مەملەكەتتىك رامىزدەر ەلىمىزدىڭ ەگەمەندىگىنىڭ بەرىك نەگىزى

استانا. قازاقپارات - كەز كەلگەن مەملەكەتتىڭ ەگەمەندىگى مەن ءبىرتۇتاستىعىن بەينەلەيتىن، ونىڭ اجىراعىسىز اتريبۋتتارىنىڭ ءبىرى مەملەكەتتىك رامىزدەر بولىپ سانالادى.

ال ەلىمىزدىڭ رامىزدەرى مەملەكەتتىك تۋىمىز، مەملەكەتتىك ەلتاڭبامىز جانە مەملەكەتتىك ءانۇرانىمىز. ولار تاۋەلسىز قازاق ەلىنىڭ مەملەكەتتىگىنىڭ، ەگەمەندىگىنىڭ بەرىك نەگىزى دەسەك بولادى. بۇگىنگى كۇنى ەلىمىزدە 4 -ماۋسىم كۇنى مەملەكەتتىك رامىزدەر كۇنى رەتىندە مەرەكەلەنەدى. ويتكەنى، «قازاقستان رەسپۋبليكاسىنىڭ مەملەكەتتىك رامىزدەرى تۋرالى» كونستيتۋتسيالىق زاڭ 2007 -جىلى ءدال وسى كۇنى قابىلدانعان ەدى.

قازاقستان تاۋەلسىزدىك العان سوناۋ 1991 -جىلدىڭ وزىندە-اق بىردەن مەملەكەتتىك رامىزدەردى دايىنداۋ ءىسىن قولعا الىنىپ، ءبىر جىلدان كەيىن ق ر- نىڭ جاڭا مەملەكەتتىك رامىزدەرىن دايىنداۋ جونىندەگى جۇمىس توبىن قۇرۋ تۋرالى جوعارعى كەڭەس ءتورالقاسىنىڭ ارنايى قاۋلىسى جارىق كوردى.

سوعان سايكەس كوميسسيا قۇرىلىپ، ونىڭ قۇرامىنا ەلىمىزگە ەسىمى بەلگىلى س. ءابدىلدين، س. زيمانوۆ، س. ءابدىراحمانوۆ، ە. شايمەردەنوۆ سىندى ازاماتتار كىردى. وسىدان كەيىن ەلتاڭبا، تۋ، ءانۇران جوبالارىنا بايقاۋ جاريالانىپ، بۇل ىسكە ەلىمىزدىڭ تالانتتى قىلقالام شەبەرلەرى، سازگەرلەر مەن، اقىندار بەلسەنە قاتىسىپ، ءوز جوبالارىن ۇسىندى. ماسەلەن، مەملەكەتتىك تۋىمىزدىڭ بايقاۋىنا 600 ادام قاتىسىپ، ولار 1200 جوبا، مەملەكەتتىك ەلتاڭبامىزعا 245 جوبا، ال مەملەكەتتىك ءانۇرانىمىزعا 750 جوبا ۇسىنىلعان.

جالپى، ەلىمىزدىڭ مەملەكەتتىك تۋىن دا، ەلتاڭباسىن دا، ءانۇرانىن دا دايىنداۋدا ەلباسىمىز نۇرسۇلتان نازاربايەۆتىڭ ۇلەسى قوماقتى بولعانى ءسوزسىز. مۇنى وسىدان ءبىراز جىل بۇرىن مەملەكەتتىك رامىزدەر جونىندەگى رەسپۋبليكالىق كوميسسيانىڭ مۇشەسى، ق ر تۇڭعىش مەملەكەتتىك رامىزدەرىن ازىرلەۋ جونىندەگى كوميسسيانىڭ جاۋاپتى حاتشىسى قىزمەتىن اتقارعان مارقۇم ەربول شايمەردەن ۇلى «ەگەمەن قازاقستان» گازەتىندە جاريالانعان ماقالاسىندا جازعان بولاتىن. «بىردە پرەزيدەنت اكادەميك سالىق زيمانوۆ باسقارعان تۋ جوبالارىن تالقىلايتىن كىشى جۇمىس توبىنىڭ كەزەكتى وتىرىسىنا كەلدى. ەشكىم دە مۇنى كۇتە قويعان جوق ەدى. توسىن بولدى. ءبارىمىز دە ابدىراپ قالدىق. ءبىراق ءبىرازدان سوڭ-اق جايلانىپ سالا بەردىك. ويتكەنى، ەلباسى جۇمىس توبى مۇشەلەرىمەن بىرگە جوبالاردى تالقىلاۋعا ەمىن-ەركىن ارالاسىپ كەتتى. سول جولى پرەزيدەنت ىقپالىمەن ايقىندالعان ءبىر ماڭىزدى ماسەلە تۋدىڭ تۇسىنە قاتىستى تۇجىرىم ەدى. پرەزيدەنتتىڭ بەلسەندى قاتىسۋىمەن وتكەن بۇل كەڭەستى قازىر تاريحي جيىن دەۋگە دە بولار ەدى. مەملەكەتتىك تۋدىڭ نەگىزگى ەلەمەنتى - ءتۇسى تۋرالى وندا ورتاعا سالىنعان ويلار وسى ورايداعى رەسمي تۇجىرىمدامالىق كوزقاراستىڭ قالىپتاسۋىنا يگى ىقپال ەتتى»، - دەپ جازعان ەدى اۆتور.

سونىمەن، قازاقستان رەسپۋبليكاسىنىڭ مەملەكەتتىك تۋى - ورتاسىندا شۇعىلالى كۇن، ونىڭ استىندا قالىقتاپ ۇشقان قىران بەينەلەنگەن تىك بۇرىشتى كوگىلدىر ءتۇستى ماتا. تۋدىڭ سابىنىڭ تۇسىندا ۇلتتىق ورنەك تىك جولاق تۇرىندە ناقىشتالعان. كۇن، ونىڭ شۇعىلاسى، قىران جانە ۇلتتىق ورنەك بەينەسى التىن تۇستەس. قازاقستان رەسپۋبليكاسى مەملەكەتتىك تۋىنىڭ اۆتورى - قازاقستاننىڭ ەڭبەك سىڭىرگەن ونەر قايراتكەرى شاكەن نيازبەكوۆ.

ەلباسىنىڭ مەملەكەتتىك ەلتاڭبانى ازىرلەۋ ىسىنە دە اتسالىسقانى جوعارى دا اتاپ وتكەن اۆتوردىڭ ماقالاسىندا باياندالعان بولاتىن. وندا اۆتور: «ەلباسى تۇڭعىش تاۋەلسىزدىك رامىزدەرىنىڭ ءتول تاريحي تامىرى تەرەڭنەن بوي تارتۋىن، ۇلتتىق بولمىسى انىق تا ايشىقتى بولۋىن قالادى. ەلتاڭبا جوباسىندا تەرەڭ ماعىنالى، كەزىندە الاش ارداگەرلەرىنىڭ دە نازارى تۇسكەن شاڭىراق بەينەسىنىڭ جاراسىم تاپقانىنا شىن قۋاندى»، - دەپ جازادى.

قازاقستان رەسپۋبليكاسىنىڭ مەملەكەتتىك ەلتاڭباسى - دوڭگەلەك نىساندى جانە كوگىلدىر ءتۇس اياسىنداعى شاڭىراق تۇرىندە بەينەلەنگەن، شاڭىراقتى اينالا كۇن ساۋلەسىندەي تاراپ ۋىقتار شانشىلعان. شاڭىراقتىڭ وڭ جاعى مەن سول جاعىندا اڭىزدارداعى قاناتتى پىراقتار بەينەسى ورنالاستىرىلعان. جوعارعى بولىگىندە - بەس بۇرىشتى كولەمدى جۇلدىز، ال تومەنگى بولىگىندە «قازاقستان» دەگەن جازۋ بار. جۇلدىزدىڭ، شاڭىراقتىڭ، ۋىقتاردىڭ، اڭىزدارداعى قاناتتى پىراقتاردىڭ بەينەسى، سونداي-اق «قازاقستان» دەگەن جازۋ - التىن تۇستەس. قازاقستان رەسپۋبليكاسى مەملەكەتتىك ەلتاڭباسىنىڭ اۆتورلارى - بەلگىلى ساۋلەتشىلەر جانداربەك مالىبەكوۆ پەن شوت-امان ءۋاليحانوۆ.

ەلىمىزدىڭ ءانۇرانى 2 مارتە قابىلداندى. العاشقى ءانۇرانىمىزدىڭ ءسوزىن ت. مولداعاليەۆ، م. الىمبايەۆ، ق. مىرزاليەۆ، ج. دارىبايەۆا جازعان بولاتىن. الايدا 2000 -جىلدارى ەلباسىمىز ءانۇراندى اۋىستىرۋ ماسەلەسىن كوتەرگەن ەدى. ارادا ءبىراز جىلدار وتكەننەن كەيىن، ياعني 2006 -جىلدىڭ 6 -قاڭتارىندا ەلىمىزگە تانىمال «مەنىڭ قازاقستانىم» ءانى مەملەكەت باسشىسى نۇرسۇلتان نازاربايەۆتىڭ باستاماسىمەن قازاقستاننىڭ ءانۇرانى رەتىندە پارلامەنتتە بەكىتىلدى. ءبىرىنشى رەت ول 2006 -جىلى 11 -قاڭتاردا مەملەكەت باسشىسىنىڭ سالتاناتتى ۇلىقتاۋ راسىمىندە ورىندالدى. مۋزىكاسى - كومپوزيتور ءشامشى قالداياقوۆتىكى، ءسوزى - جۇمەكەن ناجىمەدەنوۆ پەن نۇرسۇلتان نازاربايەۆتىكى.

اۆتور: مارلان جيەمباي