ۇلت جوسپارى حالىق يگىلىگىنە قىزمەت ەتۋى كەرەك - ن. نازاربايەۆ
بۇگىن استانادا ءوتىپ جاتقان «نۇر وتان» ساياسي پارتياسىنىڭ كەزەكتەن تىس XVII سەزىندە پارتيا ءتوراعاسى، ەلباسى نۇرسۇلتان نازاربايەۆ وسىلاي مالىمدەدى.
«مەن جاقىندا ءوزىمنىڭ ماقالامدا ۇلت جوسپارىن جۇزەگە اسىرۋدى جان-جاقتى ايتىپ وتكەن بولاتىنمىن. بۇگىن دە قايتالاعان ارتىقتىق ەتپەيدى. ەڭ باستىسى بارلىق مەملەكەتتىك قىزمەتكەر وسىعان جۇمىلۋى كەرەك. سوندىقتان دا، مەن ءبىزدىڭ اتقارىپ جاتقاندارىمىزدىڭ ماڭىزدىلىعىن حالىققا بارلىق دەڭگەيدە ءتۇسىندىرۋ كەرەك دەپ سانايمىن. بارلىعى حالىق يگىلىگى ءۇشىن اتقارىلۋدا. بۇل اتقارىلىپ جاتقاننىڭ بارلىعى قازاقستاننىڭ ەكونوميكالىق ىنتىماقتاستىق جانە دامۋ ۇيىمىنا ەنۋى ءۇشىن ماڭىزدى»، - دەدى ن. نازاربايەۆ.
ەلباسىنىڭ ايتۋىنشا، الەمنىڭ وزا دامىعان 30 ەلى دەگەننىڭ ءوزى وسى ۇيىممەن بايلانىستى. «ءبىز دە ول ەلدەردىڭ قاتارىندا بولۋعا ءتيىسپىز. بەس ينستيتۋتتىق رەفورمادا مەجەلەنگەن مىندەتتەردى ءتيىمدى جۇزەگە اسىرۋ - بۇل ХХІ عاسىرداعى ءبىزدىڭ دامۋىمىزدىڭ وزەگى»، - دەدى ن. نازاربايەۆ.
ەلباسىنىڭ ايتۋىنشا، ۇلت جوسپارى ءتيىمدى جۇمىس ىستەۋى ءۇشىن ارنايى قۇرىلعان جاڭعىرتۋ جونىندەگى كوميسسيادان بولەك، بارلىق مەملەكەتتىك قىزمەتتىڭ وسىعان كىرىسۋى كەرەك. «ۇكىمەتتەن باستاپ اۋىلعا دەيىن وسىعان جۇمىلعانى دۇرىس»، - دەدى ەلباسى.
