حالىق الدىنداعى «نۇر وتاننىڭ» مىندەتتەمەلەرى مەن كوزدەگەن ماقساتتارى مەرزىمىنەن بۇرىن ورىندالدى - ن. نازاربايەۆ
بۇل تۋرالى بۇگىن ق ر پرەزيدەنتى، «نۇر وتان» پارتياسىنىڭ ءتوراعاسى نۇرسۇلتان نازاربايەۆ اتالعان پارتيانىڭ كەزەكتەن تىس 17- سەزىندە ءمالىم ەتتى.
«بارشاڭىزدى 900 مىڭ مۇشەسى بار «نۇر وتان» پارتياسىنىڭ اتىنان بۇگىنگى سەزىمىزدىڭ اشىلۋىمەن شىن جۇرەكتەن قۇتتىقتايمىن. ءبىز ءۇشىن بۇل وتە ءبىر تاريحي ءارى جاۋاپتى ءسات. ءبىز پارلامەنت ءماجىلىسىنىڭ سايلاۋىنا قاتىسۋعا قاجەتتى شەشىمدەردى بۇگىن قابىلداۋىمىز قاجەت.
«نۇر وتاننىڭ» 17 جىلدان بەرى قاراي كوشباسشى بولىپ كەلە جاتقاندىعى ءبىزدىڭ ەكونوميكامىزدىڭ، مەملەكەت پەن قوعامنىڭ ناقتى جەتىستىكتەرىنە اينالعانىنا كۋامىز. وسى ۋاقىتتا ۇلتتىق ەكونوميكامىزدىڭ جالپى اۋقىمى 23 ەسە ۇلعايدى. سوڭعى التى جىلدا بىزدە ەكونوميكانىڭ 28 جاڭا سالاسى پايدا بولدى، 890 ءوندىرىس ىسكە قوسىلدى.
بۇگىن بىزدە ەشقاشان وندىرىلمەگەن 400 جاڭا ءونىم تۇرلەرى وندىرىلەدى. 17 جىلدا جان باسىنا شاققاندا ج ى ءو قازاقستاندا 20 ەسە ءوستى. پارتيانىڭ الدىڭعى سايلاۋداعى تۇعىرناماسىن جۇزەگە اسىرۋ بارىسىندا قىرۋار جۇمىس اتقارىلدى. حالىق الدىندا الىنعان مىندەتتەمەلەر مەن كوزدەگەن ماقساتتار مەرزىمىنەن بۇرىن ورىندالدى»، - دەپ اتاپ ءوتتى پرەزيدەنت.
ەلباسى، سونىمەن قاتار، جاھاندىق، ەكونوميكالىق احۋالدىڭ قيىنشىلىعىنا بايلانىستى، ءوتىپ جاتقان داعدارىسقا بايلانىستى قازاقستاندا ۇكىمەت پەن پارلامەنت بىرلەسىپ، قىرۋار جۇمىس اتقارعاندىعىن ەسكە سالدى.
«قازاقستان الەمنىڭ ەڭ ۇزدىك 50 يننوۆاتسيالىق ەكونوميكانىڭ قاتارىنا قوسىلدى. وڭدەۋ ونەركاسىبىنىڭ كولەمى 1,3 ەسەگە ءوستى. قۇرىلىس سالاسىندا وتاندىق ءونىم 72 پروتسەنتىن قۇرادى. ينفراقۇرىلىم سالاسىندا جالپى ۇزىندىعى 1300 شاقىرىم بولاتىن جەزقازعان - بەينەۋ، ارقالىق - شۇباركول دەگەن قازاقستاننىڭ بەل ورتاسىنان وتەتىن بۇرىن-سوڭدى سالىنباعان بىزدە تەمىرجول جۇيەسى سالىندى. بەتپاق دالانىڭ ايماعىندا جۇمىس ورىندارى اشىلىپ، حالىقتىڭ جاعدايى تۇزەلدى. وسىنىڭ ارقاسىندا ەلىمىزدىڭ بارلىق وڭىرلەرىندە تىكەلەي تەمىرجول بايلانىستارى ورنادى. اسا اۋقىمدى «نۇرلى جول» مەملەكەتتىك باعدارلاماسى ىسكە اسىرىلا باستادى. التى جاسقا دەيىنگى بالالاردىڭ 82 پروتسەنتى بالاباقشامەن قامتاماسىز ەتىلدى. ەلىمىز بويىنشا وسى ۋاقىتتا 30 ميلليون شارشى مەتر تۇرعىن ءۇي ىسكە قوسىلدى. وسىنىڭ بارلىعى مەملەكەتتىڭ «نۇر وتان» پارتياسىمەن بىرىگىپ، جەر-جەردەگى ىستەگەن شارۋاسى بولىپ سانالادى»، - دەدى ەلباسى.
ايتا كەتەيىك، القالى جيىنعا 2 مىڭنان اسا دەلەگات قاتىسۋدا. ولاردىڭ قاتارىندا رەسپۋبليكانىڭ بارلىق وڭىرلەرىندەگى كونفەرەنتسيالاردا سايلانعان دەلەگاتتار، مەملەكەتتىك باسقارۋ ورگاندارىنىڭ، ۇلتتىق حولدينگتەردىڭ، ءبىلىم، عىلىم، مادەنيەت جانە سپورت قايراتكەرلەرى، قوعام، ديپلوماتيالىق كورپۋس، ۇكىمەتتىك ەمەس جانە جاستار ۇيىمدارىنىڭ، بۇقارالىق اقپارات قۇرالدارىنىڭ، باستاۋىش پارتيا ۇيىمدارىنىڭ وكىلدەرى بار.
سەزدە نەگىزگى باياندامانى ق ر پرەزيدەنتى جاساپ، پارتيا الدىنا جاڭا باعدارلاما اياسىندا ناقتى مىندەتتەر قويادى دەپ كۇتىلۋدە. سونىمەن قاتار «قازاقستان-2021. بىرلىك. تۇراقتىلىق. جاسامپازدىق» اتتى جاڭا سايلاۋالدى باعدارلاما قابىلدانباق. باعدارلاما قابىلدانعاننان كەيىن 20- ناۋرىزدا وتەتىن ق ر پارلامەنتى ءماجىلىسىنىڭ سايلاۋىنا ۇمىتكەرلەردىڭ پارتيالىق ءتىزىمى بەكىتىلەتىن بولادى.
ايتا كەتەرلىگى، سەزد بارىسىندا مەملەكەت جانە قوعام قايراتكەرى م. جولداسبەكوۆ، استانا قالاسىنىڭ اكىمى ءا. جاقسىبەكوۆ، «رودينا» ج ش س- نىڭ ديرەكتورى ي. ساۋەر، «قازاقستان بارىسى» رەسپۋبليكالىق تۋرنيرىنىڭ ەكى دۇركىن چەمپيونى ب. ىستىبايەۆ سىندى ەلىمىزگە ەسىمى بەلگىلى ازاماتتار ءسوز سويلەيدى.
اۆتور: جاسۇلان جولدىبايەۆ
