استانادا بەلگىلى تاريحشى، مۇراعاتشى-اۋدارماشى عالىمنىڭ كىتاپتارىنىڭ تۇساۋكەسەرى وتەدى
بۇل تۋرالى ق ر ۇلتتىق مۇراعاتىنىڭ باسپا ءسوز قىزمەتى حابارلادى.
4 تومدىقتىڭ ءبىرىنشىسى - «جارالى جىلدار» دەپ اتالادى. «1916 -جىلعى كوتەرىلىس قازاققا كەرەك پە ەدى؟» - كىتاپتىڭ العاشقى پاراعىنان جارق ەتىپ كوزگە تۇسەر بۇل سۇراق، سول جىلدارداعى تاريحىمىزدىڭ زەرتتەلمەگەن اقتاڭداق بەتتەرى، قانشا ايتسا دا، بارشىلىق ەكەن، دەگەن وي تۋدىرادى. بۇل كىتاپقا 1916 -جىلعى ۇلت- ازاتتىق كوتەرىلىستىڭ بەلگىسىز بولىپ كەلگەن جايتتارى، 1928 -جىلعى كامپەسكە مەن جازىقسىز قۋعىنعا ۇشىراعاندار، 1921-1922، 1932-1933 -جىلدارداعى اشارشىلىق، 1937-1938 -جىلدارداعى ساياسي قۋعىن- سۇرگىنگە ۇشىراعان ۇلت زيالىلارى تاعدىرلارى، 1941-1945 -جىلدارداعى سوعىس تۋرالى قايعىلى وقيعالار سيپاتتالعان. قازاقستان رەسپۋبليكاسى ورتالىق مەملەكەتتىك مۇراعاتى قۇجاتتارىنا نەگىزدەلىپ جازىلعان ماقالالار، اراب تىلىنەن اۋدارىلعان ەستەلىكتەر، قۇجاتتاردىڭ كوشىرمەلەرى بۇل ەڭبەكتەردەگى باياندالعان وقيعالار مەن دەرەكتەردىڭ شىنايىلىعىنا ەش كۇمان كەلتىرتپەيدى.
«اشى ساباقتار» كىتابىن دايارلاۋ كەزىندە اۆتور ماڭعىستاۋ وبلىستىق مۇراعاتىنداعى قۇجاتتارعا سۇيەنەدى. اداي ۋەزىندە 1926-1930 -جىلدارى ۇيىمداستىرىلعان «قوسشى» وداعىنىڭ جۇمىسىن بايانداۋ ارقىلى سول كەزدەگى حالىق ومىرىندەگى اۋىر كەزەڭدى بار شىندىعىمەن اشىپ كورسەتەدى. سونداي-اق، بۇل ەڭبەكتە ماڭعىستاۋ وڭىرىندە وتكەن وقيعالار مەن ونىڭ تاريحي تۇلعالارى تۋرالى جازىلعان ماقالالار مەن قولجازبالار بەرىلگەن.
«اسىل قازىنا» كىتابىنا ەنگەن دەرەكتەر جاڭگىر حان، ىبىراي التىنسارين، اباي سىندى تاريحي تۇلعالاردىڭ ومىرىنەن، قازان توڭكەرىسىنە دەيىن جانە كەڭەس ۇكىمەتىنىڭ العاشقى ورناعان كەزىندەگى ەلىمىزدە شىعىپ تۇرعان ءبىرقاتار گازەت پەن جۋرنالداردان، «يساتاي باتىر» جايىندا باعالى ماعلۇماتتار بەرەدى.
ماڭعىشلاق ءوڭىرىنىڭ 1847-1920 -جىلدارداعى تاريحى جايلى ز. يجانوۆتىڭ - «مانگىشلاك» اتتى جيناعى مۇراعاتتىق قۇجاتتار ارقىلى سىر شەرتەدى. بۇل - ءتورت تومدىق ىشىندەگى ورىس تىلىندە قۇراستىرىلعان جالعىز كىتاپ.
تۇساۋكەسەرگە بەلدى مەملەكەتتىك جانە قوعام قايراتكەرلەرى، ق ر پارلامەنتى دەپۋتاتتارى، تاريحشىلار، مۇراعاتشىلار، زيادا يجانوۆتىڭ تۋعان- تۋىسقاندارى، ب ا ق قىزمەتكەرلەرى، ەلوردا جۇرتشىلىعى قاتىسادى.
