ىستامبۇلدا ءى. ەسەنبەرليننىڭ تۇرىك تىلىنە اۋدارىلعان «كوشپەندىلەر» ءۇش تومدىعىنىڭ تۇساۋكەسەرى ءوتتى
دەپ حابارلايدى ەلشىلىكتىڭ باسپا ءسوز قىزمەتىنەن.
ۇلى دالا ەلىنىڭ تاريحىن باياندايتىن شىعارمانىڭ تۇساۋكەسەرىن وتكىزۋ ماقساتىندا ىستامبۇلدا «تاريحي سانا مەن ادەبيەت» تاقىرىبى بويىنشا كونفەرەنتسيا ۇيىمداستىرىلدى. ءىس- شارا شىعارما اۆتورىنىڭ 100 جىلدىعىن اتاپ وتۋمەن ساباقتاستىرىلدى.
كونفەرەنسيا تۇركياداعى ەڭ ءىرى ىستامبۇل ۋنيۆەرسيتەتىندە وتكىزىلىپ، تۇرىك قوعامدىق جانە اكادەميالىق توپتاردىڭ 100 دەن استام وكىلىنىڭ باسىن قوستى. قاتىسۋشىلاردىڭ اراسىندا تۇركيانىڭ باسقا دا ۋنيۆەرسيتەتتەرىنىڭ پروفەسسورلارى، تانىمال تۇرىك قوعامدىق- ساياسي قايراتكەرلەرى، مادەنيەت وكىلدەرى مەن ستۋدەنتتەر بولدى.
ىستامبۇل ۋنيۆەرسيتەتى جانىنداعى «تۇركيات» ينستيتۋتىنىڭ ديرەكتورى ازمي بىلگىن سويلەگەن سوزىندە قازاقستان پرەزيدەنتى نۇرسۇلتان نازاربايەۆتىڭ قازاق حاندىعىنىڭ 550 جىلدىعىن 2015 - جىلى اتاپ ءوتۋ يدەياسىنىڭ عىلىمي زەرتتەۋلەرگە يتەرمەشى كۇش بولىپ، سونداي- اق تەك قازاقستاندا عانا ەمەس، شەتەلدە دە قوعامدىق رەزونانسقا اكەلىپ سوققانى تۋرالى ايتا كەتتى.
«مەن بۇنى تەك قازاقستان حالقى ءۇشىن عانا ەمەس، جالپى تۇركى الەمى ءۇشىن ەرەكشە ءىس- شارا ەكەن دەپ بىلەمىن. 550 جىلدىق - بۇل تەك وتكەن زامان عانا ەمەس، بۇل ەڭسەرۋدى قاجەت ەتەتىن بولاشاق بەلەس بولىپ تابىلادى. ال قازاقستان ءۇشىن بۇل «ماڭگىلىك ەل» يدەياسىن جۇزەگە اسىرۋعا باعىتتالعان مۇمكىندىك»، - دەدى ا. بىلگىن.
قازاقستان رەسپۋبليكاسىنىڭ تۇركيا رەسپۋبليكاسىنداعى توتەنشە جانە وكىلەتتى ەلشىسى جانسەيىت تۇيمەبايەۆ قازاق جازۋشىسىنىڭ تريلوگياسىن تۇرىك تىلىنە اۋدارۋدا جاردەم كورسەتكەن تاراپتارعا ريزاشىلىعىن بىلدىرە وتىرىپ، 2015 - جىلى قازاقستاندا قازاق حاندىعى قۇرىلۋىنىڭ 550 جىلدىعىن اتاپ ءوتۋ اياسىندا جاسالعان ءىس- شارالار تۋرالى اڭگىمەلەدى.
كونفەرەنسيادا ءسوز سويلەگەن باسقا قاتىسۋشىلار دا تۇركىتىلدەس مەملەكەتتەردىڭ تاريحى مەن مادەني ءداستۇرىن زەرتتەۋ جونىندەگى بىرلەسكەن كۇش- جىگەردىڭ قاجەت ەكەندىگىن اتاپ ءوتتى.
