اۋعانستان پرەزيدەنتى اشراف گاني رەسمي ساپارمەن قازاقستانعا كەلدى - فوتو
بۇل مۇحاممەد اشراف گانيدىڭ قازاقستانعا العاشقى رەسمي ساپارى بولىپ تابىلادى.
ساپار بارىسىندا اۋعانستان پرەزيدەنتىنىڭ ەلباسى نۇرسۇلتان نازاربايەۆپەن كەزدەسۋى جوسپارلانعان.
ەكى ەل باسشىلارىنىڭ كەلىسسوزدەرى بارىسىندا ايماقتىق قاۋىپسىزدىكتى قامتاماسىز ەتۋ ماسەلەلەرىنە باستى نازار اۋدارىلادى. سونداي- اق، ساۋدا- ەكونوميكالىق، ءبىلىم بەرۋ، كولىك- لوگيستيكالىق سالالارداعى ىنتىماقتاستىق ماسەلەلەرى تالقىلانادى.
اقوردانىڭ فەيسبۋكتەگى رەسمي پاراقشاسىندا قازاقستان مەن اۋعانستاننىڭ ەكىجاقتى قارىم- قاتىناسى تاريحىنا قاتىستى ماڭىزدى 5 مالىمەت جاريالاندى:
1. قازاقستان مەن اۋعانستان اراسىنداعى ديپلوماتيالىق قارىم- قاتىناس رەسمي تۇردە 1992 - جىلعى 12 - اقپاندا ورناتىلدى. ال ون جىلدان سوڭ، ياعني 2002 - جىلى كابۋل قالاسىندا قازاقستان رەسپۋبليكاسىنىڭ ديپلوماتيالىق ميسسياسى اشىلىپ، ءبىر جىلدان كەيىن ول ەلشىلىك بولىپ وزگەرتىلدى.
2. قازاقستان اۋعانستاننىڭ وڭىردەگى نەگىزگى دونورلارىنىڭ ءبىرى رەتىندە اتالعان ەلدەگى الەۋمەتتىك- ەكونوميكالىق جوبالاردى جۇزەگە اسىرۋ ءۇشىن 4 ميلليون دوللار مولشەرىندە قاراجات ءبولدى. سونداي- اق جالپى قۇنى 20 ميلليون دوللار بولاتىن 21 مىڭ توننادان استام ازىق- تۇلىك جەتكىزىلدى.
3. قازاقستان - اۋعانستانعا ازىق- تۇلىك پەن قۇرىلىس ماتەريالدارىن جەتكىزۋ تۇرىندەگى گۋمانيتارلىق كومەك كورسەتىپ قانا قويماي، اۋعان جاستارىن وقىتۋعا دا جاردەمدەسىپ كەلە جاتقان بىردەن- ءبىر ەل. ءبىزدىڭ ەلىمىز 2010 - جىلدان بەرى جالپى قۇنى 50 ميلليون دوللار بولاتىن ارناۋلى ءبىلىم بەرۋ باعدارلاماسىن جۇزەگە اسىرۋدا، ونىڭ اياسىندا قازاقستاننىڭ جوعارى وقۋ ورىندارىندا 1000 عا جۋىق اۋعانستان ازاماتى وقيدى.
4. بىلتىرعى قىركۇيەك ايىندا اۋعانستاننىڭ كوممەرتسيالىق ەمەس ءتۇرلى ۇيىمدارىنىڭ 15 تەن استام وكىلى ازاماتتىق قوعامدى دامىتۋ جونىندە اقپارات، ءبىلىم جانە تاجىريبە الماسۋ ءۇشىن قازاقستانعا كەلدى.
5. ب ر ي ك س ەلدەرى ءسامميتىنىڭ اياسىندا بيىلعى شىلدە ايىندا وتكەن كەزدەسۋ بارىسىندا قازاقستان پرەزيدەنتى نۇرسۇلتان نازاربايەۆقا اۋعانستاننىڭ باسشىسى موحامماد عاني ءوز ەلىنىڭ ەڭ جوعارى ناگراداسىنىڭ ءبىرى - «گازي امانۋللا حان» مەدالىن تاپسىردى. اۋعاندىق بيلەۋشى ءارى اعارتۋشى امانۋللا حان كەزىندە ۇلى بريتانياعا قارسى ازاتتىق كۇرەسىنە باسشىلىق ەتىپ، 1919 - جىلى اۋعانستاننىڭ تولىق تاۋەلسىزدىگىنە قول جەتكىزگەن تۇلعا بولاتىن.
