اكتەر تاۋەكەل ءمۇسىلىم: ەسسىز عاشىق بولعان ەمەسپىن
- تاۋەكەل، سەنىڭ ءومىربايانىڭدى قىزداردىڭ %90 بىلەتىنىندە كۇمانىم جوق. قالعان %10 وقىرماندارعا قىسقا دا نۇسقا بالالىق شاعىڭ تۋرالى ايتىپ وتسەڭ.
الماتىدا تۋىپ-ءوستىم. 140-مەكتەپتى ءبىتىردىم. وتباسىمىزدا انام، تاتەم، تۋعان اپكەم جانە مەن بولدىم. انام تاڭ اتقاننان كەش باتقانعا دەيىن جۇمىستا بولعاندىقتان، ءبىزدىڭ تاربيەمىزبەن تاتەمىز اينالىستى. ول وتە قاتال كىسى ەدى. الايدا، سونىڭ ارقاسىندا ءبىز وسىنداي تاربيەلى، كوركەم مىنەزدى بولىپ وستىك دەپ ايتا الامىن. كىشكەنتاي كەزدە ۇرىنشاق بولاتىنمىن. كۇن سايىن مىندەتتى تۇردە ءبىر نارسەگە جىعىلىپ، سوعىلىپ، ايتەۋىر ءۇستى-باسىم جارا بولىپ جۇرەتىن. ءالى كۇنگە دەيىن دەنەمدە سودان قالعان تىرتىقتار كوپ.
مەكتەپتە 4 پەن 5 كە وقىدىم، جانە مەكتەپ ومىرىنە اسا بەلسەندى قاتىسقان جوقپىن. ماعان فۋتبول ويناعان الدەقايدا ۇنايتىن. كاسىبي فۋتبولشى دا بولۋىم مۇمكىن ەدى. الايدا، جاتتىعۋلار قيىنداي باستاعاندا، فۋتبولدى تاستاپ كەتتىم. مۇمكىن سول كەزدە ۇيدە ءبىر ەر ادام بولعاندا، ول مەنىڭ فۋتبولدى تاستاماۋعا سەبەپشى بولار ما ەدى. انام مەنى ءارقاشان قولداعانمەن، ايەل ادام ونداي نارسەلەردى تۇسىنە بەرمەيدى عوي. ءدال سونداي سەبەپپەن ءجۇزۋدى دە، كۇرەستى دە تاستاپ كەتكەنمىن. باستاپقىدا قىزىعۋشىلىقپەن باستاپ، كاسىبي دەڭگەيگە كەلگەندە تاستاپ كەتەتىنمىن.
- جالعىز باستى انالار بۇنداي جاعدايدا سپورتتاعى جاتتىقتىرۋشى، مەكتەپتەگى ەر مۇعالىم نەمەسە ءتىپتى تۋىسقانداردىڭ اراسىنداعى ەر ادامنىڭ كومەگىمەن اكەنىڭ ورنىن باسۋعا تىرىسادى. سەندەردە شە؟
- ءيا، ونداي ادام مەندە دە بولدى. ول قانات ەسىمدى انامنىڭ ءىنىسى ەدى. جازعى دەمالىستى كوبىنەسە انامنىڭ تۋعان ءوڭىرى جەزقازعان جاقتا وتكىزەتىن ەدىم. ول ءورت ءسوندىرۋشى بولاتىن. مەن ءۇشىن ءورت سوندىرۋشىلەردى كورۋدىڭ ءوزى ءبىر عاجاپ ەدى. تاڭ اتقاننان كەش باتقانعا دەيىن قانات اعامنىڭ قاسىندا جۇرەتىنمىن. ول دا مەنى قالدىرماي، جۇمىسىنا الىپ باراتىن. تالاي قىزىقتى وقيعالاردى دا باستان كەشىردىك.
ناعاشى اجەمنىڭ ايتۋىنشا، مەن قانشالىقتى كوپ ويناپ، شارشاپ ۇيىقتاپ قالسام دا، اعامنىڭ كولىكتى وت الدىرىپ جاتقانىن ەستىپ قويعاندا، تاماعىمدى ىشپەستەن بىردەن، ۇشىپ تۇرىپ، سونىڭ ارتىنان جۇگىرەدى ەكەنمىن. كولىككە دەگەن قىزىعۋشىلىق سول كەزدە تۋدى. اكەلىك مەيىرىمدى سول كىسىدەن الدىم دەسەم دە بولادى.
- العاشقى ماحاببات نەشە جاستا بولدى؟
- العاشقى ماحاببات باستاۋىش سىنىپتاردا بولدى. ول قىزدىڭ ەسىمى دانا ەدى. دانا بەلسەندى قىز ەدى، سىنىبىمىزدىڭ باستىعى. مەكتەپتەگى مەرەكەلىك شارالاردا ءبي بيلەيتىن. ول بيلەگەندە مەن عانا ەمەس، باسقا دا ۇلدار وعان عاشىق بولاتىن. ءتىپتى ءبىزدىڭ سىنىبىمىزداعى بارلىق ۇلدار دانانى جاقسى كورگەنىن بىلەمىن. ۇناتقان قىزعا تيىسە بەرەسىڭ عوي. مەن دە شاشىنان تارتىپ، ءتۇرتىپ، يتەرىپ قالىپ، سىرت كيىمىن بەرمەي، قاشىپ جۇرەتىنمىن. ول بولسا سەزىمدى تۇسىنبەي، سىنىپ جەتەكشىمىزگە شاعىمدانا بەرەتىن. سىنىپ جەتەكشىمىز ارينە وندايدىڭ ءبارىن تۇسىنەدى.
- ادەتتە باستاۋىش سىنىپتاعى ماحابباتتان كەيىنگى ماحاببات 7-8 سىنىپتا بولۋشى ەدى عوي.
- ءيا، ودان كەيىنگى ۇلكەن ماحاببات 8-9 سىنىپ ارالىعىندا بولدى. ەسىمى جانسايا ەدى. ءوزى وڭتۇسىك قازاقستان جاقتان. مىنەزى قىزىق، قىلىقتى قىز ەدى. جانسايانى كورۋدىڭ ءوزى سول كەزدە مەن ءۇشىن ءبىر باقىت بولاتىن. ساباقتا دا، ديسكوتەكادا دا سونى ىزدەيتىنمىن. جانسايا ءۇشىن ءساندى، ادەمى كيىنۋگە تىرىسقانمىن. ونى كورسەم، كۇنى بويى ءماز بولىپ جۇرەمىن. ول دا مەنى ۇناتتى. قاسىمدا سول كەزدە قانات ەسىمدى دوسىم بار. جانسايانىڭ قاسىنان دا ءبىر قۇربىسى كەتپەيتىن. ءسويتىپ، تورتەۋىمىز بىرگە ساباققا بارىپ، بىرگە قايتىپ، بىرگە ۋاقىت وتكىزەتىن بولدىق.
ايتپاقشى، سول كەزدەگى ءبىر قىزىق وقيعانى ايتىپ بەرەيىن! ءبارىمىز ساباقتان شىعىپ، ءۇيدىڭ الدىندا سويلەسىپ وتىرمىز. مەن اتكەنشەكتە وتىرمىن. ءبىر كەزدە قاسىما جانسايانىڭ ەڭ جاقىن قۇربىسى كەلىپ «تاۋەكەل، سەن جانسايانى جاقسى كورەسىڭ. كەزدەسكەندەرىڭە ءبىراز بولدى. سۇيگىڭ كەلمەيدى مە؟» دەپ سۇرادى.
ونى سۇراتقان جانسايا، بىردەن ايتايىن!
ءيا، سول بولىپ تۇر عوي (كۇلىپ). ول كەزدە مەن ون ۇيىقتاسام دا، قىزدى ءسۇيۋ دەگەن نارسە ويىما كەلمەيدى! ەرىننەن سۇيمەك تۇگىل، ءتىپتى امانداسقاندا بەتىنەن سۇيگەن ەمەسپىن. ونداي وي دا بولعان ەمەس. سوندىقتان «جوق» دەپ جاۋاپ بەردىم. كەلەسى كۇنى جانسايا رەنجىپ قالىپ، ونىڭ دوستارى مەنى «تورموز» دەپ ءجۇر ەكەن. سول كۇننەن باستاپ، مەنىمەن ارالاسپاي، جوعارعى سىنىپتىڭ جىگىتتەرىمەن ارالاساتىن بولدى. ال ءبىز جۇردىك سولاي، «تورموز» بولىپ (كۇلەدى).
- ەندى سانالى ماحابباتقا كەلەيىك. 18-20 جاستاعى دەلىك.
- وي، ول جەر ەندى تراگەديا!
- سول تراگەديانى ايتىپ تۇرمىن.
- ەسىمىن اتاماي-اق قويايىن، ءيا؟ قازىر ونىڭ وتباسى، كۇيەۋى بار.
- كەلىستىك.
- قاتتى جاقسى كوردىم دەپ ايتايىن دەسەم، ولاي دا ەمەس سياقتى. مۇمكىن شىنىمەن جاقسى كورگەندە، ءوزىم ۇيلەنۋشى مە ەدىم. بىلمەيمىن. ول تارازدىڭ قىزى ەدى. ورتاق تانىستارىمىزدان ونىڭ سۋرەتىن كورىپ قالىپ ۇناتتىم. سوسىن جارتى جىلداي حات جانە الەۋمەتتىك جەلى ارقىلى سىرلاسىپ جۇردىك. سويلەگەن سوزدەرى، ايتاتىن ويلارى، مىنەز-قۇلقى، تاربيەسى، ءتۇرى - ءبارى ۇنادى!
سوسىن، ءوزىن كورۋ ءۇشىن العاش رەت تارازعا باردىم. كورگەندە ودان بەتەر ۇناتتىم. ۇيالشاق، تاربيەلى قىز بولىپ شىققانىنا ىشتەي قۋاندىم. ءبىر جىلعا جەتەر قارىم-قاتىناسىمىزعا ارا-قاشىقتىق پەن مەنىڭ ەندى باستالىپ كەلە جاتقان ونەر جولىم كەدەرگى بولدى. ونىڭ تاراپىنان كوپ قىزعانۋشىلىق پايدا بولدى. سونىڭ كەسىرىنەن ەكەۋىمىز ۇرسىسا باستادىق. مەن ءبىر جەرگە بارۋ كەرەك بولسام، بۇل ەكەۋمىز ءۇشىن تراگەديا. تەلەفون ارقىلى قايدا بارتىنىمدى ۇزاق تۇسىندىرۋگە ءماجبۇر بولدىم. بارعاننىڭ وزىندە دە وعان قايتا-قايتا تەلەفون شالىپ تۇرۋ كەرەك ەدىم نەمەسە حات جىبەرىپ تۇرۋ دەگەندەي. سولاي ەكەۋىمىز ايىرىلىسىپ كەتتىك.
- ول سەنىڭ شەشىمىڭ بولدى ما؟
- ءيا، مەنىڭ ينيتسياتيۆام. تەك ارتىنان وكىنىپ قالدىم.
- نەلىكتەن؟
- ارتىنان، مەن ول سياقتى قىزدى تابا المادىم. وكىنىش ۇزاق بولدى. ەكى جىلداي ىزدەۋدە ءجۇردىم دەۋگە بولادى. ال ول قىز سول ۋاقىتتا باسقا جىگىتكە تۇرمىسقا شىعىپ كەتتى. قازىر وتباسىلى، بالا-شاعاسى بار. ارينە، مەن ول ءۇشىن قۋانىشتىمىن. اراسىندا دوس رەتىندە ءبىر-ءبىرىمىزدى قۇتتىقتاپ جازىپ تۇرامىز.
- كوپ جاعدايدا ەر ادامدار بەيسانالى تۇردە اناسىنا ۇقسايتىن قىز ىزدەيدى. سەندە قالاي؟
- مەن كوپ جاعدايدا اپكەمە ۇقساتامىن. اپكەم وتباسىن قۇرعان. جەزدەم وتە اقىلدى، ىسكەر ازامات.
- ەندى ءبارىن قىزىقتىراتىن سۇراق. تاۋەكەلدىڭ سۇيىكتىسى قانداي بولۋ كەرەك؟
- بويى قىسقا بولماۋ كەرەك، 170 تەن جوعارى، وقىعان، قازاق تىلىندە ەركىن سويلەيتىن، تاربيەلى، سالت-ءداستۇردى بىلەتىن قىز بولۋى قاجەت. شاشى مىندەتتى تۇردە ۇزىن بولۋ كەرەك. ۇلكەندى سىيلاي بىلەتىن. كوزى اشىق، ساناسى وياۋ، قىلىقتى، ادەمى بولۋ كەرەك. سوسىن، ءبىر قالىپتا قالا بەرمەي، تالپىنىپ، ىزدەنىپ، دامىپ وتىرۋ كەرەك. جۇمىس ىستەيمىن دەسە، تىيىم سالمايمىن. تەك ۇيدەگى شارۋانى، وتباسىن ەكىنشى ورىنعا ىسىرىپ قويماسا بولعانى.
- گۇلناز جولانوۆانى سيپاتتادىڭ عوي. ول نەسىمەن ۇنامادى؟
- نەسىمەن ۇنامادى دەيسىڭ بە؟ (كۇلەدى) گۇلناز ەكەۋىمىز تەك ءتۇسىرىلىم الاڭىندا بىرگە جۇمىس ىستەدىك. مەن ەش ۋاقىتتا جۇمىستى جەكە ومىرمەن ارالاستىرمايمىن. جۇمىس شەكاراسىنان وتپەيمىن. سوسىن، جاسىڭ ۇلكەيگەن سايىن كوپ نارسەگە ءمان بەرە باستايدى ەكەنسىڭ. جاس كەزىڭدەگىدەي كوزدى جۇما قاراي سالمايسىڭ. بويداق بولىپ جۇرگەنىمنىڭ تاعى ءبىر سەبەبى - ۋاقىت تاپشىلىعى. الداعى ەكى جىلدا جۇمىسقا دەگەن جوسپارلارىم كوپ. جەكە ومىرگە الاڭداعىم كەلمەيدى.
- ول ساعان بايلانىستى ەمەس قوي. سەزىم سۇراپ كەلمەيدى.
- ەندى، ونداي بولىپ جاتسا، ەسسىز عاشىق قىلارداي قىز تابىلسا، كورە جاتارمىز (كۇلەدى).
- تاۋەكەل، سەنىڭ ينستاگرام پاراقشاڭداعى كوممەنتاريلەرگە توقتايىق. بىلاي دەيدى ءبىر جىگىت: «وتىرىك كۇلىپ، تالاي قىزدى جىلاتقان بولارسىڭ».
- مەكتەپ كەزدەگى قىزدار توچنو جىلاعان جوق (كۇلەدى). جالپى مەن تۇراقتى اداممىن. ۇشىپ-قونىپ، ءار قىزبەن كەزدەسىپ، ولاردى وزىمە عاشىق ەتىپ، سوسىن تاستاپ كەتىپ جىلاتۋدان اۋلاقپىن. انام دا «قىزدىڭ جاسىنا قالما» دەيتىن. سول ءارقاشان ەسىمدە.
- سونىمەن، ەڭ بولماعاندا قاسىڭنان وتكەنىڭدى قالايتىن قىزدار سەنى قايدان ىزدەپ تابا الادى؟
- جاتتىعۋ زالىنان. نەمەسە ستۋديادان. دەمالىس كۇندەرى شاڭعى تەبۋگە شىمبۇلاققا بارامىن. سول جەرلەردەن كەزدەستىرۋگە بولادى.
- «قانداي ادەمىسىز! دا پروستيت مەنيا مۋج» دەپ جاتىر ءبىر ارۋ. قىزداردىڭ جىگىتتەرى نەمەسە بىرەۋدىڭ كۇيەۋى سەنەن سۇيىكتىسىن قىزعانىپ، ساعان رەنىشىن ايتقان كەزدەر بولدى ما؟
- بەتىمە كەلىپ ەشكىم رەنىشىن ايتقان جوق. حات جازعاندارى بولدى، ءبىر-ەكى رەت. وسى جەردە تاعى ءبىر قىزىق وقيعا ايتا كەتەيىن. كۇيەۋى مەن ايەلى كەلە جاتىر. ايەلى ماعان قاراپ قالدى. سوسىن كۇيەۋى كەلىپ، «برات، ايەلىممەن سۋرەتكە تۇسە سالشى» دەگەن (كۇلەدى).
- سەنىڭ كولىگىڭە، اقشاڭا قىزىعاتىن قىزدار كوپ پا؟
- وندايلار جوق ەمەس، بار ارينە. زامان سونداي بولىپ كەتتى مە، بىلمەيمىن. «زامانىڭ تۇلكى بولسا، تازى بولىپ شال» دەيدى عوي. مۇمكىن سودان بولار. الايدا، ونداي قىزداردى بىردەن تانيمىن. قىدىرعاندى جاقسى كورەدى، قىمبات جەرلەرگە الىپ بارۋدى، قىمبات سىيلىقتاردى تالاپ ەتەدى. ولاردى مۇلدە قاسىما جولاتپاۋعا تىرىسامىن.
- قانشا رەت كۇيەۋ جولداس بولدىڭ؟
- ءۇش رەت بولدىم. قيىن ەكەن. قۋانىشقا وراي، ۇشتەن كوپ بولۋعا بولمايدى دەيدى عوي.
- باقىتتى بولۋدىڭ بەس شارتى قانداي؟
- سۇيىكتى ادامنىڭ بولۋى. انا-انانىڭ امانشىلىعى. ومىرگە دەگەن جىگەر، تالپىنىس بولۋ كەرەك. سوسىن سپورت.
- تورتەۋىن اتادىڭ. تاعى بىرەۋ كەرەك.
- كىتاپ وقۋ كەرەك. كىتاپ جانىڭدى تىنىقتىرۋدىڭ تاماشا جولى! سەن ءبىر كىتاپ ارقىلى بىرنەشە ءومىر ءسۇرىپ تاستايسىڭ، ۇيدە وتىرىپ، دۇنيەنى شارلايسىڭ. مۇلدەم باسقا كەڭىستىكتە جۇرگەن سياقتىسىڭ. ومىرىڭدەگى شەشىلمەي جاتقان ماسەلەلەردەن ءبىر ءسات بولسىن بوساپ قالاسىڭ. بۇل دا ءبىر باقىت قوي.
- كىتاپ، سپورت، قىزداردى جىلاتپايسىڭ. تىم جاقسى وبراز. ءبىر جاعىمسىز قىلىق بولماۋى مۇمكىن ەمەس.
- بولدى، ارينە. ءبىر رەت دوسىمنىڭ ۇيالى تەلەفونىن باسقا جىگىتتەر الىپ قويىپ، سولارمەن ەرەگىسىپ قالدىق. ءسوز وتپەگەندىكتەن، جاعىنان تارتىپ جىبەردىم.
- دوسىڭدى قورعاپ پا؟
- ءيا.
- ول جاعىمسىز قىلىق ەمەس.
- وندا، باسقا ەشتەڭە ەسىمە تۇسپەي جاتىر. وسىندايمىن ەندى (كۇلەدى).
Baq.kz
