ارمەنياعا كەلگەن سيريالىق بوسقىندار ورىس ءتىلىن ۇيرەنۋدە
ولار ەڭبەك نارىعىندا تالاپقا ساي ءارى باسەكەلەستىككە توتەپ بەرە الۋ ءۇشىن وسىلاي جاساۋدا ەكەن. ەگىزدەردى قۇشاعىنا قىسىپ تۇرعان سيريادان كەلگەن بوسقىن - سەرا شاگينيان. تۇراقتىلىق، ماتەريالدىق مولشىلىق، ءبارى ارتتا قالدى. مەرەكەلىك كوڭىل-كۇيدە تۇسكەن وتباسىلىق سۋرەتتى كورگەندە، ەرىكسىز كوزىنە جاس كەلەدى. جايلى ءارى كەڭ ۇيلەرى دە بولعان. وتباسىنداعى 4 ادام بۇگىندە 15 شارشى مەتر بولاتىن ءبىر بولمەلى سۋىق ءارى جيھازى جوق پاتەردە تۇرىپ جاتىر. الايدا سەرا «بۇل قيىندىق الەپپوداعى قىرعىن سوعىسقا قاراعاندا تۇككە تۇرمايدى»، - دەيدى.
سەرا شاگينيان، سيريالىق بوسقىن:
- ءبىز سوڭعى مينۋتتارعا دەيىن ول جاقتان كەتكىمىز كەلمەدى. ءتىپتى ءۇيىمىز تونالىپ، قيراپ قالعان كەزدە دە. 4 جىل بويى ۇرەيمەن ءومىر سۇردىك. جان-جاعىمىزدا كۇندە جارىلىس، اتىس-شابىس. تەرروريستەر مەنىڭ اكەمدى تۇتقىنعا الدى، باقىتىمىزعا وراي، ول ءتىرى قالدى. ءبىر كۇنى بالالاردى الىپ ۇيگە كەلە جاتقاندا، كولىگىمە بىرەۋلەر وق جاۋدىردى. وسى كەزدە مەن «ءبارى ءبىتتى، كۇتۋدەن ەش پايدا جوق، باسقا ەلگە كەتۋ كەرەك» دەپ ويلادىم. بالالاردى قۇتقاردىق. ءبىز بەرى قاراي وتەر كەزدە، جۇزدەگەن جارالىلاردى، ءولىپ جاتقان ادامداردى كوردىك. وتە قورقىنىشتى بولدى.
«بەيبىتشىلىك پەن تۇراقتىلىق - ەڭ باستى قۇندىلىق»، - دەيدى سەرا. ونىڭ جۇبايى جۇمىسقا ورنالاستى. سەرانىڭ مۇعالىم بولسام دەگەن جوسپارى بار. دەگەنمەن ونىڭ وزىنە ءبىلىم الۋ كەرەك. اپتاسىنا ەكى رەت ول ورىس ءتىلىن ۇيرەتەتىن كۋرسقا بارىپ ءجۇر. توپتا 9 ادام بار. ولاردىڭ كوبى 2 جىل بۇرىن كەلگەن. بۇگىندە بۇل قالاعا ۇيرەنىپ قالدى. ءتىپتى كەيبىرى كاسىپكەرلىكپەن دە اينالىسىپ ءجۇر. ولار ارميان تىلىنەن وزگە، اراب، تۇرىك، اعىلشىن تىلدەرىن دە بىلەدى. ەندى، مىنە، ەكى اپتانىڭ ىشىندە ورىستىڭ 60 ءسوزىن ۇيرەندى.
جاسمينا ارۋتيۋنيان، ورىس ءتىلىنىڭ مۇعالىمى:
- باعدارلاما وتە جەڭىل. ءبىزدىڭ ماقساتىمىز - سيريادان كەلگەن ارمياندارعا ورىس ءتىلىن ۇيرەتۋ. مەن ولارعا سويلەمدەردىڭ جازىلۋ جانە وقىلۋىن ۇيرەتتىم. ولار سوزدەردى جازىپ، ارميان تىلىنە اۋداردى. وقىپ، جازىپ ۇيرەنۋدە.
پەگي لەپەگيان، سيريالىق بوسقىن: - ءبىلىم الۋىمىز قاجەت. ويتكەنى ءبىز ەندى وسى جەردە تۇرامىز. وسى جەردەن باسقا جاققا بارمايمىز.
ساباق 2 ساعات وتەدى. مۇعالىم جاسمينا ارۋتيۋنيان كۋرستىڭ تىڭداۋشىلارىنان ىنتا مەن زەيىندىلىكتى تالاپ ەتەدى. ويتكەنى 3 ايدان كەيىن ءار وقۋشى ەمتيحان تاپسىرۋى ءتيىس.
