سپورتشىلارىمىز ريو- دە- جانەيرو وليمپياداسىنا قازاقستاندا جاسالعان كيىممەن قاتىسادى
بۇل تۋرالى مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ باسپا ءسوز قىزمەتى حابارلادى.
جيىندا كوميسسيانىڭ شەشىمىمەن سپورتتىق كيىمدى تىگۋگە بەرىلەتىن مەملەكەتتىك تاپسىرىستى وتاندىق كومپانيالارعا بەرۋ جونىندە شەشىم قابىلداندى. سونىمەن بىرگە وتىرىستا وتاندىق كيىم وندىرۋشىلەردىڭ ۇسىنىستارى ورتاعا سالىندى.
كوميسسيا وتىرىسىنا وليمپيادا چەمپيوندارى ەرماحان يبرايموۆ، يۋري مەلنيچەنكو، ولگا شيشيگينا، ديزاينەرلەر، مادەنيەت جانە سپورت مينيسترلىگى مەن ۇلتتىق وليمپيادا كوميتەتىنىڭ وكىلدەرى قاتىستى. كوميسسيا مۇشەلەرى كيىمنىڭ ساپاسى، تىگىس ساپاسى مەن ديزاينى تۋرالى ايتتى. ولار ەڭ باستىسى كيىمنىڭ سپورتشىلار ءۇشىن ىڭعايلى بولۋ كەرەك دەگەن توقتامعا كەلدى.
وسى جەردە ايتاتىن نارسە، بۇعان دەيىنگى سوچيدە وتكەن قىسقى وليمپيا ويىندارىنا سپورتشىلاردىڭ كيىمىن وتاندىق كومپانيا ازىرلەگەن بولاتىن. ەندى ريو- دە- جانەيرو وليمپياداسىنا دا قازاقستان دەلەگاتسياسى وتاندىق سپورتتىق كيىممەن باراتىن بولادى، دەپ جازادى «ەگەمەن قازاقستان» گازەتى.
