يراندىق ينۆەستورلار وڭتۇستىك قازاقسستانعا ەت كومبيناتىن سالماق

شىمكەنت. قازاقپارات - بۇگىن و ق و اكىمدىگىندە ءوڭىر باسشىسى بەيبىت اتامقۇلوۆ يران يسلام رەسپۋبليكاسىنان كەلگەن ينۆەستورلارمەن كەزدەستى.

كەزدەسۋدە تاراپتار بايدىبەك اۋدانىندا جىلدىق قۋاتتىلىعى 5 مىڭ توننانى قۇرايتىن ءىرى قاراعا ارنالعان مال سويۋ سەحىنىڭ قۇرىلىسىن سالۋ ماسەلەسىن تالقىلادى، دەپ حابارلايدى و ق و اكىمىنىڭ باسپا ءسوز قىزمەتى.

ەت كومبيناتى بولاشاقتا ەتتى مۇزداتىپ، اۋاسىز قالتاشادا شىعاراتىن بولادى. جالپى قۇنى 6300000 مىڭ تەڭگەنى قۇرايتىن جوبانى ازىرلەۋ مەن جۇزەگە اسىرۋ جۇمىستارى 2016-جىلدىڭ قاڭتار-قىركۇيەك ايىنا جوسپارلانعان.

ايتا كەتەيىك، قۇنى 573866 مىڭ بولاتىن قۇرىلعىلاردى ينۆەستورلار وتاندىق كومپانيادان ساتىپ الماق. نىساننىڭ قۇرىلىسى بىتكەن سوڭ مۇندا 196 جۇمىس ورنى اشىلادى دەپ كۇتىلۋدە. شىعارىلعان ونىمدەر قازاقستاننىڭ ىشكى نارىعىندا ساۋدالانىپ، يران مەن بىرىككەن اراب امىرلىگىنە ەكسپورتتالاتىن بولادى. سونىمەن قاتار، تاراپتار، جيىن بارىسىندا اۋىل شارۋاشىلىعى سالاسىندا ءوزارا ىنتىماقتاستىققا ۋاعدالاستى.