قازاقستاندا جاڭا ءانشى قىزدار توبى قۇرىلدى - فوتو
وتكەن جىلى ساۋىردە «وردا» توبىنىڭ مۇشەسى داستان ورازبەكوۆ قىزداردان قۇرالاتىن توپقا كاستينگ جاريالاعان بولاتىن.
ءانشى قازاقستاندىق ەسترادادا ەرەكشەلەنىپ تۇراتىن توپ قۇرماق نيەتتە بولعان. كاستينگكە قاتىسقان 500 گە جۋىق قىزدىڭ ىشىنەن داليدا، انەلي جانە جانار ەسىمدى قىزدار تاڭداپ الىنىپ، توپقا «Turkiss» دەگەن اتاۋ بەرىلدى.
ءانشى قىزداردى ەستراداعا دايىنداۋعا 10 اي كەتكەن.
داستان ورازبەكوۆتىڭ ايتۋىنا قاراعاندا، توپتىڭ اۋەنى باسقالاردان وزگەشە، ەشقايسىنا ۇقسامايدى. جوبا قازاقستاندا عانا ەمەس، ازەربايجاندا دا ونەر كورسەتەدى. توپتىڭ ازەربايجاندىق پروديۋسەرى - يسا مەليكوۆ ءبىر كەزدەرى قاراپايىم انشىلەر ەلدار گاسىموۆ پەن نيگيار دجامالدى «ەۆروۆيدەنيە» جەڭىمپازى دەڭگەيىنە دەيىن جەتكىزگەن پروديۋسەر.
«Turkiss» توبىنىڭ مۇشەلەرى كىشكەنتايىنان بيمەن اينالىسقان، ءان سالعان. داستان ورازبەكوۆكە بۇل سالا ازىرگە تاڭسىق، سەبەبى ءانشى بۇعان دەيىن تەك جىگىتتەردەن قۇرالعان توپتارمەن جۇمىس ىستەپ كەلگەنى ءمالىم.
«مەن ءۇشىن قىزدارمەن جۇمىس ىستەۋ ومىرىمدەگى ەڭ قيىن كەزەڭ بولاتىن شىعار. ولاردىڭ كوزىنەن قورقىنىشتى نەمەسە ىستەي الار ما ەكەنبىز دەگەن كۇماندى كورگەندە، ءوزىم دە قاتتى قينالامىن»، - دەيدى پروديۋسەر.
بۇگىندە «Turkiss» توبى ءان جازىپ قانا قويماي، وعان بەينەبايان ءتۇسىرىپ ۇلگەرگەن. بەينەباياننىڭ ءتۇسىرىلىمى كيەۆتە ءوتتى - قازىر مونتاج جۇمىستارى جۇرگىزىلىپ جاتىر، كوپ ۇزاماي توپتىڭ تۇڭعىش تۋىندىسىن كورۋگە مۇمكىندىك تۋادى.
