ەلباسى الماتى وبلىسىنىڭ ينۆەستيتسيالىق تارتىمدىلىعىن دامىتۋدى تاپسىردى

استانا. قازاقپارات - مەملەكەت باسشىسى نۇرسۇلتان نازاربايەۆ جۇمىس ساپارى اياسىندا الماتى وبلىسىنىڭ اكىمى اماندىق باتالوۆتى قابىلدادى.

بۇل تۋرالى اقوردانىڭ باسپا ءسوز قىزمەتى حابارلادى.

كەزدەسۋ بارىسىندا مەملەكەت باسشىسى ءوڭىر ەكونوميكاسىن تۇراقتاندىرۋدى جالعاستىرۋدىڭ، مەملەكەتتىك باعدارلامالاردى ورىنداۋدىڭ، سونداي- اق جۇمىسپەن قامتىلۋدى ۇلعايتۋ جانە حالىقتىڭ ءال- اۋقاتىن جاقسارتۋ ماقساتىندا داعدارىسقا قارسى شارالاردى جۇزەگە اسىرۋدىڭ ماڭىزدىلىعىن اتاپ ءوتتى.

سونىمەن قاتار قازاقستان پرەزيدەنتى وبلىستىڭ ينۆەستيتسيالىق تارتىمدىلىعىن دامىتۋ، شاعىن جانە ورتا بيزنەس سۋبەكتىلەرىن قولداۋ جونىندەگى مىندەتتەردى ورىنداۋدى جالعاستىرا بەرۋدى تاپسىردى.

الماتى وبلىسىنىڭ اكىمى ءوز سوزىندە نۇرسۇلتان نازاربايەۆقا ءوڭىردىڭ نەگىزگى الەۋمەتتىك- ەكونوميكالىق دامۋ كورسەتكىشتەرى مەن الداعى كەزەڭگە ارنالعان جوسپارلار تۋرالى باياندادى.

ا. باتالوۆ وبلىستى دامىتۋدىڭ نەگىزگى باعدارلامالىق قۇجاتى وسى ماقساتتا ارنايى ازىرلەنگەن، ون التى باعىتتى قامتيتىن جوسپار بولعانىن اتاپ ءوتتى.

«ءسىزدىڭ تاپسىرماڭىزعا سايكەس، ەكونوميكاعا ينۆەستيتسيا تارتۋ، جاڭا جۇمىس ورىندارىن اشۋ، حالىقتىڭ جۇمىسپەن قامتىلۋىن قامتاماسىز ەتۋ ماقساتىندا ناقتى جۇمىس باعىتى ايقىندالدى. سونىمەن قاتار، اۋىل شارۋاشىلىعىن، شاعىن جانە ورتا بيزنەستى دامىتۋ جۇمىستارى جۇرگىزىلۋدە. جالپى، بيىل وبلىس ەكونوميكاسى بارلىق كورسەتكىشتەر بويىنشا قارقىندى دامىدى. اتاپ ايتقاندا، وتكەن جىلدىڭ وسى كەزەڭىمەن سالىستىرعاندا ونەركاسىپ، اۋىل شارۋاشىلىعى، ينۆەستيتسيا سالالارىندا ءوسىم بايقالىپ وتىر»، - دەدى الماتى وبلىسىنىڭ اكىمى.

مەملەكەت باسشىسى كەزدەسۋ قورىتىندىسى بويىنشا ءبىرقاتار ناقتى تاپسىرما بەردى.

 ***

دامىتۋ جونىندەگى جوسپاردا قاراستىرىلعان شارالاردى جۇزەگە اسىرۋ ناتيجەسىندە الماتى وبلىسى ەكونوميكادا وسىمگە قول جەتكىزىلدى. بيۋدجەت تۇسىمدەرى 102 پايىزعا قامتاماسىز ەتىلدى، دوتاتسيالار كولەمى 15 پايىزعا قىسقاردى.

جەر ماسەلەلەرىن رەتتەۋ ماقساتىندا كەشەندى جەر كارتاسى ازىرلەندى. ءتورت اۋداندا پيلوتتىق نەگىزدە يرريگاتسيالىق جەلىلەردى قايتا جوندەۋ جۇمىستارى باستالدى، بالقاش كولى مەن ىلە وزەنىنىڭ سايازدانىپ كەتۋىنە بايلانىستى ماسەلەلەر شەشىلۋدە.

اۋىل شارۋاشىلىعىنداعى قانت قىزىلشاسى ەگىستىگى 4020 گەكتارعا دەيىن ۇلعايدى، كوكسۋ قانت زاۋىتى ىسكە قوسىلدى. مال شارۋاشىلىعىندا «سىباعا»، «قۇلان»، «التىن اسىق» باعدارلامالارى اياسىندا اسىل تۇقىمدى مال باسى كوبەيىپ كەلەدى، «ىرىس» باعدارلاماسى بويىنشا 50-100 باس مالى بار وتباسىلىق تاۋارلى- ءسۇت فەرمالارىن قۇرۋ ءىسى ىنتالاندىرىلۋدا.

شاعىن جانە ورتا بيزنەستى دامىتۋ جونىندەگى قولدانىستاعى باعدارلاما اياسىندا 360 كومپانيا قارجىلىق قولداۋعا يە بولدى. 100 ميلليارد تەڭگەدەن استام ينۆەستيتسيا تارتىلدى. اۋدانداردىڭ دامۋىنداعى اركەلكىلىكتى ازايتۋ ماقساتىندا 11 ونەركاسىپ الاڭى قۇرىلىپ، ەكونوميكالىق ءوسىمنىڭ جاڭا وشاقتارى قالىپتاسۋدا.

الاكول جانە بالقاش كولدەرىنىڭ جاعالاۋىن دامىتۋ ءۇشىن ەلەكتر جەلىسى تارتىلىپ، اۆتوكولىك جولدارى جوندەلۋدە. تەمىرجول قاتىناسى ۇيىمداستىرىلدى، ەندى اۋە قاتىناسىن اشۋ دا جوسپارلانىپ وتىر.

ءبىلىم بەرۋ سالاسىندا اپاتتى جاعدايداعى مەكتەپتەردى جويۋ جۇمىستارى جۇزەگە اسىرىلۋدا. 2018 - جىلعا دەيىن ءۇش اۋىسىممەن وقىتۋ تولىعىمەن جويىلادى. بيىل جەكە مەنشىك ينۆەستيتسيالار ەسەبىنەن 83 بالاباقشا اشۋ جوسپارلانۋدا. سونىڭ ناتيجەسىندە بالالاردى مەكتەپكە دەيىنگى ءبىلىم بەرۋ مەكەمەلەرى قىزمەتىمەن قامتۋ دەڭگەيى 77 پايىزعا جەتەتىن بولادى.