ن. نازاربايەۆقا تۇڭعىش پرەزيدەنت - ەلباسى قورىندا جۇزەگە اسىرىلىپ جاتقان جوبالار تانىستىرىلدى

استانا. قازاقپارات - مەملەكەت باسشىسى نۇرسۇلتان نازاربايەۆ الماتىدا تۇڭعىش پرەزيدەنت - ەلباسى قورىنىڭ باسشىلىعىمەن كەزدەستى.

بۇل تۋرالى اقوردانىڭ باسپا ءسوز قىزمەتىنەن حابارلادى.

كەزدەسۋ بارىسىندا ەلباسى قوردىڭ بيىلعى قىزمەتىنىڭ قورىتىندىلارى تۋرالى ەسەپتى تىڭدادى. نۇرسۇلتان نازاربايەۆقا جۇزەگە اسىرىلىپ جاتقان جوبالار مەن مەكەمەنىڭ ورتا مەرزىمگە ارنالعان جوسپارلارى دا تانىستىرىلدى.

قوردىڭ اتقارۋشى ديرەكتورى س. نۇراحانوۆتىڭ ايتۋىنشا، 2015-جىلى ءۇش نەگىزگى باعىت -عىلىمي جانە شىعارماشىل جاستاردى قولداۋ، الەۋمەتتىك باعدارداعى جوبالاردى جۇزەگە اسىرۋ جانە قايىرىمدىلىق شارالارى، سونداي-اق اقپاراتتىق-تالدامالىق قىزمەت باعىتىندا جۇمىس جۇرگىزىلدى.

«قور جىل بويى سىياقىلار، ستيپەنديالار مەن گرانتتار تاپسىرۋ جونىندەگى كونكۋرستىق باعدارلامالاردى عانا جۇزەگە اسىرىپ قويماي، «التىن توبىلعى» جاڭا ادەبي سىيلىعى سياقتى جاڭا باعدارلامالار دا ۇسىندى، ونىڭ ناتيجەلەرى جەلتوقساندا جاريالانادى»، - دەدى س. نۇراحانوۆ.

كەزدەسۋ بارىسىندا ءسوز سويلەگەن الەمدىك ەكونوميكا جانە ساياسات ينستيتۋتىنىڭ ديرەكتورى س. اكىمبەكوۆ بيىلعى قاراشادا نازاربايەۆ ورتالىعىندا وتكەن استانا كلۋبى وتىرىسىنىڭ قورىتىندىلارى تۋرالى باياندادى. بۇل شارادا ءار جىلدارى مەملەكەتتەر مەن ۇكىمەتتەر باسشىلارىنىڭ اكىمشىلىكتەرىندە جۇمىس ىستەگەن، قازىرگى كەزدە ءوز ەلدەرىنىڭ ساياسي ەليتاسىنا كونسۋلتاتيۆتىك قولداۋ كورسەتىپ جۇرگەن الەمدىك زياتكەرلىك ءىرى ورتالىقتاردىڭ ساراپشىلارىنىڭ ءبىر ۇستەلدىڭ باسىنا جينالعانى اتاپ ءوتىلدى.

نىساندا بولۋ بارىسىندا قازاقستان پرەزيدەنتى ەلدىڭ ءتۇرلى ايماقتارىنىڭ قايتالانباس كورىنىستەرى قويىلعان «بەيمالىم قازاقستان» فوتوكورمەسىن ارالاپ كوردى.

 ***

ەسەپتى كەزەڭدە قور 24500-دەن استام ادامدى قامتىعان 46 الەۋمەتتىك، عىلىمي، مادەني ءىس-شارالار وتكىزدى. تاعى 17 ءىس-شارانى جىل اياعىنا دەيىن وتكىزۋ جوسپارلانۋدا.

جىل سايىنعى «الەۋمەتتىك يدەيالار مەن جوبالار» جارمەڭكەسىندە قازاقستان وڭىرلەرىنەن 22 ۇكىمەتتىك ەمەس ۇيىم قوردىڭ قارجىلىق قولداۋىنا يە بولدى. سونىڭ ىشىندە مۇمكىندىگى شەكتەۋلى ادامداردى الەۋمەتتىك بەيىمدەۋگە جانە ساۋىقتىرۋعا، ينكليۋزيۆتى قوعامدى دامىتۋعا، ءتۇرلى ەتنوس وكىلدەرى اراسىنداعى دوستىق، تاتۋلىق جانە كەلىسىمدى نىعايتۋعا، وتباسىنىڭ الەۋمەتتىك ورتاداعى (سوتسيۋمداعى) مارتەبەسى مەن ءرولىن ارتتىرۋعا باعىتتالعان جوبالار جۇزەگە اسىرىلدى.

«مەكتەپكە جول» قايىرىمدىلىق شاراسى اياسىندا تاسقىن سۋدان زارداپ شەككەن وڭىرلەردەن 1000 بالا 1- قىركۇيەكتە وقۋشى سومكەسى مەن مەكتەپكە قاجەتتى قۇرالدار الدى. بالالاردى قورعاۋ كۇنىندە جەتىم جانە اتا-انا قامقورلىعىنسىز قالعان 300 بالاعا سىيلىقتار بەرىلدى. وڭىرلىك ارناۋلى مەكتەپ-ينتەرناتتارداعى مۇمكىندىگى شەكتەۋلى 1300 بالا «امان كەلەشەك» اتتى بالالار مادەني-سپورتتىق فەستيۆالىنە قاتىستى.

قور سونداي-اق شىعارماشىلىق جوبالاردى جۇزەگە اسىرۋعا جانە عىلىمي زەرتتەۋلەر جۇرگىزۋگە 9 گرانت ءبولدى، مادەنيەت پەن عىلىمنىڭ جاس قايراتكەرلەرىنە 20 سىيلىق تاعايىندادى.

قازاقستان قالالارىنىڭ بەلسەندى ءارى تالانتتى 80 ستۋدەنتىنە ءداستۇرلى ستيپەنديالار بەرىلدى.