قازاقستان اۋماعى ارقىلى قىتاي - يران باعدارىنداعى تۇڭعىش كونتەينەرلىك پويىز جىبەرىلدى

 استانا. قازاقپارات - يۆۋ قالاسىندا (شىعىس قىتاي ) قازاقستان اۋماعى ارقىلى يرانعا ترانزيتتىك كونتەينەرلىك پويىزىن جونەلتۋ ءراسىمى ءوتتى، دەپ حابارلايدى «ق ت ج» ۇ ك» ا ق باسپا ءسوز قىزمەتى.

سالتاناتتى شاراعا يۆۋ قالاسىنىڭ مەرى شەن تسزيۋ پين مەن قىتاي تەمىر جول اكىمشىلىگىنىڭ باسشىلارى، «قازاقستان تەمىر جولى» ۇ ك» ا ق Translnvest Group حالىقارالىق لوگيستيكالىق حولدينگىنىڭ وكىلدەرى قاتىستى.

 جاڭا كونتەينەرلىك باعدار قىتاي، قازاقستان، تۇركىمەنستان، يران تەمىر جول اكىمشىلىكتەرىنىڭ بىرلەسكەن ۇيىمداستىرۋ شارالارىنىڭ ناتيجەسىندە جۇزەگە اسىرىلدى. بۇل جوبا شىعىس قىتايدان پارسى شىعاناعى ەلدەرىنە جۇكتەردى جەدەل جەتكىزۋگە ارنالعان العاشقى لوگيستيكالىق شەشىم بولىپ تابىلادى.

پويىز باعدارى قىتاي تەمىر جولى، الاشانكاۋ- دوستىق شەكارالىق بەكەتى، قازاقستاننىڭ جاڭا تەمىر جول جەلىسى (جەزقازعان- بەينەۋ، وزەن- بولاشاق) ، ءارى قاراي تۇركىمەنستان جەلىسىمەن يراننىڭ تەگەران قالاسىنا بارادى.

پويىز قۇرامى ارالاس جۇكتەر تيەلگەن 40 فۋتتىق كونتەينەرلەردەن تۇرادى. باعداردىڭ جالپى ۇزىندىعى 9 مىڭ شاقىرىمنان استام. قۇرعاقتاعى تەمىر جولمەن 10 تاۋلىكتە ءجۇرىپ وتسە، ول ارالىقتى تەڭىز ارقىلى 25-30 كۇن جۇرەدى.

قازاقستاننىڭ جاڭا كولىكتىك- لوگيستيكالىق ينفراقۇرىلىمى باعداردى بارىنشا قىسقارتىپ، جۇكتى جەتكىزۋ مەرزىمىن جەدەلدەتىپ، ەۋرازيالىق قۇرلىقتاعى ايماقتىق ساۋدانىڭ سەرپىندى دامۋىنا ىقپال ەتەدى.

كونتەينەرلىك تاسىمالدى دامىتۋ - ەلىمىزدىڭ ترانزيتتىك الەۋەتىن ەسەلەي ارتتىرىپ، باسەكەلەستىككە قابىلەتتىلىگىن دە كوتەرە تۇسەدى.