قازاقستان مەديتسيناسىنىڭ ماقتانىشى - بەگىلان ستامبول ۇلى

استانا. قازاقپارات - جات ەلدە تۋىلسا دا جاسقانباي ءبىلىم الىپ، عىلىمنىڭ بيىگىن باعىندىرعان تالانتتى قانداستارىمىز از ەمەس.

جانە ولار وزىندەگى بارىن وتانىنا، قازاقستانعا ارناۋ دەگەن ۇلى ماقساتتى تۋ ەتكەن. سولاردىڭ ءبىرى - بەگىلان ستامبول ۇلى.

بەگىلان 1969 -جىلى 29 -ماۋسىمدا قىتاي حالىق رەسپۋبليكاسىنا قاراستى شينجاڭ ولكەسىندە ومىرگە كەلگەن. مەكتەپتى بىتىرگەن سوڭ مەديتسينا سالاسىن تاڭداعان ول، 1994 -جىلى «شي ان مەديتسينا ۋنيۆەرسيتەتىن» جاقسى ناتيجەمەن ءتامامدايدى. سول جىلى العاشقى ەڭبەك جولىن «ءۇرىمجى دوستىق كلينيكاسىنىڭ» جۇرەك قان تامىر بولىمىندە باستاپ، 2008 -جىلعا دەيىن سوندا قىزمەت ەتەدى.

تاڭداعان سالاسى مەديتسينا دەگەنمەن، ونىڭ ىشىندە وتە نازىك جۇرەك قان تامىرلارى اۋرۋى مامانى بولعان سوڭ، 1999-2000 -جىلدارى «بەيجىڭ فۇۋاي جۇرەك ورتالىعىندا» ەرەكشە ءبىلىم الادى ءارى قوسىمشا جۇمىس اتقارادى. سوعان وراي، 2002 -جىلى ءبىرىنشى دارىگەرلىك دارەجەگە قول جەتكىزەدى. عىلىم جولى ۇزدىكسىز ىزدەنۋدى قاجەت ەتەتىنىن قاپىسىز تۇسىنگەن جاس مامان تىنباي العا قادام باسىپ، 2002-2005 -جىلدارى «شينجاڭ مەديتسينا ۋنيۆەرسيتەتىنىڭ» اسپيرانت عىلىمي اتاعىنا يە بولادى. 2006 -جىلى بەيجىڭ ۇنيۆەرسيتەتى جۇرەك قان تامىر ورتالىعىندا ارناۋلى ينتەرۆەنتتى كارديولوگ مامانى بولىپ جۇمىس اتقارادى.

قىزمەتپەن قاتار عىلىمي زەرتتەۋلەرىن دە كوپكە ۇسىنا بىلگەن بىلىكتى ماماننىڭ «Practical journal of Cardiac Cerebral Pneumal and Vascular Disease » جۋرنالىندا «ديلاتاتسيالىق كارديوميوپاتياسى بار سوزىلمالى جۇرەك جەتىسپەۋشىلىگىمەن اۋىراتىن ناۋقاستاردى باقىلاۋ» تاقىرىبىندا زەرتتەۋى جاريالانادى. بەگىلان 2006 -جىلى ق ح ر مەديتسينالىق دوكتور كانديداتى اتاعىن السا، 2007 -جىلى جوعارى دارىگەرلىك دارەجە اتاعى بەرىلەدى. سونىمەن قاتار، 3 عىلىمي زەرتتەۋ، 17 دەن استام عىلىمي ماقالا جاريالاپ، 2008 -جىلى العاشقى كولەمدى ەڭبەگى - «جوعارى قان قىسىمى اۋرۋىنان ساقتانۋ جانە ەمدەۋ» اتتى عىلىمي كىتابىن جارىققا شىعارادى. سونداي-اق، وسى جىلى قىتاي تىلىندە «ارتەريالىق قان قىسىمى جوعارى ناۋقاستارعا ەم كورسەتۋ» تاقىرىبىندا كىتاپ جازادى. تالانتتى مامان ينتەرۆەنتتى كارديولوگ تاجىريبەسىندە 2000 نان ارتىق كوروناروگرافيا، 700 دەن استام ستەنت قويۋ وتاسىن جاسايدى.

 2008 -جىلى «Chinese journal of interventional cardiology» جۋرنالىندا «قازاق ۇلتىندا تۇراقسىز ستەنوكاردياسىن ەمدەۋ جانە ترومبوليزيس ناتيجەسى» زەرتتەۋىن جاريالايدى.

ءبىلىمى تولىسىپ، تاجىريبەسى ارتقان عالىم- مامان ەندىگى باعىتتى اتاجۇرتقا تۋرالاپ، قازاقستانعا بارىپ قىزمەت ەتۋگە بەل بايلايدى. بىلىكتى دارىگەردى قازاقستان تاراپى دا قىزۋ قارسى الدى.

بەگىلان ستامبول ۇلى 2008 -جىلدىڭ قاراشا ايىنان قازىرگى ۋاقىتقا دەيىن استاناداعى «ۇلتتىق عىلىمي مەديتسينالىق ورتالىعىنىڭ» ينتەرۆەنتتىك كارديولوگيا جانە ەندوۆاسكۋليارلى رەنتگەنحيرۋرگيا بولىمىندە ءبولىم مەڭگەرۋشى قىزمەتىن اتقارىپ كەلەدى. ءوز ەلىنە ورالعان سوڭ قۇلشىنا ەڭبەك ەتكەن مامان 2008 -جىلدان قازىرگە دەيىن 4600 كوروناروگرافيا، 2200 دەن اسا كورونارلىق ستەنت جاساپ، 4 عىلىمي ماقالا جاريالادى. ەڭ قۋانىشتىسى، قازاقستاندا تۇڭعىش رەت سوزىلمالى كارانار ارتەرياسىنىڭ توسىلۋىن ينتەرۆەنتتىك ءادىس ارقىلى ستەنتتەۋ، بىتەلگەن تامىردى تازالاۋدى، ياعني ستو جاسادى.

 ەلىمىز مەديتسيناسىنا تىڭ سەرپىن، كورنەكتى ۇلەس قوسا باستاعان دارىگەر ىزدەنىس ارقىلى قوسىمشا كارديولوگ ماماندىعىن الدى. سونىمەن قاتار، 2012 -جىلدان باستاپ شەت ەلدە بىلىكتىلىگىن جەتىلدىرىپ، 100 دەن اسا پەريفەريالىق ارتەريالارىنا ستەنت قويدى.

بەگىلاننىڭ قاجىرلى ەڭبەگى دە ەسكەرىلمەي قالعان جوق. 2011 -جىلى «ۇلتتىق عىلىمي مەديتسينالىق ورتالىعى» ا ق- نىڭ پروفەسسورى اتاعى بەرىلدى. سول جىلى قازاقستاننىڭ دەنساۋلىق ساقتاۋ سالاسىنا ەرەكشە ەڭبەك سىڭىرگەنى ءۇشىن «دەنساۋلىق ساقتاۋ مينيسترلىگىنىڭ» التىن مەدالىمەن ماراپاتتالدى.

 جانە سول جىلى عىلىم جولىنداعى ۇلكەن بەلەستەرىنىڭ ءبىرىن باعىندىرىپ، «شي ان مەديتسينا ۋنيۆەرسيتەتىندە» مەديتسينا عىلىمىنىڭ دوكتورى اتاعىن قورعادى.

 ول قازاقستاننىڭ عىلىمي جۋرنالدارىندا دا زەرتتەۋ ماقالالارىن جاريالاپ كەلەدى. حالىقارالىق دەڭگەيدەگى بىلىكتى مامان 2012 -جىلى 13-15 -قاڭتاردا وتكەن ازيا PCR جينالىسىندا ءتوراعالىق مىندەتىن، وتكەن 2015 -جىلى ورتا ازيالىق مەديتسينا فورۋمىندا ءتوراعالىق مىندەتىن اتقاردى. جانە وسى جىلى تاعى دا قازاقستاندا ۇلى جىبەك جولى: ينتەرۆەنتسيالىق كارديولوگيا بويىنشا «ورتالىق ازياداعى كارديولرگيا، ازيالىق قوعامنىڭ حالىقارالىق فورۋمنىڭ» ءتوراعاسى ءارى ۇيىمداستىرۋشىسى بولىپ، «سوزىلمالى كورونارلىق وككليۋزيانى PCI ەمدەۋ (قىسقا مەرزىمدى باقىلاۋ)» تاقىرىبىندا بايانداما جاسادى. سونداي-اق، فرانسيانىڭ پاريج قالاسىندا وتكەن Euro PCR كونگرەسىندە، ا ق ش- تىڭ مايامي قالاسىندا وتكەن ت س ت كونفەرەنتسياسىندا جانە قىتايدىڭ شاڭحاي قالاسىندا وتكەن Great Wall كونگرەسىندە عىلىمي ماقالالارى كوپشىلىك نازارىنا ۇسىنىلىپ، جاقسى باعاعا يە بولدى.

ماماننىڭ ەڭ ۇلكەن قاسيەتى امبەباپتىعى دەسەك، بۇل تۇرعىدا بەگىلاننىڭ جەتىستىكتەرىن ماقتانىشپەن ايتۋعا بولادى. ماسەلەن ول ەرەسەك ادامداردى ەمدەۋ باعىتىنداعى «انگيوحيرۋرگيا، رەنتگەنوحيرۋرگيا، ينتەرۆەنتتى حيرۋرگيا» ماماندىعىن الدى. جانە 2013 -جىلى «رەنتگەنوحيرۋرگيا مامانى»، «ۇيقى ارتەرياسىن ستەنتتەۋ، باس ميىنىڭ پروكسيمالدى قورعاۋىمەن» سەرتيفيكاتتارىنا قول جەتكىزدى.

وتاندىق مەديتسينادا تىڭ جاڭالىقتارعا ۇمتىلعان ول تۇڭعىش رەت ارىپتەستەرىمەن بىرگە ينتەرۆەنتسيالىق تاسىلمەن قان تامىر ارقىلى Aorta كلاپانىن الماستىردى.

تاجىريبەلى عالىمنىڭ مەديتسينادا جەتكەن تابىسى، جەتىستىگى تاۋسىلماق ەمەس. ول 2015 -جىلى شاڭحاي قالاسىندا بولعان «قىتاي س ت و كلوب حالقارالىق فورۋمىندا» التىن ساقينامەن ماراپاتتالدى. جانە جاڭالىققا دا باستاماشى بولا ءبىلىپ، قازاقستاننىڭ «ست و كلوب-ىن» قۇردى.

ەلىمىز مەديتسينا سالاسىن وركەندەتىپ، عىلىمىنا ولشەۋسىز ۇلەس قوساتىن وسىنداي مامانداردىڭ بارى قۋانتادى. ولار مول ءبىلىم، ۇزدىك ىسىمەن ارتتاعى ءىزباسارلارىنا دا ۇلگى بولارى انىق. بۇگىندە قازاقستان مەديتسيناسىنىڭ ماقتانىشى دەۋگە لايىق بەگىلان ستامبول ۇلىنىڭ الدا قول جەتكىزەر جەتىستىگى ءالى كوپ ەكەنىنە سەنەمىز.

مۇرات الماسبەك ۇلى

BAQ.kz