ق ر پرەزيدەنتى ب. ساپاربايەۆتى باسقا وبلىس اكىمدەرىنە ۇلگى ەتتى
«ساپاربايەۆ اقتوبە وبلىسىنىڭ اكىمى بولىپ تاياۋدان بەرى، بىرنەشە ايدان بەرى جۇمىس ىستەۋدە. ول ماعان بايانداپ، بىزدەر قازىرگى جاعدايدا ءاربىر وبلىس بالانستى قالاي ۇستاۋ قاجەتتىگىن تالقىلادىق. ماسەلەن، مەن ءونىم شىعارىپ، 80 پايىز قامتاماسىز ەتەمىن، تاپشىلىق - مىناداي. ال ماعان قاجەتتى ءونىم كورشى وبلىستا شىعارىلادى. بالىقتى اتىراۋدان نەمەسە بالىعى بار باسقا وڭىردەن الۋعا بولادى. ماسەلەن، اقتوبە وبلىسى كوكونىستى وڭتۇستىك قازاقستاننان الادى، ارنايى كەلىسىم جاساسقان. ايتپاقشى، ءبىز سارىعاش اۋدانىندا جەمىس- جيدەك پەن كوكونىسكە ۇلكەن تەرمينال سالاتىن بولساق، ءوزىمىزدىڭ جانە وزبەكتىڭ ءونىمىن ءبىر باعامەن ساتىپ الىپ، بۇكىل قازاقستانعا جەتكىزەر ەدىك»، - دەدى ق ر پرەزيدەنتى.
ەلباسىنىڭ اتاپ وتۋىنشە، بۇگىنگى كۇنى ماڭعىستاۋ وبلىسى استىقتى قوستاناي وبلىسىنا جەتكىزۋدى جاقسى جولعا قويعان. سونىڭ ناتيجەسىندە بۇگىندە ءوزىن عانا ەمەس سونىمەن بىرگە اتىراۋ وبلىسىن دا ۇنمەن قامتاماسىز ەتىپ وتىر.
«نەگە وسىلاي جۇمىس ىستەمەيسىزدەر؟ وبلىس اكىمى بولساڭ سەن كنيازسىڭ با؟ ەندى جان-جاعىڭا، ەشكىمگە قارامايسىڭ. كىم ساعان بۇلاي جاساۋعا مۇمكىندىك بەردى؟ قاراڭدار، ەگەر ءبىزدىڭ ەلدە وڭىرلەردە بىرنەشە وبلىس «ورتالىق-وڭتۇستىك-سولتۇستىك-باتىس-شىعىس» بويىنشا كووپەراتسيا جاسايتىن بولساق، وندا ءبىرىن-ءبىرى قامتاماسىز ەتە الادى. قالعانى شامالى عانا. ونى قاجەت بولسا اكەلۋگە بولادى. دەمەك شىعار جول بار. بىرلەسىپ جۇمىس ىستەڭدەر. سوندىقتان بارلىق اكىمدەر مەن ۇكىمەتكە مۇنداي مۇمكىنشىلىكتى تولىق پايدالانۋدى تاپسىرامىن»، - دەدى مەملەكەت باسشىسى.
اۆتور: مارلان جيەمباي
