قازاقستاننىڭ اسكەري- تەڭىز كۇشتەرىنە ارنايى ايلاق سالىنۋدا

استانا. قازاقپارات -  اقتاۋ تەڭىز پورتىندا ەلىمىزدىڭ اسكەري- تەڭىز كۇشتەرىنە ارنالعان ايلاق سالىنىپ جاتىر. ءساتىن سالسا، قۇرىلىسى بيىل ماۋسىم ايىندا اياقتالادى.

  ال ازىرگە اسكەري كەمەلەرىمىز جالدامالى ايلاقتاردا تۇر. جىلىنا شامامەن 100 ميلليون تەڭگە شىعىندالۋدا. ءارى كەمەلەر سانى كوبەيگەن سايىن، جالداۋدىڭ قۇنى دا قىمباتتاپ كەلەدى.

  ماماندار: «ارنايى ايلاق سالىنعان سوڭ بۇل ماسەلە ءبىرجولا شەشىلەدى»،  - دەپ وتىر.   بۇگىندە قازاقستان اسكەرىنىڭ كەمەلەرى ورتالىقتان 140 شاقىرىم جەردەگى باۋتينو اۋىلى ماڭىنداعى جالدامالى ايلاقتا تۇر. سالدارىنان فلوتقا قىزمەت كورسەتۋ كەزىندە قيىندىقتار تۋىندايدى. ءارى كەمەلەردىڭ جاۋىنگەرلىك دايىندىعىنا دا كەرى اسەر ەتەدى.

  ايتا كەتۋ كەرەك، كاسپيدىڭ اقتاۋ حالىقارالىق تەڭىز پورتى   اۋماعىنداعى زاماناۋي اسكەري- تەحنيكالىق نىساننىڭ قۇرىلىسى وتكەن جىلدىڭ سوڭىندا باستالدى.   بۇل ىرگەلەس وڭىرلەردە بالاماسى جوق بىرەگەي اسكەري- تەڭىز ايلاعى بولماق. جاڭا نىسان قازاقستان اسكەرىنە ساناۋلى ۋاقىتتا جينالۋعا مۇمكىندىك بەرمەك.

جانداربەك جانزاقوۆ، ق ر     ق ك اسكەري- تەڭىز كۇشتەرىنىڭ باس قولباسشىسى - اسكەري دابىل كەزىندە نەمەسە ارنايى تاپسىرمانى ورىنداۋ الدىندا كەمەلەردى 6 ساعات دايىنداۋ قاجەت ەدى. ەندى بۇل ايلاق سالىنعاننان كەيىن ءبىز 27 مينۋت ىشىندە تولىق ءازىر تۇرامىز.  

قۇرىلىستىڭ العاشقى كەزەڭى دە ءبىتتى. توسەمە جۇمىستارى اياقتالعاننان كەيىن مەتالل قۇرىلىمدارى ورناتىلا باستايدى. قۇرىلىستى بيىل ماۋسىم ايىندا اياقتاۋ دىتتەلىپ وتىر. ستراتەگيالىق ماڭىزدى نىساندى تاپسىرعاننان كەيىن سان الۋان ۇلگىدەگى 20 عا جۋىق كەمە جاڭا ايلاققا ورنالاستىرىلادى.

www.khabar.kz