شەتتەگى قازاقتار جاڭا جىلدى قالاي تويلادى؟

استانا. قازاقپارات - قازاقستاندىقتار جاڭا جىل مەرەكەسىن ەكى كۇن بويى اتاپ ءوتتى. ازاتتىق شەتەلدە تۇراتىن قازاقتاردىڭ بۇل مەيرامعا قانشالىقتى ءمان بەرەتىندەرىن سۇراپ ءبىلدى.

گريگوريان كۇنتىزبەسى بويىنشا جىل باسى - 1 -قاڭتار - الەمنىڭ كوپتەگەن حالىقتارى تويلايتىن مەيرام. قازاقستاندا جاڭا جىل قۇرمەتىنە ەكى كۇندىك (1-2 -قاڭتار) مەملەكەتتىك مەرەكە جاريالانعان. ءبىراق شەتتەگى قازاقتار تۇراتىن كەيبىر مەملەكەتتەردە، ماسەلەن، ەۋروپا ەلدەرىندە جاڭا جىل مەيرامىنىڭ ماڭىزدىلىعى جەلتوقسان ايىنىڭ 25 ىندە تويلاناتىن روجدەستۆونىڭ دارەجەسىمەن سالىستىرعاندا الدەقايدا تومەن.

باتىستاعى قازاقتاردىڭ جاڭا جىلى

جامبىل وبلىسىنىڭ تۋماسى، قازىر فرانسيانىڭ استاناسى پاريج قالاسىندا تۇراتىن ءجازيرا ەسبەرگەنوۆا «بۇل جاقتا جاڭا جىل كەزىندە قازاقستانداعىداي تويلاۋ مۇلدەم جوق» دەيدى.

- مۇندا جەكە وتباسى تۇگىلى مەملەكەتتىك مەكەمەلەر دە جاڭا جىلدىق كەشكە دايىندالمايدى. ارينە، 31 -جەلتوقساننان 1 -قاڭتارعا قاراعان ءساتتى - تۇنگى ساعات 12 نى كۇتىپ الادى. وندا دا قازاقستانداعىداي شابىلماي، بىرنەشە ادام بىرىگىپ رەستوراندا نە ءوز وتباسىلارىندا قاراپايىم تۇردە عانا اتاپ وتەدى، - دەيدى ول.

ءجازيرا ەسبەرگەنوۆا بيىل پاريج ماڭىنداعى شاعىن قالالار ارتىق شىعىنعا بالاپ، جاڭا جىلدىق بەزەندىرۋلەر ءىلۋ نە پيروتەحنيكالىق ونىمدەر اتۋ شارالارىنان دا باس تارتقانىن ايتادى.

- استا-توك داستارحان، كوك تۇتىنگە وراعان وتشاشۋلاردى مۇندا مۇلدەم كورمەيسىڭ. ورتاڭا قاراپ ءوزىڭ دە بەيىمدەلەدى ەكەنسىڭ. ءبىز دە ءوز وتباسىمىزدا تۇنگى 12 نى قارسى الىپ، ارى قاراي دەمالدىق، - دەيدى پاريجدە تۇراتىن قازاق.

دانيادا تۇراتىن قازاق قاجى اكپار ايۋبي دە جاڭا جىلدى ەل قاتارلى اتاپ وتەتىندەرىن، ءبىراق «تويعا اينالدىرىپ جىبەرمەيتىندەرىن» ايتتى.

- قاڭتاردىڭ 1 ىن اتاپ ءوتۋ ارقىلى وتكەن جىلدان قورىتىندىلاپ، كەلەسى جىلعا پلان جاساۋىمىز كەرەك. ەڭ جاقىن دەگەن ەكى- ءۇش وتباسى بىرگە بولامىز، جاقسى كورەتىن اسىمىزدى جاسايمىز، اڭگىمە- دۇكەن قۇرامىز. توي ەمەس، ءبىر- بىرىمىزدە قۇتتىقتاۋ عانا. دانيا تۇرعىندارى دا وسىلاي جاسايدى، - دەيدى ول.

ال اۆستريا استاناسى ۆەنا قالاسىندا تۇراتىن قازاق قىزىرحان شولپان قاڭتاردىڭ 1 ىن جاڭا جىل مەيرامى رەتىندە اتاپ وتۋگە قارسى.

- ارينە، ءوزىم تۇراتىن ەل نەگىزگى ءدىنى حريستيان بولعاندىقتان 1 -قاڭتاردى مىندەتتى تۇردە تويلايدى. ءبىراق مۇنداعى قازاقتار جاڭا جىلدى تويلامايدى. 1 -قاڭتاردىڭ باق-بەرەكە، قۇت اكەلەتىنىنە ەشقاشان سەنبەيمىن، سول سەبەپتى تويلامايمىن. ناۋرىزدى جاڭا جىل رەتىندە اتاپ وتەمىز، ويتكەنى اتا-بابالارىمىز نەشە مىڭ جىلدان بەرى تويلاپ كەلە جاتىر، - دەيدى قىزىرحان شولپان.

كانادادا تۇراتىن قازاق ەرجان نۇرحاسەن ول ەل جەلتوقساننىڭ 25 ىندە باستالاتىن Сhristmas (روجدەستۆو، يسا پايعامباردىڭ تۋعان كۇنى) مەيرامى قۇرمەتىنە ون كۇندەي دەمالاتىنىن ايتادى.

- جاڭا جىلدا قوناق كەلىپ قالسا، قازاقشا تاماق بەرۋ ءۇشىن كەرەك دەپ جەلتوقساندا قوي سويامىن. ءبىراق جاڭا جىلدى تويلاۋىمىزدىڭ اكەتىپ بارا جاتقان ەرەكشەلىگى جوق. جەلتوقساننىڭ 31 ى كۇنى ەڭ جاقىن دوستارىمىزدى ۇيگە قوناققا شاقىرامىز. سودان سوڭ ءتۇن بويى اڭگىمەلەسەمىز، ءان ايتامىز، بيلەيمىز، - دەيدى ول.

ءبىر جىلدا - ءۇش جاڭا جىل مەيرامى

ال موڭعوليانىڭ بايان-ولگيي ايماعىندا تۇراتىن جاناربەك اقىبي ول ەلدەگى قازاقتار 1 -قاڭتاردى مەرەكەلەۋگە جەلتوقسان ايىنىڭ سوڭعى اپتاسىنان باستاپ دايىندالاتىن ايتادى.

- قازىر موڭعول ەلىندەگى ۇلتشىلدار سىرتتان كەلگەن بارلىق مادەنيەتتى ىسىرىپ تاستاپ، ءوز قۇندىلىقتارىن جاڭعىرتۋعا ەرىك بەرسە دە، وسى جاڭا جىل مەرەكەسىن قالدىرىپ، «الەمدىك مەيرام» دەگەن اتاۋمەن ءسان-سالتاناتىن ارتتىرىپ كەلەدى. بۇل ءۇردىس قازاقتار شوعىرلانعان بايان-ولگيي ايماعىندا دا قالىپتاسقان. مۇندا ءاربىر مەكەمەدەن باستاپ جەكە وتباسىلارعا دەيىن قىزۋ دايىندىققا كىرىسەدى، - دەيدى ول.

جاناربەك اقىبيدىڭ ايتۋىنشا، ونداعى قازاقتار جاڭا جىل مەيرامىن جىلىنا ءۇش رەت تويلايدى. اۋەلگى جاڭا جىل -  گريگوريان كۇنتىزبەسى بويىنشا جىل باسى 1 -قاڭتار، ودان كەيىنگىسى -  موڭعولدىڭ اي كۇنتىزبەسى بويىنشا جىل باسى (بيىل 8 -اقپاندا كەلەدى) تساگاان سار مەيرامى، ءۇشىنشىسى -  يران مەن تۇركى حالىقتارىنىڭ كوبى 21-23 -ناۋرىزدا اتاپ وتەتىن ناۋرىز مەرەكەسى.