استانادا ءا. نازاربايەۆقا بەرىلگەن شەتەل مەملەكەتتەرىنىڭ جوعارى ناگرادالار كورمەسى اشىلدى
كوپشىلىك نازارىنا العاش رەت قازاقستان رەسپۋبليكاسىنىڭ پرەزيدەنتى ن. ءا. نازاربايەۆقا بەرىلگەن شەت مەملەكەتتەردىڭ 39 جوعارى ناگرادالارى ۇسىنىلدى.
كوللەكتسيادا ۇلىبريتانيا، جاپونيا، رەسەي، ۆاتيكان، فرانسيا، اۋعانستان، قىتاي جانە باسقا دا ەلدەردەن بەرىلگەن ناگرادالار قويىلعان. كورمەنى ەلباسى كىتاپحاناسىنىڭ اتقارۋشى ديرەكتورى بەيسەمباي جۇمابەكوۆ اشتى.
«كورمە قازاقستان رەسپۋبليكاسىنىڭ تۇڭعىش پرەزيدەنتى كۇنىنە ارنالىپ اشىلدى. بۇل ناگرادالار ءبىزدىڭ مەملەكەت باسشىسىمىزدىڭ الەم قاۋىمداستىعىنىڭ مويىنداعانىنىڭ بەلگىسى بولىپ تابىلادى. بۇگىنگى كۇنگە نۇرسۇلتان ءابىش ۇلى نازاربايەۆقا 39 شەتەل ناگراداسى بەرىلگەن. بۇل ەلدەر ونى ليدەر رەتىندە، قازاقستاندى كۇشتى ەل رەتىندە مويىندادى دەۋگە بولادى»، - دەدى ەلباسى كىتاپحاناسىنىڭ اتقارۋشى ديرەكتورى بەيسەمباي جۇمابەكوۆ كورمەنىڭ اشىلۋىندا.
سالتاناتتى اشىلۋ راسىمىنە قاتىسقان قازاقستان رەسپۋبليكاسى ۇلتتىق مۋزەيىنىڭ ديرەكتورى دارحان مىڭباي كورمەنىڭ ەرەكشەلىگىنە توقتالدى:
- بۇگىنگى كورمەنىڭ بىرەگەيلىگى سول، مۇندا قويىلعان ءار مەدالدىڭ، ءار وردەننىڭ وزىندىك تاريحى بار. ءار ناگرادا - بۇل ءبىزدىڭ ەلباسىمىزدىڭ ۇلى ەڭبەگى. ءبىزدىڭ پرەزيدەنتىمىز قازاقستاندى بارشا الەمگە تانىتتى. ءبىز ءوز پرەزيدەنتىمىزدى ماقتان ەتۋىمىز كەرەك!
بارشاڭىزدى كەلە جاتقان قازاقستان رەسپۋبليكاسىنىڭ تۇڭعىش پرەزيدەنتى كۇنىمەن قۇتتىقتايمىن! پرەزيدەنت كۇنى - بۇل ەلباسىنىڭ ەلىمىزدىڭ قۇرىلىسى مەن وركەندەۋ جولىنداعى ەڭبەگى ءۇشىن كورسەتىلگەن قۇرمەت بولىپ تابىلادى.
شاراعا سونداي- اق، جازۋشى اكىم تارازي، «نازاربايەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ باسقارما ءتورايىمى كۇلاش شامشادينوۆا، ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورلارى مەن وقىتۋشىلارى، قازاق تەحنولوگيا جانە بيزنەس ۋنيۆەرسيتەتىنىڭ، قازاقستانداعى ەلشىلىكتەردىڭ وكىلدەرى، ساياسات جانە قوعامدىق قايراتكەرلەر قاتىستى.
سونداي- اق، 26 -قاراشادا «قازاقستاندا پرەزيدەنتتىك ينستيتۋتتىڭ قالىپتاسۋى مەن دامۋى» اتتى ينتەراكتيۆتىك كورمە ءوز جۇمىسىن باستادى.
كورمەنىڭ ماقساتى - مۇراعاتتىق قۇجاتتار ارقىلى پرەزيدەنتتىك ينستيتۋتتىڭ قالىپتاسۋىمەن قازاقستان رەسپۋبليكاسىنىڭ تاۋەلسىزدىگىنىڭ نىعايۋنىڭ نەگىزگى كەزەڭدەرىن كورسەتۋ. كورمە ءبىرىنشى قاباتتا اتريۋمداعى ۇلكەن ەكراندا كورسەتىلەدى. كورمە 2016 -جىلدىڭ 15 -قاراشاسىنا دەيىن جالعاسادى.
