قازاقستان مەن قىتاي ۇكىمەت باسشىلارى كەزدەسۋ وتكىزدى
بۇل تۋرالى ق ر پرەمەر-ءمينيسترىنىڭ باسپا ءسوز قىزمەتىنەن حابارلادى.
كەڭەيتىلگەن قۇرامداعى كەلىسسوزدەر بارىسىندا كارىم ءماسىموۆ قىتاي تاراپىنا جىلى قارسى العاندىعى ءۇشىن جانە قازاقستاننىڭ تاۋەلسىزدىگىنىڭ 24 جىلدىعىمەن قۇتتىقتاعانى ءۇشىن العىس ءبىلدىردى.
«ۇستىمىزدەگى جىل جوعارى جانە جوعارعى دەڭگەيدەگى ءوزارا ساپارلارعا تولى بولدى، سونىڭ ارقاسىندا ەكى جاقتى قارىم- قاتىناس ستراتەگيالىق سەرىكتەستىكتىڭ جاڭا كەزەڭىنە شىقتى. ءبىز مەملەكەتتەرىمىزدىڭ اراسىنداعى سەنىم مەن ءوزارا تۇسىنىستىكتىڭ جوعارى دەڭگەيىن باعالايمىز»، - دەدى قازاقستان پرەمەر-ءمينيسترى.
كارىم ءماسىموۆ قازاقستان قىتايدىڭ باستامالارىن - «ءبىر بەلدەۋ، ءبىر جول»، ونىڭ ىشىندە «جىبەك جولىنىڭ ەكونوميكالىق بەلدەۋى» باعدارلاماسىن جۇزەگە اسىرۋدى جان-جاقتى قولدايتىنىن تاعى دا ايتىپ ءوتتى.
ونىڭ پىكىرىنشە، اتالعان يدەيا الەم ەكونوميكاسىنىڭ تۇراقسىزدىعى جاعدايىندا قازاقستاننىڭ «نۇرلى جول» جاڭا ەكونوميكالىق ساياساتىمەن ۇندەس بولىپ وتىر. وسىعان بايلانىستى قوس باعدارلامانىڭ مۇمكىن تۇيىندەسۋى بويىنشا بىرلەسكەن جۇمىس توبى قۇرىلدى.
ءوز كەزەگىندە، لي كىشياڭ قىتاي تاراپىنىڭ مەملەكەتارالىق قاتىناستاردىڭ بارلىق سپەكترى بويىنشا ءوزارا ءتيىمدى سەرىكتەستىكتى ودان ءارى تەرەڭدەتۋگە مۇددەلىلىگىن ءبىلدىردى.
كەلىسسوزدەر قورىتىندىسى بويىنشا ءبىرقاتار قۇجاتتارعا، ونىڭ ىشىندە ۇكىمەت باسشىلارىنىڭ بىرلەسكەن مالىمدەمەسىنە؛ 2015-2020 -جىلدارعا ق ر مەن ق ح ر شەكارا ىنتىماقتاستىعى باعدارلاماسىنا؛ يندۋستريالاندىرۋ جانە ينۆەستيتسيا سالاسىنداعى ىنتىماقتاستىق اياسىندا ىسكەرلىك ماقساتتارداعى ۆيزالار راسىمدەۋ تۋرالى ق ر جانە ق ح ر ۇكىمەتتەرى اراسىنداعى كەلىسىم جوباسىنا؛ قازاقستان- قىتاي شەكاراسىندا «سەنىم» جوباسىن جۇزەگە اسىرۋ تۋرالى ق ر ق م م ك ك مەن ق ح ر ب ك ب اراسىنداعى حاتتاماعا جانە باسقا دا قۇجاتتارعا قول قويىلدى.
