاتىر. سونداي-اق، تاعى ءبىر ايتا كەتەتىن ءجايت، وسى شارانىڭ ارقاسىندا ۇرلانعان ۇيالى تەلەفوندار جانە باسقا دا موبيلدى قۇرىلعىلار ماتەريالدىق قۇندىلىعىنان ايرىلادى. ءبىز بۇعان دەيىن بولجام بويىنشا العاشقى كەزەڭدە ۇيالى تەلەفونداردىڭ ۇرلانۋىن 25 پايىزعا تومەندەتۋگە بولادى دەگەن بولاتىنبىز. بۇل كورسەتكىشكە قاڭتار ايىنىڭ العاشقى ونكۇندىگىندە-اق قول جەتكىزىلدى. ال قازىر بۇل كورسەتكىش - 32 پايىزدى قۇرايدى»، - دەدى ءوز سوزىندە الماتى قالالىق ءى ءى د كريمينالدى پوليتسيا باسقارماسىنىڭ باسشىسى، پوليتسيا پودپولكوۆنيگى جانبولات زيادين.

سونداي-اق، پوليتسيا بولىمىندەگىلەر قىلمىستىڭ بۇل ءتۇرىن ازايتۋ ماقساتىندا جاڭا تەحنولوگيالاردىڭ قولدانىلىپ جاتقاندىعىن جەتكىزدى. جالپى - IMEI كود بويىنشا ۇيالى بايلانىس قىزمەتىن ۋاقىتشا توقتاتۋ - وتە ۇتىمدى شارا. تۇركيا، اۋستراليا، فرانسيا، گەرمانيا، ۋكراينا جانە ەۋروپانىڭ باسقا دا ەلدەرىندە بۇل شارا كەڭىنەن قولدانىلادى.

«بۇل جوبانى باستاماس بۇرىن الماتى ق. ءى ءى د ۇيالى وپەراتورلارمەن ىنتىماقتاستىق جونىندە مەموراندۋمعا قول قويىلدى. سول مەموراندۋم اياسىندا بىرلەسە ارەكەت جاساۋدىڭ ءتيىمدى ءادىسى قولدانىلدى. قالالىق پروكۋراتۋرامەن بىرلەسە وتىرىپ، وسى باعىتتا جۇمىس ىستەۋدىڭ ءبىرىڭعاي الگوريتمى ازىرلەندى. مىسالى، موبيلدى قۇرىلعىسى ۇرلانعان ازاماتتى جابىرلەنۋشى دەپ مويىنداۋ تۋرالى قاۋلى شىققان سوڭ، ىشكى ىستەر ورگاندارى تەلەفون يەسىنە ۇيالى بايلانىس وپەراتورلارىنىڭ اتىنا IMEI كود بويىنشا ابونەنتتىك قۇرىلعىنىڭ جۇمىسىن ۋاقىتشا توقتاتۋ، ياعني بۇعاتتاۋ تۋرالى ارىز جازۋ كەرەكتىگىن جانە ونىڭ مۇمكىن بولار سالدارىن تۇسىندىرەدى. ءاربىر ارىزعا تەرگەۋشىدەن ىلەسپە حات تىركەلەدى. ول ۇيالى تەلەفوننىڭ ۇرلانعانىن جانە وعان جابىرلەنۋشىنىڭ مەنشىك قۇقىعىنىڭ بەكىتىلگەندىگىن راستايدى.

ال ۇيالى بايلانىس كومپانيالارى ءوز كەزەگىندە موبيلدى قۇرىلعىنى بۇعاتتاۋ تۋرالى ارىز قابىلدانعان سوڭ، ناقتى سەبەپتەرىن كورسەتە وتىرىپ، ىشكى ىستەر ورگاندارىنا ۇيالى تەلەفوننىڭ بۇعاتتالعان نەمەسە بۇعاتتالماعانى جونىندە حابارلاما جىبەرەدى»، - دەدى ج. زيادين.

اۆتور: جاپپاربەرگەن ايبوتا