اقباۋىر اتاۋى تۋرالى اڭىز
بۇل جوبا اياسىندا «بابالار ءسوزى»، «قازاق حاندارى»، «ەجەلگى قالالار تاريحى»، «حالىق قازىناسى» قاتارلى جاڭا ايدارلار اشىلدى.
«بابالار ءسوزى» ايدارى نەگىزىنە «مادەني مۇرا» باعدارلاماسى اياسىندا شىققان 100 تومدىق اۋىز ادەبيەتىنىڭ جىر-تولعاۋلارى، قيسسا-داستاندار، ءسوز ۇستاعان شەشەندەر مەن بيلەرىمىزدەن قالعان ناقىلدار، تاريحي جادىگەرلەر الىندى.
«قازاق حاندارى» ايدارىندا تاريحىمىزدا ەلىنە قورعان بولعان حانداردىڭ ءومىرى تۋرالى دەرەكتەر بەرىلەدى. ال «ەجەلگى قالالار تاريحى» ايدارىنا قازاق دالاسىنداعى وركەنيەتتىڭ ورداسى بولعان كونە قالالاردىڭ تاريحى تۋرالى جازبالار جاريالانادى.
«حالىق قازىناسى» ايدارى بويىنشا، قازاقستانداعى تاريحي، مادەني ەسكەرتكىشتەر، قازاق حالقىنىڭ سالت-داستۇرلەرى، قولونەر، قارۋ-جاراقتارى تۋرالى ماعلۇماتتار بەرىلمەك. جوبا ماتەريالدارى قازاق تىلىندە (قازاقشا جانە توتە جازۋمەن) اگەنتتىك سايتىندا جاريالانادى.
***
اقباۋىر
ءتورت تاۋدىڭ ورتاسىندا ورنالاسقان بۇل جەرگە كەزىندە سىرىم باتىردىڭ ۇرپاقتارى كەلىپ قونىستانعان ەكەن دەيدى.
ال قىزىلتاۋ القابىن قارامەندە ءبي ەلى يەلىك ەتەدى. كەيىن ولار ىعىسىپ، قازىعۇرت تاۋىن مەكەندەيدى. ەل اعاسى قارامەندە اقساقال جاز ايىنىڭ ءبىر جايدارلى كۇنىندە ءوزىنىڭ جاقىن سەرىكتەرىمەن جەر شولۋعا شىعىپ، قىزىلتاۋدىڭ شىعىس جاق القابىنا بيىكتە تۇرىپ كوز جۇگىرتەدى.
الۋان ءتۇرلى جۇپار ءيىستى ءشوبىنىڭ بارىنەن بوي اسىرىپ جەلكىلدەپ تۇرعان اق سەلەۋىنىڭ كورىنىسىنە ءسۇيسىنىپ: «پاي-پاي! مىنا قىزىلتاۋدىڭ باۋىرىنا قاراڭدارشى! سىرتىن ماي باسقان كادىمگى اقباۋىرعا ۇقسايدى. ال مايمەن قىسىپ جەگەن باۋىر كىمگە دە بولماسىن ۇنايدى عوي» دەگەن ەكەن.
سودان باستاپ بۇل جەردى اقباۋىر اتاپ كەتكەن.
