ازاماتتاردىڭ ءوتىنىشى قۇزىرلى ورگانداردى «قىدىرىپ» كەتەتىن جۇيەنى توقتاتۋ كەرەك - ق. سۇلەيمەنوۆ

استانا. قازاقپارات - قازاقستاندا ارىز- شاعىمىن قاتارىنان «نۇر وتان» پارتياسى جانىنداعى جەمقورلىققا قارسى كۇرەس جونىندەگى رەسپۋبليكالىق كەڭەستىڭ ءتوراعاسى قايىربەك سۇلەيمەنوۆ ارىز- شاعىمىنىڭ تاقىرىبىنا 20 ۇيىمنىڭ اتاۋىن، ون شاقتى دەپۋتاتتاردىڭ اتىن تىركەيتىن ازاماتتاردىڭ ءوتىنىشى سوڭىندا قۇزىرلى ورگانداردىڭ، ودان قالسا، دەپۋتاتتاردى ارالاپ كەتەتىنىن اشىق ايتتى.

بۇل ويىن ق. سۇلەيمەنوۆ باس پروكۋراتۋرا جانىنداعى زاڭدىلىقتى قامتاماسىز ەتۋ جونىندەگى قوعامدىق كەڭەس وتىرىسىندا ءمالىم ەتتى.

 «مەن مىنا ءبىر ماسەلەگە نازار اۋدارتقىم كەلىپ وتىر. ازاماتتاردان كوپ ءوتىنىش تۇسەدى، اسىرەسە، پارلامەنتكە. سەبەبى، مەن «نۇر وتان» پارتياسى جانىنداعى جەمقورلىققا قارسى كۇرەس جونىندەگى رەسپۋبليكالىق كەڭەستى ءتوراعالىق ەتەمىن. پرەزيدەنتتىڭ اتىنا، پرەزيدەنت اكىمشىلىگىنىڭ جەتەكشىسى اتىنا، باس پروكۋروردىڭ، ۇلتتىق قاۋىپسىزدىك كوميتەتى ءتوراعاسىنىڭ اتىنا، جوعارعى سوتقا وتە كوپ ارىز-شاعىم كەلەدى. ءبىر ارىزدىڭ تاقىرىبىنا 20 ۇيىمنىڭ اتاۋى جازىلادى. پارلامەنت پالاتالارىنىڭ ءتوراعالارىنا جانە ون شاقتى دەپۋتاتتىڭ اتىنا قاتار ءبىر ارىز كەلەدى. سوسىن سول ارىزعا قاتىستى اركىم وزىنشە ارەكەت ەتەدى.

اسىرەسە، اپپاراتى جوق، ارىز-شاعىمدى قاداعالايتىن جۇيەلى جۇمىسى جوق دەپۋتاتتار جەكە ارەكەت ەتە باستايدى. مىنە، سوسىن ازاماتتىڭ ارىزى قۇزىرلى ورگاندار اراسىندا «قىدىرىپ» كەتەدى. پرەزيدەنت اكىمشىلىگى باس پروكۋراتۋراعا جىبەرەدى، پارلامەنتكە تۇسكەن ارىزدى پالاتا ىشكى ىستەر مينيسترلىگىنە جىبەرەدى، وسىلايشا، ءبىر نەگىزى جوق ارىز- شاعىم ينستانسيالاردى ارالاپ كەتەدى. سوندىقتان ازاماتتاردىڭ ءوتىنىش قابىلداۋ ءۇشىن ناقتى تەتىك كەرەك»، - دەيدى ق. سۇلەيمەنوۆ.

بۇل رەتتە ول ارىز-شاعىمنىڭ جاۋابى دا كوڭىل قاناعاتتاناتىنداي بولمايتىنىن ايتىپ وتىر.

«وسىلايشا، ارىز جازعان ادام قۇزىرلى ورگاننىڭ بارىنەن جاۋاپ الادى، ءبىراق جاۋاپقا قاناعاتتانبايدى، سەبەبى ورگانداردىڭ جىبەرگەن جاۋابى ءبىر-بىرىنە قاراما-قايشى بولىپ جاتادى نەمەسە جاۋاپتى ءبىر-بىرىنە سىلتەيدى»، - دەپ ءتۇسىندىردى ق. سۇلەيمەنوۆ.

اۆتور: كەنجەكەي توقتامۇرات قىزى