قازاقستان ەستراداسىنىڭ تانىمال جۇلدىزدارى ءبىر كۇنگە ماماندىقتارىن وزگەرتتى - فوتو

استانا. قازاقپارات - ق ر ۇلتتىق مۋزەيى «جاسىل گيد» اتتى ەرەكشە شارانى ۇيىمداستىردى. قازاقستان ەستراداسىنىڭ تانىمال جۇلدىزدارى ءبىر كۇنگە مۋزەيدە ەكسكۋرسيا جۇرگىزۋشىسى قىزمەتشىسى اتانىپ، كەلگەن قوناقتار مەن مەيمانداردى ەكسپوناتتارمەن تانىستىرىپ كوردى.

«ءبىز بۇنداي قىزىقتى شارانى العاش رەت جاساپ وتىرمىز جانە ق ر تۇڭعىش پرەزيدەنتى كۇنىنە وراي ۇيىمداستىرعان بولاتىنبىز. ءبىزدىڭ ەلدىڭ ەڭ ايگىلى ادامدارى سىزدەردى مۋزەيدەگى قۇندى تاريحي جادىگەرلەرمەن جانە ءبىزدىڭ ۇلتتىق مۇرامىزبەن تانىستىرعالى كەلىپ وتىر»، - دەيدى مۋزەي ديرەكتورى دارحان مىڭباي.

مۋزەيدە ەكسكۋرسيا جۇرگىزۋشىلەرىنىڭ ورنىنا بۇگىن كەلگەن قوناقتارعا قاراقات ءابىلدينا، قۇرماش ماحانوۆ، قالقامان سارين، كلارا تولەنبايەۆا، مارجان اراپبايەۆا، دوسىمجان تاڭاتاروۆ، گۇلنۇر ورازىمبەتوۆا قىزمەت جاسادى.

قاراقات ءابىلدينا ءوز جۇمىسىن التىن بۇيىمدار زالىندا وتكىزسە، مارجان اراپبايەۆا مەيمانداردى قازىرگى زامان ونەرىمەن تانىستىردى. كلارا تولەنبايەۆا كەلۋشىلەرگە تاۋەلسىزدىك زالىنداعى زاتتاردى كورسەتكەن بولسا، دوسىمجان تاڭاتاروۆ ەتنوگرافيا زالىن ارالاتتى. قۇرماش ماحانوۆ پەن قالقامان سارين كەلۋشىلەرگە تاريحي جادىگەرلەردى كورسەتتى. ال گۇلنار ورازىمبەتوۆا استانا زالىندا قازاقستان استاناسىنىڭ تاريحىنا قاتىستى دەرەكتەردى باياندادى.

شارا 18:00 دە قازاقستان ەكستراداسى جۇلدىزدارىنىڭ كونسەرتىنە ۇلاسپاق.