بەس رەفورمانىڭ ءارقايسىسىن دايەكتىلىكپەن جۇزەگە اسىرامىز - ق ر پرەزيدەنتى
بۇل جايىندا اقوردا جاريا ەتكەن مەملەكەت باسشىسى نۇرسۇلتان نازاربايەۆتىڭ «ۇلت جوسپارى - قازاقستاندىق ارمانعا باستايتىن جول» اتتى ماقالاسىندا ايتىلعان.
«پارلامەنت پەن ۇكىمەت جۇمىسىنىڭ ۇيلەسىمدىلىگىن ەرەكشە اتاپ وتكىم كەلەدى. وتە قىسقا مەرزىمدە جۇزەگە اسىرىلعان زاڭنامالىق جۇمىستاردىڭ وسىنداي قارقىنى مەن ساپاسى بۇعان دەيىن قازاقستاندا بولىپ كورگەن ەمەس. بۇل - ءبىزدىڭ پارلامەنتتىك مودەلىمىزدىڭ جانە مەملەكەتتىك بيلىكتىڭ وكىلەتتى جانە اتقارۋشى تارماقتارىنىڭ ءوزارا ءىس- قيمىل جۇيەسىنىڭ جوعارى تيىمدىلىگىنىڭ ايعاعى. ۇلت جوسپارىن ورىنداۋ بويىنشا پراكتيكالىق جۇمىستار جاڭا مۇمكىندىكتەر مەن الەمدىك دامۋداعى ىقتيمال تاۋەكەلدەردى ەسەپكە الا وتىرىپ، وزگەرمەلى جاھاندىق جاعدايلارعا تولىق سايكەس ءتۇزىلىپ جاتقانىن كورۋ ماڭىزدى. بۇل تۋرالى مەنىڭ 2015 -جىلدىڭ 30 قاراشاسىنداعى قازاقستان حالقىنا جولداۋىمدا ەگجەي- تەگجەيلى بايان ەتىلگەن»، - دەيدى مەملەكەت باسشىسى.
وسى ورايدا پرەزيدەنت بەس ينستيتۋتتىق رەفورما قازاقستان ەكونوميكاسى جاھاندىق ەكونوميكالىق قيىندىقتاردىڭ كۇشتى ىقپالىن سەزىنىپ وتىرعان قازىرگى كەزەڭدە ەرەكشە ماڭىزدى ەكەنىن قاداپ ايتتى.
«ءبىز ولاردى ەكونوميكالىق ءوسىمنىڭ سەنىمدى قارقىنىن قالپىنا كەلتىرۋ مەن بۇكىل حالىققا بەرىك الەۋمەتتىك كەپىلدىكتەردى قامتاماسىز ەتۋگە باعىتتالعان مەملەكەتتىڭ داعدارىسقا قارسى كەڭ اۋقىمدى شارالارىنىڭ باستى قۇرامداسى رەتىندە قاراستىرامىز. قازاقستاننىڭ دامۋدىڭ جوعارى الەمدىك ستاندارتتارىنا قول جەتكىزۋىنە ىقپال ەتەتىن جاڭا قازاقستاندىق زاڭنامالار ءقازىردىڭ وزىندە جۇمىس ىستەي باستادى. سوندىقتان قازىر قازاقستاندىقتاردىڭ ولار تۋرالى تەك ءبىلىپ قانا قويماي، سونداي- اق، ولاردىڭ پراكتيكالىق ومىردە، ەكونوميكالىق قىزمەتتە نەمەسە قوعامدىق قاتىناستاردا بەرەتىن جاڭا مۇمكىندىكتەرىن قولدانۋلارى ماڭىزدى. بارشانىڭ بويىندا قۇقىقتىق جاڭالىقتار نەگىزىندە مەملەكەتتىك باسقارۋ مەن قۇقىق ءتارتىبىنىڭ جۇيەسى قالاي اۋىساتىنى جايىندا بارىنشا تولىق تۇسىنىك بولۋى ءتيىس. جاڭا جاعدايلاردا بيزنەستى قالاي دامىتۋعا نەمەسە مەملەكەتتىك ەمەس سەكتوردىڭ قىزمەتىن قانداي پەرسپەكتيۆالى باعىتتاردا بەلسەندى ەتۋگە بولادى دەگەن سياقتى»، - دەپ اتاپ وتىلگەن ن. نازاربايەۆ ماقالاسىندا.
ەلباسىنىڭ پايىمىنشا، وسىنىڭ ءبارى، تۇتاستاي العاندا، تۇرعىنداردىڭ ءبارىنىڭ ەكونوميكالىق جانە ازاماتتىق بەلسەندىلىكتەرىن ارتتىرۋعا قۋاتتى سەرپىن بەرەتىن بولادى.
