استانادا سالىناتىن بوتانيكالىق باق جىلىنا ميلليوننان استام قوناقتى قابىلداي الادى
بۇل تۋرالى «قازاقپارات» ءتىلشىسىنىڭ رەسمي ساۋالىنا جاۋاپ بەرە وتىرىپ، ەلوردا اكىمدىگىنە قاراستى كوممۋنالدىق شارۋاشىلىق باسقارماسى حابارلادى.
«استانا قالاسىندا سالىناتىن بوتانيكالىق باق قۇرىلىسىنا تاپسىرىس بەرگەن «استانا قالاسىنىڭ كوممۋنالدىق شارۋاشىلىق باسقارماسى»، مەملەكەتتىك مەكەمەسى. جالپى، باقتىڭ قۇرىلىس جوباسى 3 كەزەڭگە بولىنگەن. 2013 -جىلى ءبىرىنشى كەزەڭنىڭ قۇرىلىسى باستالدى. باس مەردىگەر - «استانا» كوگالداندىرۋ قۇرىلىسى» ا ق.
وسى جىلدىڭ قىركۇيەگىندە 2-كەزەڭنىڭ قۇرىلىس ساراپتامالىق قورىتىندىسى دايىندالىپ، قازىر مەردىگەر ۇيىمدى انىقتاۋ ءۇشىن مەملەكەتتىك ساتىپ الۋ كونكۋرسىن جاريالاۋ جۇمىستارى جۇرگىزىلىپ جاتىر. جىل سوڭىنا دەيىن 3-كەزەڭنىڭ ساراپتامالىق قورىتىندىسى دايىن بولادى»، - دەپ حابارلاعان اكىمدىكتىڭ باسپا ءسوز قىزمەتى.
جالپى، قارجى ۋاقىتىندا بولىنسە، بوتانيكالىق باقتىڭ قۇرىلىسى 2013-2017 -جىلدار ارالىعىندا اياقتالادى دەپ جوسپارلانعان.
ساياباق ورنالاساتىن اۋماقتى اتار بولساق، بوتانيكالىق باق - ەلوردانىڭ ەسىل اۋدانىندا، ەسىل وزەنىنىڭ سول جاعالاۋىندا، قابانباي باتىر داڭعىلى- تۇركىستان-24 جانە 26- كوشەلەر اۋماعىندا ورنالاساتىن بولادى. بوتانيكالىق باق جىلىنا 1 ميلليون 250 مىڭ قوناقتى قابىلداي الادى. «بوتانيكالىق باق سالىنعان سوڭ 203 ادامدى تۇراقتى جۇمىسپەن قامتيدى، كۇنىنە 8 ساعات جۇمىس ىستەيدى»، - دەپ حابارلانعان اكىمدىكتىڭ جاۋابىندا.
اۆتور: كەنجەكەي توقتامۇرات قىزى
