ەكى ءتۇرلى اياق كيىم كيمە

استانا. قازاقپارات - قازاق كوكەك قۇسىنا تيىسپەيدى. اڭىز بويىنشا كوكەك ادام ەكەن.

ءبىر جىگىت قايىن جۇرتىنا كۇيەۋ بولىپ كەلىپتى. اياقاستىنان ونىڭ اتى جوعالادى. قالىڭدىقتىڭ ءسىڭلىسى جەزدەسىنىڭ اتىن ىزدەپ شىعادى. بايقاۋسىزدا ءبىر اياعىنا ءوزىنىڭ، ەكىنشى اياعىنا جەزدەسىنىڭ ەتىگىن كيىپ كەتەدى.

اياعىنا ەكى ءتۇرلى كەبىس كيگەندىكتەن، قىز كوكەك قۇسىنا اينالىپ كەتىپتى. كوكەكتىڭ ءبىر اياعى قىزىل، ءبىر اياعى كوك بولاتىنى سودان ەكەن. ات ىزدەپ شىعىپ جوعالعان قىزدان پايدا بولعان كوكەك تە «اتى جوق قۇس» اتالادى. كيەلى قۇس ساناتىنا جاتادى. كوكەك قونعان اعاشتىڭ بۇتاعىن سىندىرىپ الىپ، مايى مول بولادى دەگەن ۇعىممەن ىركىتكە قوسادى ەكەن. وسىعان وراي ەل اراسىندا «ەكى ءتۇرلى ەتىكتى كيمەۋ كەرەك» دەگەن تىيىم پايدا بولىپتى.