بالاڭىز بايعازى الىپ كوردى مە؟
اياعىن باسىپ اۋىل ۇيلەرىن ەركىن ارالاۋعا جاراپ قالعان بۇلدىرشىندەردى جاڭا كيىم كيگەن كۇنى «بايعازىڭدى الىپ قايت» دەپ كورشى- كولەمنىڭ، بىرگە وتىرعان تۋىس- تۋاعان، جاقىندارىنىڭ ۇيىنە جۇگىرتىپ جىبەرەدى. الاقايلاپ قۋانعان بالا ول ۇيلەرگە بارىپ جاڭا كيىمىنىڭ جاراستىعىن كورسەتەدى. بالالار وزدەرىنىڭ نەگە كەلگەنىن:
كيىمىمدى كورىڭىز،
ەتەگىمە توگىڭىز.
بارار جەرىم ءالى كوپ،
بايعازىمدى بەرىڭىز! - دەگەن سەكىلدى تاقپاق ارقىلى بىلتىرەدى. وندايدا ءۇي ىشىندە ۇلكەندەر وتىرسا بالانىڭ باس- اياعىنا تۇگەل قاراپ شىعىپ «تۋۋۋ، نەدەگەن ءايبات جاراسقان!»، «كۇتىپ كي» ، «قۇپ جاراسقان ەكەن!» دەگەن سياقتى جاقسى لەبىزدەر بىلدىرەدى. سونىمەن بىرگە بالانىڭ جاڭا كيىمىنە بايعازى رەتىندە قولدا بار تەڭگە، تانا، مارجاندار تاعىپ بەرەدى. ول ءبىر جاعىنان قولدان تىككەن كيىمگە اسەمدىك بەرسە، ەندى ءبىر جاعىنان كەم جەرلەرىن تولىقتاۋ ماقساتىندا قادالادى. ويتكەنى، كوشپەلى ۋاقىتتا قولدا باردان تىگىلگەن كيىم بولعان سوڭ كەيبىر تۇيمەسى، الپىنشاق- سالپىنشاقتارى كەم بولىپ قالۋى دا مۇمكىن عوي، بايعازى بەرۋشىلەر سوعان دا قارايدى ەكەن.
قازاق بايعازى سۇراپ كەلگەن بالانىڭ مەسەلدەسىن قايتارمايدى. ءتىپتى ەشتەڭە بولماي قالسا قولىنا باۋىرساق، كامپيت ۇستاتىپ، «بايعازىڭ موينىمدا» دەپ، بايعازى سۇراۋشى ۇل بالا بولسا «بايعازىڭا بايدىڭ قىزى» دەگەن سەكىلدى سوزدەرمەن قايتارادى. ارتىنان مىندەتتى تۇردە سىيلىق بولارلىقتاي ءبىر نارسە بەرەدى.
بۇل سالت ۇلكەندەردىڭ بالا قۋانىشىن ءبولىسىپ، سىيلىق بەرە وتىرىپ ونىڭ كيىم- كيىس، ءجۇرىس- تۇرىسىنا ۇلكەندەردىڭ قاتتى نازار اۋدارىپ ءمان بەرەتىنىن سەزىندىرۋدەي ماڭىزعا يە. بالا پسيحولوگياسىندا كيىم كيۋدىڭ وزىندە ۇلكەندەردىڭ تالعامىنان شىعۋ تالپىنىسىن تۋدىرادى. سونىمەن بىرگە اينالا كورشىلەردىڭ ءوزارا ىنتىماق- بەرەكەسىنە دە وڭ ىقپالىن تيگىزەدى.
ۋنيۆەرسيتەت ۇستازدارى مەن ستۋندەنتتەرگە جۇرگىزىلگەن ساۋالناما ناتيجەسىندە ون ۇستازدىڭ كىشكەنتاي كەزىندە بىرەۋى عانا بايعازى السا، ستۋدەنتتەردىڭ ەشقايسىسى بايعازى الىپ كورمەگەن. بۇدان وسى سالتىمىزدىڭ بۇگىندە قولدانىستان شىعىپ قالعانىن كورۋگە بولادى. كەي كەزدەرى بالانىڭ جاڭا العان ويىنشىق ماشينا، ۆەلوسيپەد سەكىلدى زاتتارىنا كورىمدىك بەرىپ جاتادى. بۇل بايعازىعا جاتپايدى. پەداگوگيكا عىلىمدارىنىڭ كانديداتى، م. اۋەزوۆ اتىنداعى و ق م ۋ پروفەسسورى، ءناسىپحانىم كامال قىزىنىڭ پىكىرىنە سۇيەنسەك، بايعازى كوبىنەسە جانسىز زاتتارعا قاتىستى ايتىلسا، كورىمدىك ادامعا، جاندىعا قاتىستى قولدانىلادى، ال ءسۇيىنشى جاقسى حابارعا بەرىلەتىن سىيلىق.
ءبىز بۇدان بۇل سوزدەردىڭ ءارقايسىسى وزىندىك ۇعىمعا يە ەكەن كورە الامىز. بالالارىمىز بايعازى سۇراپ، ۇلكەندەرىمىز بايعازى بەرە السا بالا تاربيەسىندەگى بابالار جولى ءوز ناتيجەسىن بەرمەي قويماسى انىق.
ۇلاربەك نۇرعالىم ۇلى
namys.kz
