شىمكەنتتە نەگە ءبارى ارزان؟ - فوتو

استانا. قازاقپارات - كۇن سايىن شارىقتاپ جاتقان دوللار شىمكەنتتىكتەر ءۇشىن اسا اسەر ەتە قويمايدى.

ويتكەنى شىمكەنتتە ءبارى ارزان. اسىرەسە ازىق-تۇلىك پەن تاماق. ءبىراق نەلىكتەن؟ وسى سۇراققا جاۋاپ ىزدەگەن NUR. KZ ءتىلشىسى قوعامدىق تاماقتانۋ ورىندارىنا ارنايى بارىپ، يەلەرىمەن تىلدەسىپ كوردى.

ايتا كەتەيىك، شىمكەنتتە قاراپايىم بازارلارداعى اسحانالار مەن ەليتالى ءدامحانالار وتە كوپ. سول سەبەپپەن تاعامداردىڭ ورتاشا باعاسىن ءبىلۋ ءۇشىن كەلۋشىلەر كوپتەپ جينالاتىن ورىنداردى تاڭدادىق.

شىمكەنتتە سامسانىڭ ورتاشا باعاسى - 100 تەڭگە. باعا تۇرىنە جانە ىشىنە قوسىلاتىن قوسپاسىنا بايلانىستى. قاتپارلانىپ ازىرلەنگەن سامسالار 50 تەڭگەدەن باستالادى. ال تاندىر سامسا 100-150 تەڭگە توڭىرەگىندە.

«سامال اۆتوۆوكزالى» ماڭىنداعى «جالال» ءدامحاناسىندا ەتتى ءارى مايلى تاندىر سامسا 150 تەڭگە تۇرادى. مۇنداعىلار كۇنىنە ەكى رەت (تاڭعى ساعات 8.00 دە جانە كەشكى 17.00 دە) 300 دەن اسا سامسا ازىرلەپ، كەشكە دەيىن ونىڭ بارلىعى ساتىلىپ كەتەدى.

ءدامحانادا سامسادان وزگە قازاق پەن وزبەكتىڭ ۇلتتىق تاعامدارى بار. باعاسى قالتاعا قونىمدى. قوعامدىق تاماقتانۋ ورنىنىڭ يەسى تاشبولاتتىڭ ايتۋىنشا، سامسا بيزنەسىمەن اينالىسىپ كەلە جاتقانىنا بيىل 25 جىل تولىپتى. مۇندا كۇنىنە 300 سامسا ساتىلسا، ونىڭ 100 ىنىڭ اقشاسى تازا تابىس ەكەن.

تاشبولات وسكەنبايەۆ دوللار باعاسىنىڭ شارىقتاۋى سامسا بيزنەسى ءۇشىن دە سالقىنىن تيگىزبەي قويماعان دەيدى. باعا تۇراقتى كەزدە سامسا 100 تەڭگەدەن ساتىلعان.

«شىعىندى جابۋىمىز كەرەك. بۇرىن تابىس بۇدان دا كوپ بولاتىن. وسىعان دا قاناعات»، - دەيدى ول. ايتپاقشى، سامساعا قوسىلاتىن ەتتى كاسىپكەر وزگەلەر سەكىلدى بازاردان ساتىپ المايدى. ۇلى قاساپشى ەكەن. ءوزى سويىپ، سامساعا قاجەتتى ماي مەن ەتتى بولىكتەرىن تاڭداپ الادى.

ال ءبىر تال كاۋاپتىڭ ورتاشا باعاسى - 220-250. كاۋاپتىڭ دا باعاسى ەتىنە بايلانىستى. قابىرعا مەن تاۋىقتىڭ قاناتىنان دايىندالاتىن كاۋاپتىڭ ءار تالى 300 تەڭگەدەن. ارينە، بازارلاردا باعا بۇدان دا ارزان. ءبىراق، ونداعى سەرۆيستى دامحانالارداعىمەن سالىستىرۋعا مۇلدەم كەلمەيدى.

تەمىرلان تاس جولى بويىندا ورنالاسقان «مەيمان اتا» ءدامحاناسىندا كاۋاپتىڭ 7 ءتۇرى دايىندالادى. حالمات مامانوۆتىڭ ايتۋىنشا، جۇمىس كۇندەرى بۇل ءدامحانا شەندى ءجانى اكىمدىك قىزمەتكەرلەرى تۇستەنەتىن تۇراقتى ورىنعا اينالدىرىپتى.

ءدامحانا اۋەجايعا جاقىن ورنالاسقاندىقتان كەلىم- كەتىپ قوناقتار دا وسى قوعامدىق تاماقتانۋ ورنىنا باس سۇعىپ كەتىپ ءجۇر. تەك اۋە جولاۋشىلارى ەمەس، الىس-جاقىن قالا، اۋدانداردان كەلۋشىلەر دە «مەيمان اتانى» تاماقتاناتىن ورىنعا اينالدىرعان.

سولاردىڭ ءبىرى - ارىس قالاسىنىڭ تۇرعىنى ابدىمالىك اعىباي. شىمكەنتتە ءجيى كەلىپ- كەتەتىن ول «مەكەن اتا» ءدامحاناسىنا ءار كەلگەن سايىن باس سۇعادى. كەيدە وسى جەردىڭ كاۋابى ءۇشىن وتباسىمەن ارنايى كەلەدى.

«ءدامى وتە كەرەمەت. سوزبەن ايتىپ جەتكىزۋ مۇمكىن ەمەس. سەرۆيسى دە جاقسى. كاۋاپ دايىندايتىن جەر ءوزىمىزدىڭ ارىستا دا بار. ءبىراق، مۇنداعى كاۋاپتارعا جەتپەيدى. باعاسى دا قالتاعا قونىمدى. شىمكەنتتەگى «كوكساراي» ءدامحاناسىنا ءجيى بارامىن. ول جاقپەن مۇنداعى باعا جەر مەن كوكتەي. ءتىپتى بىرنەشە ەسە قىمبات دەۋگە بولادى»، - دەيدى كەلۋشى ابدىمالىك اعىباي.

«مەيمان اتا» ءدامحاناسىندا جازدىڭ كۇندەرى 400 تالعا دەيىن كاۋاپ دايىندالادى. ال قىستا 300 گە جۋىق. كاۋاپ ءبىر كۇن بۇرىن تۇزدالىپ دايىندالىپ قويادى. كەلۋشى قوناق كاۋاپتى تاپسىرىسقا بەرگەن سوڭ نەبارى 15 اق مينۋت كۇتەدى.

ويتكەنى كاۋاپ ازىرلەۋشى ءوز ءىسىنىڭ حاس شەبەرى. ول - حالمات مامانوۆ. 1988 -جىلدان بەرى كاۋاپ دايىنداۋمەن اينالىسىپ كەلەدى. ايتا كەتەيىك، مۇندا ءبىر كۇندە كاۋاپقا 20 ك گ ەت جۇمسالادى.

كۇنىنە ساتىلعان كاۋاپتان تۇسەتىن قارجىنىڭ (كەتەتىن شىعىننان بولەك) 30 پايىزى تازا تابىس.

شىمكەنتكە ات باسىن بۇرىپ، پالاۋ تاعامىنان ءدام تاتپاي كەتەتىن قوناق كەمدە- كەم. مۇندا وزبەكتىڭ ۇلتتىق تاعامى پالاۋدى ازىرلەيتىن بىرنەشە ورتالىقتار بار. بارلىعىنىڭ ءوز كەلۋشىلەرى جوق ەمەس. نازارلارىڭىزعا «تۇركىستان» دەپ اتالاتىن ءدامحانانىڭ پالاۋىن ۇسىنىپ وتىرمىز.

بۇل ورىندى اعايىندى ەكى جىگىت اشقان. قىزمەت كورسەتە باستاعانىنا 2 اي ۋاقىت وتسە دە، تۇراقتى كليەنتتەرىن جيناپ ۇلگەرگەن. جۇمىس كۇندەرى كەلۋشىلەردىڭ قاراسى وتە كوپ. اسىرەسە تۇسكى اس ۋاقىتىندا كەزەككە تۇرىپ، كۇتەتىندەر بار.

«ءبىز ءبارىمىز باعاسى ارزان ءارى ءدامدى جەردەن تاماقتانۋعا قۇمارمىز عوي. بىزدەگى پالاۋ شىمكەنتتىڭ وزگە جەرىندە جوق. اسپازدى وزبەكستان ەلىنەن ارنايى الدىرتتىق. اعام ەكەۋمىز بۇعان دەيىن سارىاعاش اۋدانىندا ءدامحانا اشقانبىز. كەيىن وبلىس ورتالىعىنا كەلۋگە بەل بۋدىق. اللا بۇيىرتسا، جاقىن كۇندەرى قالانىڭ قاق ورتاسىنان تاعى ءبىر ءدامحانامىزدى اشپاقپىز»، - دەيدى ءدامحانا يەسى داۋرەن ابدۋعانييەۆ.

ءدامحانادا دۇيسەنبى مەن جۇما ارالىعىندا كۇنىنە ەكى رەت تۇسكى جانە كەشكى اس ۋاقىتىنا جاقىن پالاۋ ازىرلەنەدى. وعان 20 كەلىدەي كۇرىش جۇمسالادى. تۋرا سونداي مولشەردە ءسابىز كەتەدى.

ايتپاقشى، كۇرىشتىڭ «لازەر» دەگەن ءتۇرى پايدالانىلادى. ونىڭ ءبىر كەلىسى 900 تەڭگە تۇرادى. ال ەت 1100 دەن. 150 دەن استام پورتسيا پالاۋ شىعادى. ال دەمالىس كۇندەرى تەك ءبىر رەت قانا دايىندالادى. باعاسى ءبىر پورتسياسىنا (تولىق سىباعا) 600 تەڭگە. ءسىز ءۇشىن قىمبات بولۋى مۇمكىن. ويتكەنى شىمكەنتتە ءبىر پورتسيا پالاۋدى 400-500 تەڭگەدەن دە تابۋعا بولادى. ءبىراق، «تۇركىستانداعى» پالاۋدىڭ ءبىر پورتسياسى وتە ۇلكەن. كىشكەنە لەگەنمەن پارا- پار.

پالاۋدى اسپاز جاپپار ۋسەنبايەۆ دايىندايدى. 1985 -جىلدان بەرى پالاۋ دايىنداۋدى مەڭگەرگەن ونىڭ ۇلى دا وسى كاسىپپەن اينالىسادى.

تاعى ءبىر ەرەكشە اتاپ وتەرلىگى، «تۇركىستان» ءدامحاناسىندا جول بويىندا كەلە جاتقان كەلۋشىلەردى شاقىرىپ، باعىت كورسەتىپ تۇراتىن قىزمەتكەر بار.

وسىلايشا ءبىز شىمكەنتتەگى ەڭ ءوتىمدى تاعامداردىڭ باعاسىن سارالاپ كوردىك. باعاسىنا قاتىستى بىرنەشە قۇپيالارىن دا اشتىق. ال ءسىزدىڭ قالادا باعا قانداي؟