قانات يسلامنىڭ قاسيەتى - قاراپايىمدىلىق

استانا. قازاقپارات - اڭساعان ارمانىڭا جەتۋ ءۇشىن، ۇزاق جول ءجۇرۋ كەرەك. ۇزاق جول العاشقى قادامنان باستالادى. قانات يسلام بوكستاعى قادامىن بەيجىڭنەن باستاپ ەدى.

ودان ءوزىنىڭ اڭساعان اتامەكەنىنە كەلدى. قاسيەتتى مەكەنىندە دە اتوي سالىپ، سايىستاردا قانجىعاسى مايلانىپ ءجۇردى. ءبىر كۇنى ءبىر بەرگەن سۇحباتىن كورىپ قالدىم. كوزىنە جاس الدى.

بولعان وقيعانى ايتىپ، وزگە ەلدە، كوزبەن كورگەن ادىلەتسىزدىگىنە شىن جىلادى. ول ناعىز جىگىتتىڭ كوز جاسى ەدى. ەلگە كەلگەندە دە، ودان سوراقىسىن كوردى. اعايىننىڭ ازارى بار دا، بەزەرى جوق باۋىرىم. كەيدە الا تايداي الالايتىن دا ءوز قازاعىڭ. كوبىنە كەشتەۋ قادىرىڭدى ءبىلىپ، ىستىق قۇشاعىنا الىپ، باعالايتىن دا ءوز حالقىڭ.

ول قازاقتىڭ قاسيەتى. نامىسشىل ازامات بەلىن بەكەم بۋىپ، بۇگىندە ايدىن اسىپ امەريكادا اتوي سالىپ قازاقتىڭ كوكبايراعىن جەلبىرەتىپ ءجۇر.

وتە قاراپايىم. تەگىنىڭ يسلام بولعانىنان ەمەس، جۇرەگىندە يمان بولعاننان. كەۋدەسىن ۇرىپ مەن، مەن ەدىم دەپ جۇرگەن جوق. قانشا قاراپايىم بولعان سايىن، حالقى ونى سونشا سۇيەدى. ءبىر ەكى رەت تەلەفونمەن تىلدەستىك. اعالاپ ءىشى باۋىرىڭا كىرىپ تۇر. قانداي كەرەمەت ىنىلىك ىزەت.

مەن ايتىپ وتىرعان قانات يسلام دەگەن قازاقتىڭ بالاسى، مەنىڭ باۋىرىم. مەن باۋىرىمىزدىڭ بوكستەگى بەدەلىن ەمەس، قاراپايىم ومىردەگى قاسيەتىن تىلگە تيەك ەتكىم كەلىپ وتىر. قازاق بالاسىنىڭ قاناتتان ۇيرەنەرى وتە كوپ. قازىر كىمدى كورسەڭ دە، تانىمال بولۋعا قۇمار. ساتىپ العان اتاقتىڭ قاي زاماندا دا قۇنى بولعان ەمەس.

حالىق قاسيەتىڭە قاراپ ءوزى قالاۋى كەرەك. كىم ءبي بولعىسى كەلمەيدى. حالقى قالامايدى دەگەن سودان بولار. مەنىڭ شىن جۇرەگىممەن جاقسى كورەتىن جىگىتتەرىمنىڭ ءبىرى وسى ءىنىم. جاماندار مەن دەپ ايقايلاعان زاماندا، جاقسىلار جاقسىمىن دەپ ايتا المايتىن ۋاقىت. ءبىراق كىمنىڭ شىن جاقسى ەكەنىن حالىق جاقسى بىلەدى. قازاق قاي كەزدە دە ازاماتىن قابىلەتىنەن گورى، قاسيەتىمەن باعالاعان.

بۇل حالقىمىزدىڭ قاسيەتى. التىندى قۇم جاسىرا المايدى. الماس قىلىش قاپ تۇبىندە جاتپايدى. بۇل قاراپايىم قازاق بالاسى قانات يسلامنىڭ قاسيەتى. جەڭىستى كۇندەرىڭ كوپ بولسىن باۋىرىم.

ماقسات سقاقوۆ،

facebook-تەگى پاراقشاسىنان الىندى