قازاقستاننىڭ باس پروكۋرورى جۇرگىزۋشىلەردى دايارلايتىن وقۋ ورىندارىن سىنعا الدى

استانا. قازاقپارات - جۇرگىزۋشىلەردى وقىتۋ ساپاسىز جۇرگىزىلىپ جاتىر.

بۇل تۋرالى بۇگىن ق ر باس پروكۋرورى اسحات داۋىلبايەۆ ءمالىم ەتتى.

«جىل سايىن جولداعى اپاتتاردىڭ سالدارىنان ەلىمىزدە ءۇش مىڭعا جۋىق ادام كوز جۇمادى، 25 مىڭعا تارتا ادام جاراقات الادى نەمەسە مۇگەدەك بولىپ قالادى. 10 جىلدا جول اپاتتارىنان 34 مىڭعا جۋىق ادام قازا بولدى»، - دەدى ول باس پروكۋراتۋرانىڭ القا ماجىلىسىندە.

وسى ورايدا ا. داۋىلبايەۆ قوعامدىق كولىكتىڭ قاتىسۋىمەن ورىن الاتىن جول-كولىك وقيعالارى قاۋىپتى بولىپ تابىلاتىندىعىن اتاپ ءوتتى.

«وسى سالادا باس پروكۋراتۋرا جۇرگىزگەن تەكسەرىس كۇردەلى پروبلەمالار مەن زاڭ بۇزۋشىلىقتاردى انىقتادى. تەكسەرىسپەن قامتىلعان وقۋ ورىندارىنىڭ تۇگەلىنە جۋىعىندا جۇرگىزۋشىلەردى ساپاسىز وقىتۋ فاكتىلەرى بەلگىلى بولدى. ولاردىڭ كوبىسى بەلگىلەنگەن تالاپتارعا ساي بولماي شىقتى»، - دەدى باس پروكۋرور.

ونىڭ سوزىنە قاراعاندا، وقۋ ورىندارىنىڭ ۇشتەن ءبىر بولىگى، ياعني 552 وقۋ ورنىنىڭ 189 ى وقىتاتىن جەتەكشىلەردىڭ، وقىتۋشىلاردىڭ جانە ماستەرلەردىڭ بىلىكتىلىگىنە ەڭ تومەنگى تالاپتاردى قامتاماسىز ەتپەگەن. ءاربىر جەتىنشىسىندە (75 وقۋ ورنى) قاجەتتى قۇرال- جابدىقتار بولمادى.

اۆتور: رۋسلان عابباسوۆ