ماشكەۆيچ: مەملەكەت ءوزىن ءوزى وزگەرتپەسە، باسقا بىرەۋ كەلىپ وزگەرتەدى
ەۋرازيا قۇرلىعىنداعى ساۋدا اينالىمى تاقىرىبىنا ارنالعان شارادا جىبەك جولىنىڭ بولاشاعى مەن ەۋرازيا قۇرلىعىنداعى مەملەكەتتەردىڭ الداعى ۋاقىتتا قانداي قيىندىقتارمەن بەتپە-بەت كەلۋى مۇمكىن ەكەنى ءسوز بولدى.
شاراعا قاتىسۋشىلار نەگىزىنەن زامانۋي جىبەك جولىنىڭ بولاشاعىنا ۇلكەن سەنىممەن قارايتىندارىن ايتتى دەپ جازادى Skifnews.kz.
«ەكونوميكالىق بايلانىستاردى نىعايتۋ ماقساتىندا «ءبىر بەلدەۋ، ءبىر جول» باستاماسىمەن قولعا العان زاماناۋي جىبەك جولىن دامىتۋ شارالارى ەۋرازيا قۇرلىعىنداعى دامۋشى مەملەكەتتەردىڭ ەكونوميكاسىنا وڭ اسەر ەتپەك. زاماناۋي جىبەك جولىنىڭ باستى ماقساتىن تاۋارلار مەن قىزمەت تۇرلەرىنىڭ ەۋروپا مەن ازيا اراسىنداعى الماسۋى دەسەك، سونىڭ ىشىندە ازيا مەملەكەتتەرى ەۋروپانىڭ جوعارى تەحنولوگياسىن يگەرسە، قىتاي جاعىنان ەۋروپا نارىعىنا ءتۇرلى تاۋارلار تارتىلماق. شىڭجاڭ پروۆينتسياسىنان شىعىپ قازاقستان ىشىمەن ءازىربايجان مەن گرۋزيا ارقىلى شىعىس ەۋروپاعا، سونىمەن قاتار قارا تەڭىز بەن تۇركيا ارقىلى ەۋروپا ەلدەرىنە تارتىلعان اۆتو جانە سۋ جولدارىن باسەكەلەستىكتىڭ ەمەس، ارىپتەستىكتىڭ جوباسى دەپ اتاۋعا بولادى»، - دەگەن گرۋزيا پرەمەر-ءمينيسترى گەورگي كۆيريكاشۆيليگەمەن قازاقستاندىق ماگنات، «ەۋرازيا تابيعي رەسۋرستار» كورپوراتسياسىنىڭ ءتوراعاسى الەكساندر ماشكيەۆيچ كەلىسپەيتىنىن ايتتى.
ماشكەۆيچتىڭ ايتۋىنشا، ارزان تەڭىز جولى تۇرعاندا زاماناۋي جىبەك جولىنىڭ ءبىز كۇتكەن دەڭگەيگە جاقىن ارادا جەتە قويۋى ەكىتالاي.
«قانشا جەردەن مەملكەتتەر كەلىسىمگە كەلسە دە، بىرنەشە مىڭ شاقىرىمعا سوزىلعان قۇرلىق جولىنىڭ تەڭىز جولىمەن باسەكەگە ءتۇسۋى ەكىتالاي. ماسەلەن، افريكادان قىتايعا ءبىر كونتەينەر جەتكىزۋ سەگىز دوللار تۇرادى. ال قۇرلىقتا بۇل باعا بىرنەشە ءجۇز دوللارعا دەيىن بارادى. ەكىنشىدەن، جىبەك جولى بويىندا جاتقان بىرنەشە مەملەكەتتىڭ وزىندىك مۇددەلەرى مەن قىزىعۋشىلىقتارى بار. سول سەبەپتى بۇل جوبانى، ۇكىمەت باسشىلارىنىڭ ايتقانىنداي، ارىپتەستىك جوبا دەپ اتاۋعا بولمايدى. دۇرىسى بۇل باسەكەلەستىك جوبا. اركىم ءوزىنىڭ ۇلەسىن الۋعا تىرىسادى»، - دەدى ماشكەۆيچ.
بريفينگ مودەراتورىنىڭ «ەۋرازيا ءوڭىرى ەلدەرىنىڭ الداعى ءۇش-ءتورت جىلدا قانداي قيىندىقتارمەن بەتپە-بەت كەلۋى مۇمكىن؟» دەگەن سۇراعىنا «ۆ ت ب» بانكىنىڭ ءتوراعاسى اندرەي كوستين قىتاي ەكونوميكاسىن باستى سەبەپ رەتىندە اتادى. قىتاي ەكونوميكاسىنداعى ترانسفورماتسيانى اتاسا، گرۋزيا ۇكىمەت باسشىسى مۇناي باعاسىنىڭ تومەندەۋىنىڭ ەكونوميكاسى از يندۋستريالانعان دامۋشى ەلدەرگە زيان كەلتىرىپ وتىرعانىن العا تارتتى. سونىمەن قاتار، جىبەك جولى بويىنداعى كەدەندىك پروتسەدۋرالاردىڭ ءبىر جۇيەگە قويىلماۋى دا حالىقارالىق ساۋداعا بەلگىلى ءبىر دەڭگەيدە كەدەرگى كەلىپ وتىرانى ايتىلدى.
ال الەكساندر ماشكەۆيچ مەملەكەتتەردىڭ ەكونوميكالىق ينتەگراتسيا قۇرۋىنان بۇرىن الدىمەن ىشتەي وزدەرى ەكونوميكاعا دەگەن قاتىناستارىن وزگەرتۋ كەرەك ەكەنىن ايتتى.
«نەشە جەردەن ەكونوميكالىق ينتەگراتسيا قۇرىلعانىمەن، مەملەكەتتىڭ نارىققا، بيزنەسكە دەگەن قاتىناسى وزگەرمەيىنشە، جىبەك جولى بويىنداعى مەملەكەتتەر ءوز ماقساتتارىنا جەتە المايدى. وڭىردەگى مەملەكەتتەرگە تۇپكىلىكتى رەفورما كەرەك. مەملەكەت بيزنەسپەن اينالىسقان جەردە ەشقانداي دا دامۋ بولمايدى. سول سەبەپتى مەملەكەتتەر ءوزىن ءوزى وزگەرتۋ كەرەك. ولاي بولماعان جاعدايدا سىرتتان بىرەۋ كەلىپ وزگەرتەدى. ال ونىڭ ءتۇبى جاقسىلىق بولمايدى»، - دەدى ماشكەۆيچ.
