بۇگىن «نۇر وتان» پارتياسى بەسجىلدىق باعدارلاماسىن قابىلدادى
«الدىمىزداعى بەس جىل قازاقستاننىڭ ХХІ عاسىرداعى تاعدىر-تالايى قانداي بولاتىنىن ايقىندايدى. ءبىزدىڭ ەلىمىزدىڭ، بەرىكتىگى، ءبىزدىڭ ءبارىمىزدىڭ بەرىكتىگىمىز سىنعا تۇسەتىن بولادى. بارشامىزدى ەلدى جاڭارتۋ ورايىنداعى اۋقىمدى جۇمىستار كۇتىپ تۇر. ءبىزدىڭ مىندەتىمىز ەلدى ساقتاۋ، ەگەمەندىكتى نىعايتۋ جانە ۇلتتىڭ بولاشاققا بارار جولىن باتىل اشۋ. ءبىز جاھاندىق سىن-قاتەردەن بۇعىپ قالا المايمىز. ءبىز وسىعان قاسقايىپ قارسى تۇرۋعا ءتيىسپىز»، - دەلىنگەن باعدارلامانىڭ كىرىسپەسىندە. اتالعان قۇجات بەس ينستيتۋتسيونالدىق رەفورما شەڭبەرىندەگى «100 ناقتى قادام» ۇلت جوسپارىنىڭ نەگىزگى باعىتتارىن قامتيدى.
تۇتاستاي العاندا، باعدارلاما 8 بولىمنەن تۇرادى. وندا جاھاندىق سىن-قاتەرلەر جانە جاڭا ناقتى احۋال ماسەلەلەرىنە شولۋ جاسالىپ، ناقتى ءىس-قيمىلدار قامتىلادى. ەكونوميكالىق قايتا ورلەۋدىڭ نەگىزگى باعىتتارى ايقىندالادى. جاڭا الەۋمەتتىك ساياسات بەكىتىلەدى، سونىڭ ىشىندە ءتيىمدى الەۋمەتتىك مەملەكەت، تۇرعىنداردىڭ وسال توپتارىن قولداۋ، ەڭبەكپەن قامتۋ، جاڭا تۇرعىن ءۇي ساياساتى، دەنساۋلىق پەن ءبىلىم بەرۋدى ۇزدىك الەۋمەتتىك ستاندارتتارعا جەتكىزۋدىڭ ناقتى جوسپارلارى كورسەتىلەدى.
بۇدان بولەك، ەكونوميكالىق قايتا ورلەۋ باعىتتارى بويىنشا جەكەشەلەندىرۋ جانە ءتيىمدى مەنشىك يەلەرىن قولداۋ، ورتا تاپ - ەلدىڭ جالپى دامۋىنىڭ رەسۋرسى، جاڭا ينۆەستيتسيالىق ساياسات، ەكونوميكالىق قاۋىپسىزدىك شارالارىنىڭ ناقتى جوسپارى ايقىندالادى.
تۇتاستاي العاندا، پارتيانىڭ سايلاۋ الدى باعدارلاماسىندا قامتىلعان ماقساتتارعا قول جەتكىزۋ جولى بۇكىل قازاقستاندىقتاردىڭ بىرلەسكەن ءىس-قيمىلىندا جاتىر. «سوندىقتان دا، پارتيامىز قازاقستاننىڭ بارلىق ازاماتتارىن بىرلىككە شاقىرادى. بۇگىنگى ءبىزدىڭ باستى ميسسيامىز - قوعامدى ەلباسى ن. نازاربايەۆتىڭ توڭىرەگىنە توپتاستىرۋ. ونىڭ ستراتەگيالىق باعىتى داعدارىستان نىعايىپ جانە باسەكەگە اناعۇرلىم قابىلەتتى ەتىپ شىعۋعا جاعداي جاسايدى»، - دەلىنگەن باعدارلامادا.
وسىعان بايلانىستى «نۇر وتان» پارتياسى بارلىق وتانشىل ازاماتتاردى ەلىمىزدىڭ يگىلىگى ءۇشىن ءوز باعدارلاماسىن قولداۋعا شاقىرادى.
اۆتور: قانات مامەتقازى ۇلى
