جول-كولىك وقيعاسىنا كىنالىلەردىڭ جازادان جالتارۋىنا الىپ كەلەتىن كوپتەگەن ولقىلىقتار انىقتالدى - ا. داۋىلبايەۆ
بۇل تۋرالى بۇگىن ق ر باس پروكۋرورى اسحات داۋىلبايەۆ ءمالىم ەتتى.
«سوت تاجىريبەسىن تالداۋ ناتيجەسىندە جول-كولىك وقيعاسىنا كىنالىلەردىڭ جازادان جالتارۋىنا الىپ كەلەتىن كوپتەگەن ولقىلىقتار انىقتالدى. بۇعان ىقپال ەتەتىن نەگىزگى فاكتورلارعا توقتالاتىن بولساق، پوليتسيا قىزمەتكەرلەرى تاراپىنان كەشىكتىرۋ سالدارىنان قۇقىق بۇزۋشىلىق مەرزىمىنىڭ ءوتىپ كەتۋى، قايتالاپ مەديتسينالىق كۋالاندىرۋ جۇرگىزۋ، قاتە مالىمەتتەر ەنگىزۋ سالدارىنان حاتتامانىڭ كۇشىن جويۋ سەكىلدى ماسەلەلەر بار»، - دەدى ول باس پروكۋراتۋرانىڭ القا ماجىلىسىندە.
ونىڭ سوزىنە قاراعاندا، وسى تەكتەس سەبەپتەردەن ءتورت مىڭنان استام اكىمشىلىك ءوندىرىس قىسقارتىلعان. بۇنىڭ سالدارىنان الكوگولدىك ماس كۇيىندە ۇستالعان 600 دەن استام جۇرگىزۋشى ءتيىستى جازادان قۇتىلىپ كەتتى.
مۇنداي ءۇردىس كىنالىلەردىڭ جاساعان بۇزۋشىلىقتارى ءۇشىن جازاسىز قالۋ سەزىمىن قالىپتاستىرۋىمەن قاۋىپتى بولىپ وتىرعانىنا توقتالعان ا. داۋىلبايەۆ، بۇل ءوز كەزەگىندە قۇقىق بۇزۋشىلىقتىڭ قايتالانۋىنا الىپ كەلەتىنىن اتاپ ءوتتى.
اۆتور: رۋسلان عابباسوۆ
