پارلامەنتكە تاجىريبەلى ازاماتتار سايلانعانىن قالايمىن - بەكبولات تىلەۋحان
«قازىر داعدارىستى، ەكونوميكالىق قانا ەمەس، رۋحاني داعدارىستى باستان كەشىپ وتىرعان كەزدە، ءبىز - الەمدىك قاۋىمداستىقتىڭ ءبىر پۇشپاعىمىز، سوندىقتان دا دەر كەزىندە شارا قولدانباسا بولمايدى. سەزد زامانانىڭ بەتبۇرىسىنا، اۋانىنا وراي، شارا قىلۋ جانە ونى ۇتىمدى تۇردە جەدەل جاساۋ مىندەت بولعاندىقتان ءوتىپ جاتىر. ءبىراق مەن ءبىر نارسەگە سەنەمىن، ءبىزدىڭ ەل، حالقىمىز الماعايىپ كەزەڭدەردە، داعدارىس كەزەڭدەرىندە ءوزى جيناقتالىپ الادى. ءبىز - اقتابان شۇبىرىندى، القاكول سۇلامادان وتكەن حالىقپىز. قانداي دا كەزەڭ بولسا، ەرتە العان ەردىڭ ارتىنان ەرىپ كەلگەن ەلمىز، ىنتىماق ارقىلى ىرىسقا، بىرلىك ارقىلى بەرەكەگە جەتكەنبىز، اماندىق بولسا، بۇدان دا وتەمىز دەپ ويلايمىن»، - دەدى ول جيىن سوڭىندا تىلشىلەرگە بەرگەن سۇحباتىندا.
ق ر پارلامەنتى ءماجىلىسىنىڭ 4- شاقىرىلىمىندا دەپۋتات بولعان ب. تىلەۋحان مىرزا، ماجىلىستە حالىق ءسوزىن سويلەيتىن ساۋاتتى ازاماتتاردىڭ كەلگەنىن قۇپ كورەتىندىگىن جاسىرمادى.
«جالپى زاڭ شىعارۋ وڭاي شارۋا ەمەس، قوعام تىنىسىن تەرەڭ سەزىنەتىن، زاڭگەرلەر جانە تاجىريبەلى ازاماتتار سايلانعانىن قالايمىن»، - دەپ ءتۇيدى ءسوزىن ب. تىلەۋحان.
ايتا كەتەيىك، «نۇر وتان» پارتياسىنىڭ كەزەكتەن تىس سەزىندە پارتيالىق ءتىزىم بويىنشا بەلگىلى بوكسشى گەننادي گولوۆكين مەن الەم جانە وليمپيادا چەمپيوندارى سەرىك ساپيەۆ، يليا يلين ەندى. سونىمەن قاتار، ەلىمىزدىڭ تانىمال انشىلەرى قايرات نۇرتاس پەن جانار دوعالوۆا، ايمان مۇساقوجايەۆالار ءوتتى. ءبىرقاتار مينيسترلەر مەن اكىمدەر، ۇلتتىق كومپانيا باسشىلارى دا پارتيالىق تىزىمگە ەنگەن. ماسەلەن، مينيسترلەر اراسىندا ارىستان مۇحامەدي ۇلى، باقىت سۇلتانوۆ، ۇكىمەت باسشىسىنىڭ ورىنباسارى داريعا نازاربايەۆا، ق ر پرەزيدەنتى اكىمشىلىگىنىڭ باسشىسى نۇرلان نىعماتۋليندەر دە بار. وبلىس اكىمدەرى، سولاردىڭ ىشىندە بەردىبەك ساپاربايەۆ، سەرگەي كۋلاگين، اليك ايداربايەۆ، اماندىق باتالوۆ، دانيال احمەتوۆتەر ەندى.
اۆتور: جاسۇلان جولدىبايەۆ
