دوڭىز تۇماۋىنان ساق بولىڭىز

استانا. قازاقپارات - رەسەيدە ورشىگەن دوڭىز تۇماۋى ەلىمىزدە جاپپاي تارالۋى مۇمكىن.

وسىنى ەسكەرگەن ماماندار بۇدان بىلاي شەتەلدەن قازاقستانعا كەلەتىن ازاماتتاردى قاتاڭ تۇردە تەكسەرۋدى قولعا العان دەپ حابارلايدى الماتى ارناسى.

بۇگىندە ەلىمىزدىڭ اۋەجاي مەن تەمىر جول ۆوكزالدارىندا باس- اياعى 22 سانيتارلى- كارانتيندىك پۋنكت اشىلعان. ونىڭ 14 ى اۋەجايعا، 6 ۋى شويىن جولعا ورناتىلىپتى.

ەلىمىزگە الىس جانە جاقىن شەتەلدەن كەلەتىن قوناقتاردى تەك كەدەن مەن شەكاراشىلاردان بولەك، ەندى ەپيدەميولوگ ماماندار دا تەكسەرۋدە. ويتكەنى ۋكراينا مەن رەسەيدەن جانە ارمەنيادان قازاقستانعا قاتىنايتىن جولاۋشىلار كوپ. دوڭىز تۇماۋىنان تەك رەسەيدىڭ وزىندە 70 تەن استام ادام قايتىس بولعان. ال، قازاقستاندا دوڭىز تۇماۋىنا شالدىققان 200 گە جۋىق ناۋقاس تىركەلىپتى.

ءتىپتى، الماتى وبلىسىندا دوڭىز تۇماۋىنان ءبىر ادام كوز جۇمدى. ايتا كەتەيىك، وسىعان دەيىن الماتىدا دوڭىز تۇماۋىنا شالدىققان 10 ادام بەلگىلى بولعان. قازىرگى تاڭدا ناۋقاستاردىڭ جاعدايى جاقسى دەپ وتىر دارىگەرلەر. اۋەجايدا ازىرگە دوڭىز تۇماۋىنىڭ بەلگىلەرى بار ازاماتتار انىقتالماپتى.

«اۋەجايدا سانيتارلى- كارانتيندىك پۋنكتەر كۇندىز- ءتۇنى جۇمىس ىستەيدى. بۇل جولاۋشىلاردىڭ قاۋىپسىزدىگى مەن دەنساۋلىعى ءۇشىن جاسالعان ساقتىق شارالارى. ادامداردىڭ دەنە قىزۋىن تەكسەرەتىن ارنايى قۇرىلعىلار دا بار. قازىر الماتى اۋەجايىندا دوڭىز تۇماۋىن جۇقتىرعاندار انىقتالمادى»، - دەدى الماتى اۋەجايىنىڭ دامۋ جانە ەكونوميكا ۆيتسە- پرەزيدەنتى سەرىك مىقتىبايەۆ.

ساقتىق شارالارى ماقساتىندا اۋەجاي قىزمەتكەرلەرى دە الدىن- الا ەكپە العان. الماتىداعى اۋەجايدا حالىقارالىق رەيستەر ارنايى قۇرىلعىمەن ءجىتى تەكسەرىلۋدە. اراسىندا دەنە قىزۋى كوتەرىلگەندەرى بولسا، بىردەن دارىگەرلەردىڭ قولىنا تاپسىرماق.

nur.kz