بۇگىن - جازۋشى ساتتار ەرۋبايەۆ دۇنيەگە كەلگەن كۇن
الدىمەن اۋىل مولداسىنان ەسكىشە ساۋات اشقان. تۇركىستان جەتىجىلدىق مەكتەبىن ءبىتىرىپ، سوندا اۋداندىق كومسومول كوميتەتىندە ءبىراز ۋاقىت قىزمەت ىستەگەن. الماتىداعى جوعارى وقۋ ورىندارىنا تۇسۋگە دايارلايتىن ارنايى كۋرستى، لەنينگرادتىڭ تاريح-فيلوسوفيا-لينگۆيستيكا ينستيتۋتىن بىتىرگەن.
1933-جىلى «ورىس نەورومانتيزمى جانە قازاقتىڭ ۇلتتىق ادەبيەتى» دەگەن تاقىرىپتا ديپلوم قورعاپ، اسپيرانتۋرادا قالدىرىلدى. ءبىراق قازاقستان ولكەلىك كومسومول كوميتەتىنىڭ ارنايى شاقىرتقان تەلەگرامماسىمەن ەلگە ورالدى. الدىمەن «لەنينسكايا سمەنا»، كەيىننەن «لەنينشىل جاس» گازەتىندە ادەبيەت ءبولىمىنىڭ مەڭگەرۋشىسى قىزمەتىن اتقاردى.
مۇنىمەن قاتار الماتىداعى جوعارى اۋىل شارۋاشىلىعى مەكتەبىنىڭ فيلوسوفيا كافەدراسىندا اسسيستەنت بولىپ، لەكسيا وقىدى. ءبىراز ۋاقىت «لەنينشىل جاس»، «قاراعاندى پرولەتارياتى» گازەتتەرىندە جاۋاپتى رەداكتوردىڭ ورىنباسارى بولدى. ءوزىنىڭ بولاشاق رومانى - «مەنىڭ قۇرداستارىمنىڭ» ماتەريالىن وسى كەزەڭدە ءدال وسى جەردەگى ومىردەن جيناقتاعان.
ول - قازاقستان جازۋشىلارى وداعىنىڭ I سەزىنە دەلەگات بولىپ قاتىسىپ، وداقتىڭ مۇشەلىگىنە العاش قابىلدانعانداردىڭ ءبىرى. 1935-جىلى الماتىعا ورالىپ، لەنينگراد ۋنيۆەرسيتەتىنىڭ اسپيرانتۋراسىنا تۇسۋگە دايىندالدى. ءبىراق مەڭدەپ كەتكەن اۋرۋى ونىڭ وقۋىنا ەركىندىك بەرمەدى.
قازاق پەداگوگيكالىق ينستيتۋتىنىڭ قازاق ادەبيەتى كافەدراسىنا دوتسەنت بوپ ورنالاسىپ، ادەبيەت تاريحى مەن تەورياسىنان ءدارىس وقىدى. وسى كەزدە «مەنىڭ قۇرداستارىمدى» جازىپ ءجۇردى. تولىق اياقتاپ ۇلگەرمەگەنمەن، «مەنىڭ قۇرداستارىم» رومانىمەن، كوركەم اڭگىمە، نوۆەللالارىمەن پروزاشى رەتىندە، سۋرەتتەمە-وچەرك، ماقالالارى ارقىلى - پۋبليتسيست، ولەڭ-جىر، باللادالارى، ەپيگرامما، پاروديالارى ارقىلى اقىن رەتىندە ول تۋعان ادەبيەتى تاريحىنان ءوز ورنىن الدى. 1937-جىلى قايتىس بولعان. 1966-جىلى «مەنىڭ قۇرداستارىم» رومانى ءۇشىن قازاقستان لەنين كومسومولى سىيلىعى بەرىلدى.
