ايدىن ايىمبەتوۆ عارىشتاعى سالماقسىزدىق جاعدايىنداعى اسەرىمەن ءبولىستى

استانا. قازاقپارات - ق ر ۇلتتىق مۇراجايىندا «جۇلدىزدى جولداردىڭ باتىرلارى» تاقىرىبىندا وتكەن دوڭگەلەك ۇستەلدە عارىشكەر ايدىن ايىمبەتوۆ عارىشتا بولعان كەزدەگى اسەرىمەن ءبولىستى.

 «عارىش كەمەسى ءبىرىنشى عارىشتىق جىلدامدىققا شىققان كەزدە، سالماقسىزدىق باستالادى. وسى ساتتە عاجايىپ كورىنىستەرگە كۋا بولاسىزدار، ياعني كەمە ستەريلدى تازارتىلعان بولسا دا شاڭ- توزاڭنىڭ تۇيىرشىكتەرى، ۇساق-تۇيەك زاتتار اۋەدە قالقىپ كەتەدى. وسىنداي ساتتەردە جانە عارىشتاعى باسقا دا كورىنىستەردەن كەيىن ەرەكشە سەزىمگە بولەنەسىڭ»، - دەيدى عارىشكەر.

ونىڭ سوزىنە قاراعاندا، سالماقسىزدىق جاعدايىنا ادام اعزاسى بىرنەشە ساعاتتان كەيىن بەيىمدەلەدى.

«ايتا كەتەر جايت، وسىنداي كەزدە ءوزىڭدى ايتارلىقتاي جاعىمدى سەزىنبەيسىڭ، ياعني اعزانىڭ بەيىمدەلۋ ۇدەرىسى ءجۇرىپ جاتادى. كەمە ءتۇرلى ازىق-تۇلىكتەر، عىلىمي جابدىقتارمەن تولتىرىلعاندىقتان، وندا بوس ورىن تىم از بولادى. عارىشقا ساپارداعى وسى ەكى تاۋلىكتە تارشىلىقتا بولاسىڭ»، - دەپ باياندادى ا. ايىمبەتوۆ.

وسى ورايدا ول حالىقارالىق عارىش ستانساسىنا ۇشىپ كەلگەننەن كەيىن ادام جەڭىلدىكتى سەزىنەتىنىن جەتكىزدى. «وتپەلى ەسىكتەر اشىلۋ كەزىندە ءبىز ستانساعا ۇشىپ كەلدىك. وسى ساتتە ادامنىڭ قولىمەن جاسالعان كەڭ قۇرىلىستى كورىپ ىشتەي ماقتانىش سەزىمىنە بولەنەسىڭ»، - دەيدى عارىشكەر.

ا. ايىمبەتوۆ ستانساداعى ءبىراز ۋاقىتتان كەيىن جەرگە اسىققانىن، ياعني اياعىمەن جەردىڭ كەڭدىگىن سەزىنگىسى كەلگەنىن ايتىپ بەردى.

ەسكە سالا كەتەيىك، قازاقستاندىق عارىشكەر حالىقارالىق عارىش ستانساسىنا 2015 -جىلدىڭ 2 -قىركۇيەگىندە ۇشتى. ول «سويۋز ت م ا-18م» زىمىرانىنىڭ بورت- ينجەنەرى قىزمەتىن اتقاردى. سونىمەن قاتار عارىشتا قازاقستاننىڭ عىلىمي زەرتتەۋلەرىن جۇرگىزگەن بولاتىن.

قازاقستاندىقتىڭ عارىشتا وتكىزگەن ۋاقىتى - 9 تاۋلىك 20 ساعات 13 مينۋت 51 سەكۋند.

عارىش كەڭىستىگىن يگەرۋگە سىڭىرگەن اسا زور ەڭبەگى، عارىشقا ۇشۋ كەزىندە كورسەتكەن باتىرلىعى مەن ەرلىگى ءۇشىن قازاقستان رەسپۋبليكاسىنىڭ عارىشكەرى ايدىن اقان ۇلى ايىمبەتوۆكە «حالىق قاھارمانى» اتاعى بەرىلىپ، ايرىقشا ەرەكشەلىك بەلگىسى - التىن جۇلدىز بەن «وتان» وردەنى تاپسىرىلدى.

اۆتور: رۋسلان عابباسوۆ