امانجان ەڭسەباي ۇلى: اتاقتى ديكتور بايجانبايەۆتىڭ بەينەسى ساقتالعان ءبىر فيلم جوق
كەزدەسۋ اشىق اڭگىمە سيپاتىندا ءوتىپ، ستۋدەنتتەر كوكەيتەستى ساۋالدارىن دا قويىپ، بەلسەندىلىك تانىتتى.
قازاق راديوسىندا 1972 -جىلدان باستاۋ العان ەڭبەك جولىندا باسىنان كەشكەن وقيعالارىن اڭگىمەلەي كەلە، امانجان ەڭسەباي ۇلى قازاقتىڭ اتاقتى ديكتورى انۋاربەك بايجانبايەۆتىڭ ادامگەرشىلىگىن، ديكتورلىق شەبەرلىگىن، تۋما دارىنى تۋرالى اڭگىمەلەدى، ءوزى كۋا بولعان ءارى ەرەكشە اسەر ەتكەن وقيعالاردىڭ ءبىرازىن مىسالعا كەلتىردى.
- بايجانبايەۆتى كوپ ايتاتىنىم - ونى جاقسى كورەتىنىمنەن. ول مەنىڭ ومىرىمدە وشپەس ءىز قالدىردى. سوندىقتان ول تۋرالى ايتۋدان ەش جالىقپايمىن» دەگەن امانجان اعاي تاريحي تۇلعانىڭ تەك تابيعي تالانتىنا عانا باس يەتىنىن ەمەس، سونىمەن قاتار ءارقاشان ۇساق ارەكەتتەرىمەن-اق ۇلگى بولاتىن ۇستازدىق ۇلاعاتىنا دا تامساناتىنىن ايتىپ قالدى. الايدا كۇللى قازاق توپىراعىنا ەسىمى تانىلعان، داۋىسى زور ەستىلگەن انۋاربەك بايجانبايەۆتىڭ بەينەسى ساقتالعان ءبىر فيلم جوقتىعىن ەسكە سالىپ، وكىنىشىمەن ءبولىستى...
كەزدەسۋ بارىسىندا راديونىڭ قىر-سىرىمەن جەتە تانىسقىسى كەلگەن جاس جۋرناليستەر سۇراقتار قويىپ، اڭگىمەنى ديكتورلىق شەبەرلىك تاقىرىبىنا قاراي باعىتتادى. التىن داۋىستى ديكتور مامبەت سەرجانوۆتىڭ: «ديكتورلىق - ەڭ جاۋاپتى ءىس. بۇكىل راديو ۇجىمىنىڭ: دىبىس رەجيسسەرى، مونتاجەر، كوررەكتور، رەداكتوردىڭ قولىنان وتكەن ماتەريالدىڭ نۇكتەسىن قوياتىن - ديرەكتور ەمەس، وسى ديكتور» دەگەنىن ايتا كەلە، ءماتىن وقىعاندا سوزدەردىڭ استارىندا نە جاتقانىن ءتۇسىنىپ، كوكەيگە ءتۇيۋ كەرەك» دەپ ديكتور بولۋعا تالپىنىپ جۇرگەن تۇلەكتەرگە قاجەت كەڭەستەرىن ايتتى. جاڭالىقتى وقۋ مەن ادەبي ماتەريال وقۋدىڭ ايىرماشىلىعى بارىن، ءارقايسىسىنىڭ ءوز تالاپتارى بارىن كورسەتتى.
سونىمەن قاتار امانجان ەڭسەباي ۇلى ديكتور بويىنان اكتەرلىك ونەردىڭ دە تابىلۋ كەرەكتىگىن العا تارتتى.
- اسىرەسە، وتە ايانىشتى وقيعالارعا ۇلاسقان، جۇرەگىڭدى شىمىرلاتىپ جىبەرەتىن ءماتىن وقىعاندا سەزىمگە بەرىلىپ كەتپەي، جاسقا ەرىك بەرمەي، داۋىسى دىرىلدەمەي وقي ءبىلۋ دە - ديكتوردىڭ سەگىز قىرلى ونەرىنىڭ بىرىنە جاتادى، - دەدى قازاقستاننىڭ ەڭبەگى سىڭگەن مادەنيەت قايراتكەرى، قازاق راديوسىنىڭ ارداگەرى امانجان ەڭسەباي ۇلى.
كەزدەسۋ بارىسىندا ستۋدەنتتەردى جانىنا شاقىرىپ، ءماتىن وقىتىپ، ءوزى دە جاستارعا ءماتىندى قالاي وقۋ كەرەكتىگىن ءتۇسىندىردى. راديو ارداگەرىنىڭ ءماتىن وقىعانداعى زور داۋىسىنا، ورىندى قويىلعان ديكسياسىنا تاڭ-تاماشا بولعان ستۋدەنتتەر ەڭبەك ارداگەرىنە ۇلكەن قۇرمەت كورسەتتى.
ايدانا جوراباي
«ايقىن-اقپارات»
