جاس رەجيسسەر ساكەن جولداس «قازپوشتانىڭ» كومەگىمەن اكە مەن بالا تۋرالى اسەرلى روليك ءتۇسىردى - بەينە
روليك ەندى «قازپوشتا» كومپانياسىنىڭ جارنامالىق ءونىمى بولادى.
نەبارى 2 مينۋت ىشىندە رەجيسسەر شالعايداعى شىعىس قازاقستان وبلىسى اياگوز اۋدانىندا قالعان اكە مەن الماتى قالاسىندا تۇراتىن بالانىڭ ءومىرىن باياندايدى. كەزىندە، اكەسى اشى سۋدىڭ بۋىمەن بالاسىن ۇيدەن قۋىپ شىققان ەكەن.
وسىلايشا، اكەسى مەن ۇلىنىڭ اراسىندا جىلدارعا سوزىلعان ارازدىق ورنايدى. ءبىراق، وتباسىن قۇرعاننان سوڭ، ايەلى ءسابي سىيلاعان سوڭ بالا اكەنىڭ قادىرىن تۇسىنەدى. ال، اۋىلدا قالعان اكە كۇندە پوشتاشى قىزدىڭ جولىن توسىپ، بالاسىنان ءبىر حابار كۇتىپ جۇرەدى. بالاسى نەمەرەسىنىڭ سۋرەتىن، وعان قوسا، الماتىعا پويىز بيلەتىن سالىپ، اكەسىنەن كەشىرىم سۇراپ حات جازادى. وسىلايشا، «قازپوشتا» اكە مەن بالا اراسىن قايتا جالعاعان پوشتانىڭ پايداسىن كورسەتە وتىرىپ، روليكتى «قازپوشتا جاقىنداتادى» دەپ اتاعان.
ال، رەجيسسەر ساكەن جولداس فەيسبۋكتەگى جەكە پاراقشاسىندا بۇل وقيعا ءىشىنارا شىن ومىردەن الىنعانىن جازعان.
«قۇرمەتتى دوستار! جۋىردا قانات بەيسەكەيەۆپەن بىرگە «قازپوشتانىڭ» كومەگىمەن ءىشىنارا شىن ومىردەن الىنعان اكەسى مەن ۇلى اراسىنداعى الەۋمەتتىك وقيعانى تۇسىردىك. ءوز اتىمنان ايتارىم، جاقىندارىڭىزعا ءجيى حات جازىڭىزدار. جالپى، حات جازۋ تۋرالى يدەيا ماعان قاتتى ۇناعان. قاعاز بەن قالام الىپ، حات جازىپ، ماركانى تاڭداپ، ءبىر حابار جىبەرۋ ەرەكشە قۇبىلىس ەمەس پە!؟ ۋاقىتتارىڭىز شىقسا، ەرىنبەي حات جازىڭىزدار! جاقىندارىڭىز ءبىر قۋانىپ قالادى»، - دەگەن رەجيسسەر قازپوشتا قازاقستاننىڭ بارلىق ەلدى مەكەنىندە جۇمىس ىستەيتىنىن ەسكە سالعان.
جالپى، Youtube-تاعى «قازپوشتا جاقىنداتادى» دەگەن روليكتى ەكى كۇندە بەس مىڭعا جۋىق ادام كورىپ، ءوز باعاسىن بەرگەن.
اۆتور: كەنجەكەي توقتامۇرات قىزى
