باتىس قازاقستان وبلىسىنىڭ اكىمى قازاقستاندىقتاردى جاڭا جىلمەن قۇتتىقتادى
«جاڭا 2016-جىلمەن شىن جۇرەكتەن قۇتتىقتايمىن! 2015-جىل شىن مانىندە ەلىمىزدىڭ تاريحىنا التىن ارىپتەرمەن جازۋعا تۇرارلىق جىل بولدى دەپ ايتۋعا تولىق نەگىز بار. وسى جىلى مەملەكەتىمىز ۇلى جەڭىستىڭ 70 جىلدىعىن، قازاق حاندىعىنىڭ 550 جىلدىعىن، ق ر كونستيتۋتسياسىنىڭ جانە قازاقستان حالقى اسسامبلەياسىنىڭ 20 جىلدىعىن كەڭ كولەمدە اتاپ ءوتتى. سونداي-اق قازاقستان ەكونوميكاسى دا ەڭسەلى بيىكتەرگە كوتەرىلدى. الدا ءبىزدى ءالى دە بولسا، جاڭا بەلەستەر كۇتۋدە.
2015-جىلى قازاقستان رەسپۋبليكاسىنىڭ پرەزيدەنتى - ۇلت كوشباسشىسى نۇرسۇلتان ءابىش ۇلى نازاربايەۆ «قازاقستان جاڭا جاھاندىق ناقتى احۋالدا: ءوسىم، رەفورمالار، دامۋ» اتتى قازاقستان حالقىنا ارناعان جولداۋىندا «رۋحى بيىك، ەڭبەگى ەرەن، بىرلىگى مىعىم ماڭگىلىك ەل بولۋ ءۇشىن بىزدە ءبارى بار. تاۋەلسىزدىكتىڭ تۋىن جەلبىرەتىپ، تۇعىرىن نىعايتقان ءبىزدىڭ تاريح الدىندا ءجۇزىمىز جارقىن! ءبىزدىڭ تىرەگىمىز - تاۋەلسىزدىك، تىلەگىمىز - تۇراقتىلىق، بىلەگىمىز - بىرلىك!» دەپ اتاپ ءوتتى.
«قازاقستان جاڭا جاھاندىق ناقتى احۋالدا: ءوسىم، رەفورمالار، دامۋ» اتتى جولداۋى - ەلدىگىمىزدىڭ تۇعىرلى ماڭگىلىك ەل بولۋعا باستايتىن جاسامپاز قۇجات.
ءار پەندەنىڭ جىل قۇسىنداي كەلەتىن جاڭا جىلدان جاقسى ءۇمىت كۇتەتىنى بەلگىلى. ەندەشە، تورىمىزگە ەنگەلى تۇرعان 2016-جىل بۇكىل قازاقستاندىقتارمەن بىرگە قاسيەتتى جايىق ەلى ءۇشىن دە ەرەكشە جىل بولادى دەگەن سەنىمدەمىز. ويتكەنى، بۇل جىل ۇلى باستامالاردىڭ جاڭا بيىگىنە شىعار كەزەكتى ساتىسى بولماق.
جاڭا جىلدى قاشان دا الداعى ۋاقىت كوشىنەن قۋانىش، جاقسىلىق، جاعىمدى جاڭالىق كۇتەتىن، وتكەن ءومىر جولىمىزعا ەسەپ بەرەتىن، كەلەشەك باعىت-باعدارىمىز بەن ماقسات-مىندەتتەرىمىزدى بەلگىلەيتىن ءۇمىت، سەنىم مەرەكەسى رەتىندە كۇتەمىز.
بارشاڭىزدى جاڭا جىل مەرەكەسىمەن شىن جۇرەكتەن قۇتتىقتايمىن! ءارقايسىسىڭىزعا باق-بەرەكە، حالقىمىزعا - يگىلىك، مەملەكەتىمىزگە - مولشىلىق، ءار شاڭىراققا - باقىت پەن شاتتىق تىلەيمىن!» دەلىنگەن قۇتتىقتاۋدا.
اۆتور: ەلجان ەرالى
