قازاقستان ەكونوميكاسىنىڭ قۇرىلىمدىق جاڭعىرۋى ءتورت نەگىزگى سالاعا نەگىزدەلەدى - «نۇر وتان» حاتشىسى

استانا. قازاقپارات - ەل ەكونوميكاسىنىڭ قۇرىلىمدىق جاڭعىرۋى ءتورت نەگىزگى سالاعا نەگىزدەلەدى.

بۇل تۋرالى بۇگىن «نۇر وتان» پارتياسىندا وتكەن «نۇر وتان» پارتياسىنىڭ XVII سەزىندە پرەزيدەنت ن. نازاربايەۆ العا قويعان قازاقستاندى دامىتۋ ماسەلەلەرى» اتتى دوڭگەلەك ۇستەلدە پارتيا حاتشىسى فارحاد قۋانعانوۆ ءمالىم ەتتى.

«نۇر وتان» پارتياسىنىڭ سايلاۋالدى تۇعىرناماسىندا 5 باسىم باعىت اتالدى. ءبىرىنشىسى، داعدارىسقا قارسى تۇراقتاندىرۋ. بىلتىر ءبىزدىڭ ەلدە داعدارىسقا قارسى جوسپار جاسالدى. وندا نەگىزىنەن ىسكەرلىك بەلسەندىلىكتى ارتتىرۋعا، حالىقتى جۇمىسپەن قامتۋعا ماڭىز بەرىلگەن. ەلباسى، سونىمەن قاتار، الەۋمەتتىك ماڭىزدى تاۋارلارعا باعانىڭ قاساقانا وسۋىنە جول بەرمەۋدى تاپسىردى. وسى تۇرعىدا ءبىزدىڭ ەلدە وتاندىق تاۋارلاردىڭ ۇلەسىن ارتتىرۋ بويىنشا ءبىرقاتار تاپسىرمالار بەرىلدى. مەملەكەت باسشىسىنىڭ ءسوزى بويىنشا، مەملەكەتتىك شىعىستار قاتاڭ ۇنەمدەۋگە كوشىرىلەدى. ەكونوميكالىق ءوسىمنىڭ جاڭا رەسۋرسى رەتىندە ايماقارالىق ىقپالداستىقتىڭ دامىتىلۋى ەرەكشە اتاپ كورسەتىلدى»، - دەدى ول.

ونىڭ سوزىنشە، ەكىنشى باعىت بويىنشا، ەل ەكونوميكاسىنىڭ قۇرىلىمدىق جاڭعىرتۋ قولعا الىنادى.

«قۇرىلىمدىق وزگەرىستەردىڭ تۇعىرى - ءتورت بازالىق سالاعا نەگىزدەلمەك. ولار: ءتۇستى مەتالل، مۇناي-گاز ءوندىرىسى، ەلەكتر ەنەرگەتيكالىق كەشەن، سونداي-اق اگرارلىق سەكتور. ءۇشىنشى باعىت - قازاقستاندىقتاردىڭ ءومىرىنىڭ جاڭا ساپا ستاندارتتارىن ەنگىزۋ. دەنساۋلىق ساقتاۋ سالاسىندا كەپىلدەندىرىلگەن تەگىن مەديتسينالىق كومەك كورسەتۋدە جەكە مەنشىك سەكتوردىڭ ۇلەسى ارتتىرىلادى. الەۋمەتتىك نىسانداردى سالۋدا مەملەكەتتىك-جەكەمەنشىك سەرىكتەستىك قۇرالدارى كەڭىنەن قولدانىلادى. مىندەتتى مەديتسينالىق ساقتاندىرۋ جۇيەسى ەنەدى. پارتيا كوشباسشىسى از قامتىلعان حالىق ساناتىنا جانە مۇمكىندىگى شەكتەۋلى جاندارعا الەۋمەتتىك كومەكتى ۇلعايتۋدى ماڭىزدى تاقىرىپتاردىڭ ءبىرى رەتىندە كوتەردى»، - دەپ اتاپ ءوتتى ف. قۋانعانوۆ.

«ءتورتىنشى باعىت رەتىندە ەلباسىمەن كونستيتۋتسيالىق پاتريوتتىقتى دامىتۋ ماسەلەسى كوتەرىلىپ وتىر. ن. نازاربايەۆتىڭ اتاپ كورسەتكەنىندەي، كونستيتۋتسيالىق پاتريوتتىقتىڭ نەگىزگى پرينتسيپتەرى - قۇقىقتىق ءتارتىپ، جالپى زاڭعا باعىنۋشىلىق. بەسىنشى باعىتتا ايماقتىق تۇراقتىلىقتى ساقتاۋ تاپسىرىلدى. رەسەي، قىتاي، ا ق ش، ەۋروپالىق وداق، ت م د جانە ورتالىق ازيا بويىنشا كورشىلەرىمىزبەن ستاتەگيالىق سەرىكتەستىگىمىز ارى قاراي قارقىنداتىلا بەرمەك»، - دەپ ءتۇيدى ءسوزىن پارتيا حاتشىسى.

ەسكە سالا كەتەيىك، 29- قاڭتاردا ەلباسى ن. نازاربايەۆتىڭ قاتىسۋىمەن «نۇر وتان» پارتياسىنىڭ XVII سەزى وتكەن بولاتىن.

اۆتور: جاسۇلان جولدىبايەۆ