قازاقستاندا قالاي ءمىنسىز كەلىن اتانۋعا بولادى؟

استانا. قازاقپارات - كەلىن مەن ەنە قارىم-قاتىناسى قاشان دا ەل تالقىسىندا جۇرەدى. سەبەبى جاڭا تۇسكەن كەلىنگە قويىلاتىن تالاپتار جەتىپ ارتىلادى.

كەلىنگە قاتىستى كەي وعاش داستۇرلەر ونى العاش ەستىگەندەردى ەسەڭگىرەتىپ تاستاسا، تاڭ قالماڭىز.

تويدان كەيىن تاڭەرتەڭ باسىنا ورامال تاعىپ، شاي بەرۋى ءتيىس دەگەن تالاپتى كەي ارۋلار ورىنسىز دەپ سانايدى.

ءار وتباسى مۇشەسىنە كەسەلەرىن شاتاستىرماي ۇلكەنىنەن باستاپ، كىشىسىنە دەيىن شاي قۇيۋدى قيىن كورەتىندەر كەلىندەرگە قويىلاتىن وزگە تالاپتاردى ەستىسە، ءتىپتى جاعالارىن ۇستارى انىق.

ماسەلەن، توي كەزىندە قالىڭدىق كۇيەۋىنىڭ تۋىسقاندارىن قولىنان ءسۇيىپ، باس ءيۋى كەرەك دەگەن دە تالاپ بار. ال وعان جاۋاپ رەتىندە بولاشاق تۋىستار كورىمدىك بەرەدى.

تاڭعى التىدا تۇرۋ دا قيىن ەمەس. بارلىعى جۇمىسقا بارۋ ءۇشىن وسىنداي ۋاقىتتا تۇرىپ جاتادى. الايدا كەلىننىڭ جالعىز ايىرماشىلىعى - دەمالىس كۇنى دەگەن بولمايدى. اتا-اناسىنىڭ قولىندا ەركەلەپ وسكەن گۇلسىم كۇيەۋگە شىققالى كۇندە ساعات تاڭعى بەستەن ويانادى.

تاڭعى اسقا ءتۇرلى تاماق ازىرلەۋدەن كۇنى باستالاتىن كەلىنشەك وزىنە قويىلعان تالاپتار تۋرالى ايتىپ بەردى.

ول بەشبارماق ازىرلەگەن سايىن بوساعان تاباقتى بارىنە ءيىلىپ الۋى ءتيىس. ودان كەيىن داستارحان باسىنداعىلارعا كەرى بۇرىلماي، ارتقا قاراي ءجۇرىپ، شىعىپ كەتۋى كەرەك ەكەن.

تاعى ءبىر ءداستۇر - كەلىنگە قايىن جۇرتىن ءوز ەسىمدەرىمەن اتاۋعا تىيىم سالۋ. ول ءارقايسىسىنا ءوزى قۇرمەتپەن ەسىم ويلاپ تابۋى ءتيىس.

ەڭ وعاش ءداستۇر - ەنەسى مەن قايىن اتاسىنىڭ اياعىن جۋۋ. كۇيەۋىنىڭ تۋىستارىنا سىيلاستىعىن كورسەتۋى ءۇشىن كەلىنگە سونداي تالاپ تا قويىلىپ جاتادى. دەگەنمەن بۇل تالاپ ەلىمىزدە كوپ كەزدەسە بەرمەيدى. تەك وڭتۇستىك قازاستانداعى كەي وڭىرلەردە عانا كورىنىس تابادى.

تاعى ءبىر ەسكىرگەن ءداستۇر - امەڭگەرلىك. جەسىر قالعان ايەلدى كۇيەۋىنىڭ اعاسى وزىنە قالىڭدىق ەتىپ الادى. بۇل تەك ايەلدىڭ كەلىسىمىمەن عانا جۇزەگە اسىرىلعان. بۇعان باستى سەبەپ - بالالاردىڭ اكەسىز وسپەۋىن قامتاماسىز ەتۋ بولاتىن.

تۇڭعىش بالانى اجەسىنىڭ، اتاسىنىڭ باۋىرىنا باسۋ - كەلەسى ەسكى داستۇرلەردىڭ ءبىرى. اتا-اجەسىنە بالاسىن تابىستاۋدى تاريحشىلار كوشپەندى زاماننان تۋىنداعان ءداستۇر دەپ سانايدى. ول كەزدە جاستايىنان وتباسىلى بولعاندار بالا تاربيەسىن ۇلكەندەرگە تابىستاعاندى ءجون ساناعان.

ال بۇگىندە بۇل ءداستۇر كوبىنە جۇمىس باستى وتباسىلاردا قولدانىلىپ جاتادى.

Nur.kz