ن. نازاربايەۆ: ۇكىمەتتىڭ ءار مۇشەسىنىڭ قىزمەتى ناقتى ناتيجەلەر جانە قوعامعا تيگىزگەن پايداسىمەن باعالاناتىن بولادى

استانا. قازاقپارات - مەملەكەت باسشىسى نۇرسۇلتان نازاربايەۆتىڭ توراعالىعىمەن ۇكىمەتتىڭ كەڭەيتىلگەن وتىرىسى ءوتتى، دەپ حابارلايدى اقوردانىڭ باسپا ءسوز قىزمەتى.

وتىرىستا بيىلعى 10 ايداعى الەۋمەتتىك- ەكونوميكالىق دامۋ، يندۋستريالىق- يننوۆاتسيالىق باعدارلامانى جۇزەگە اسىرۋ، سونداي-اق «سامۇرىق- قازىنا» ۇ ا ق» ا ق- نى ترانفورماتسيالاۋ جونىندەگى تاپسىرمالاردىڭ ورىندالۋىنىڭ قورىتىندىلارى قاراستىرىلدى.

مەملەكەت باسشىسى قالىپتاسقان ەكونوميكالىق جاعدايدا وعان بەيىمدەلۋگە جانە ءارى قاراي دامۋعا قاجەتتى مۇمكىندىكتەردى تابۋ ماڭىزدى ەكەنىن اتاپ ءوتتى.

«بۇگىندە مەملەكەتتىك شىعىستار 1,5 تريلليون تەڭگەگە قىسقاردى جانە ول اۋىرتپالىقسىز جاسالدى. بيۋدجەتتىڭ كىرىس بولىگىندەگى قيىندىقتارعا قاراماستان، مەملەكەت تاراپىنان الەۋمەتتىك كەپىلدىكتەر ۋاقتىلى ورىندالۋدا. بۇل وتە ماڭىزدى»، - دەدى قازاقستان پرەزيدەنتى.

نۇرسۇلتان نازاربايەۆ ۇكىمەت پەن پارلامەنت «100 ناقتى قادام» ۇلت جوسپارى اياسىندا بىرلەسكەن اۋقىمدى جۇمىس اتقارعانىن، ناتيجەسىندە 2016 -جىلدىڭ 1 -قاڭتارىنا دەيىن بارلىق ينستيتۋتسيونالدىق رەفورمالاردى جۇزەگە اسىرۋدىڭ زاڭنامالىق نەگىزى قامتاماسىز ەتىلەتىنىن ايتتى.

مەملەكەت باسشىسى الەمدىك ەكونوميكا ءوسىمىنىڭ باياۋلاۋى نەگىزگى شيكىزات تاۋارلارىنا سۇرانىس پەن باعانىڭ تومەندەۋى جاعدايىندا، سونداي- اق تەڭگەنىڭ ەركىن اينالىم باعامىنا كوشۋگە بايلانىستى داعدارىسقا قارسى جۇيەلى جانە جەدەل شارالار قابىلداۋ قاجەتتىگى تۋىندايتىنىنا نازار اۋداردى.

اتاپ ايتقاندا، قازاقستان پرەزيدەنتى داعدارىس ءوزىنىڭ تەرىس سالدارلارىمەن بىرگە وتاندىق ەكونوميكانى قايتا قۇرىلىمداۋ ءۇشىن، ونىڭ باسەكەلىك قابىلەتىن ارتتىرۋ ءۇشىن جاڭا مۇمكىندىكتەر بەرەتىنىنە توقتالدى.

«ءوزىنىڭ باسەكەگە قابىلەتىن كورسەتكەن كۇشتى كومپانيالار عانا قالاتىن ۋاقىت كەلدى. قالعاندارى كەتۋى ءتيىس، ولاردىڭ ورنىنا زاماناۋي مەنەدجمەنت، جاڭا ماركەتينگتىك ستراتەگيا، جاڭا ماماندار اكەلەتىن جاڭا باسقارۋشىلار كەلەدى. بۇل ۇدەرىستەردىڭ ايقىن رەگلامەنتتەلۋى جانە اشىق زاڭنامالىق نەگىزى بولۋى ءتيىس»، - دەدى مەملەكەت باسشىسى

نۇرسۇلتان نازاربايەۆ پارلامەنت وڭالتۋ جانە بانكروتتىق تۋرالى زاڭناماعا مەنشىك يەسىن اۋىستىرۋ جانە كرەديتوردان قورعاۋ تەتىكتەرىن جاقسارتاتىن تۇزەتۋلەر قابىلداعانىن ايتتى.

«وسى قۇجات ارقىلى كاسىپورىندى قارجىلىق ساۋىقتىرۋ ماقساتىندا قارىزدى قايتا قۇرىلىمداۋ ماسەلەسىن قارىزگەر مەن قارىز بەرۋشى بىرلەسىپ شەشەتىن، تولەم قابىلەتسىزدىگىن رەتتەۋدىڭ جاڭا جۇيەسى قالانادى. بانكروتتىق ۇدەرىسى - كۇيرەپ قالۋ ەمەس، كاسىپورىندى دامۋدىڭ جاڭا دەڭگەيىنە شىعارۋ عانا. بۇل رەتتە وسى ۇدەرىستىڭ ارتىق- كەمىن ەگجەي- تەگجەيلى تۇسىندىرەتىن، ويلانىپ ىستەيتىن قاجىرلى ەڭبەك قاجەت»، - دەدى قازاقستان پرەزيدەنتى.

ەلباسى جەكەشەلەندىرۋدىڭ ەكىنشى «تولقىنىنىڭ» قارقىنى جەتكىلىكسىز ەكەنىنە توقتالدى.

«وسى ناۋقاندى باستاعالى باسەكەلىك ورتاعا نەبارى 2013 نىسان بەرىلدى. مەنىڭ تاپسىرمام بويىنشا ۇكىمەت مەملەكەتسىزدەندىرۋ جانە جەكەشەلەندىرۋ امالدارىن تۇبەگەيلى قايتا قارادى، ولار بۇگىندە پارلامەنتتە قارالىپ جاتقان جاڭا زاڭ جوباسىندا كورىنىس تاپتى. ۇكىمەتكە ۇلتتىق حولدينگتەر مەن رەسپۋبليكالىق مەنشىكتەگى مەيلىنشە ءىرى 65 كاسىپورىندى، سونداي-اق «سامۇرىق-قازىنا» قورىنىڭ 182 ەنشىلەس كاسىپورنىن قامتيتىن جەكەشەلەندىرۋ نىساندارىنىڭ باسىمدىلىعى بار تىزبەسىن بەكىتۋدى جانە ونى دەرەۋ جۇزەگە اسىرۋعا كىرىسۋدى تاپسىرامىن. بۇل رەتتە نىسانداردى جەكەشەلەندىرۋگە بەرىپ قانا قويماي، ولاردىڭ ساتىلىم الدىنداعى دايىندىعىن قامتاماسىز ەتۋ كەرەك»، - دەدى نۇرسۇلتان نازاربايەۆ.

قازاقستان پرەزيدەنتى جاريا ەتۋ، زاڭداستىرۋ اياسىنداعى كورسەتكىشتىڭ كولەمى جەتكىلىكسىز ەكەنىنە نازار اۋداردى. ناۋقان جاريالانعالى بەرى نەبارى 388,5 ميلليارد تەڭگەنىڭ مۇلىگى جاريا ەتىلگەن.

«جەكەشەلەندىرۋ مەن زاڭداستىرۋ - بيزنەسمەندەردىڭ جاڭا لەگىن قالىپتاستىرۋدىڭ جولى. وسىعان بايلانىستى اۋقاتتى ادامداردى وسى ناۋقانعا قاتىسۋعا شاقىرامىن. جەكەشەلەندىرۋگە قازاقستان كومپانيالارىنىڭ قاتىسقانى ماڭىزدى. زاڭداستىرۋ - مەملەكەتتىك قىزمەتشىلەردەن باستالىپ، بارلىق ازاماتتارعا بىردەي مىندەتتى بولاتىن تابىستار مەن شىعىستاردى جالپىعا بىردەي جاريا ەتۋ الدىنداعى سوڭعى ارەكەت. بۇگىندە مۇلىكتى زاڭداستىرۋ ءۇشىن مەيلىنشە قولايلى جاعداي جاسالعان. ەندى ۇكىمەت زاڭ اياسىنداعى بارلىق اكتىلەردى قىسقا مەرزىمدە قابىلداۋى جانە ولاردى اكىمدەرمەن بىرلەسىپ ءتيىمدى جۇزەگە اسىرا باستاۋى ءتيىس»، - دەدى مەملەكەت باسشىسى.

نۇرسۇلتان نازاربايەۆ مەملەكەت- جەكەمەنشىك سەرىكتەستىگىنىڭ ءتۇرلى فورمالارى ەكونوميكانىڭ بارلىق سالاسىندا قولدانىلىپ، ينفراقۇرىلىمدى، سونىڭ ىشىندە الەۋمەتتىك ينفراقۇرىلىمدى دامىتۋدىڭ نەگىزگى تەتىگىنە اينالۋى تيىستىگىن اتاپ ءوتتى.

«بۇگىندە مەملەكەت- جەكەمەنشىك سەرىكتەستىگىن قولدانۋ ءۇشىن بارلىق جاعداي جاسالعان، ءتيىستى قۇقىقتىق- نورماتيۆتىك اكتىلەر قابىلدانعان. ءبىراق ءالى كۇنگە ويداعىداي تيىمدىلىگى جوق. مەملەكەتتىك ورگاندارمەن جانە مىندەتتى تۇردە اكىمدىكتەرمەن مەملەكەت- جەكەمەنشىك سەرىكتەستىگىن ەنگىزۋ ماسەلەلەرى جونىندە كەڭ اۋقىمدى ادىستەمەلىك جۇمىس جۇرگىزۋ قاجەت»، - دەدى قازاقستان پرەزيدەنتى.

مەملەكەت باسشىسى بۇل ورايدا حالىققا مەملەكەت- جەكەمەنشىك سەرىكتەستىگىنىڭ نەگىزگى قاعيداتتارىن ءتۇسىندىرۋدىڭ قاجەتتىلىگىن جانە سونىڭ اياسىندا شەتەلدىك ينۆەستيتسيالار تارتۋ جۇمىستارىن كۇشەيتۋ كەرەكتىگىن ايتتى.

ەلباسى ەلدە جۇزەگە اسىرىلىپ جاتقان يندۋستريالىق- يننوۆاتسيالىق جانە «نۇرلى جول» باعدارلامالارى ونەركاسىپتى جانە ينفراقۇرىلىمدى دامىتۋعا زور ىقپال ەتەتىنىن اتاپ ءوتتى.

«نۇرلى جول» اياسىندا اۆتوكولىك ماگيسترالدارىنىڭ قۇرىلىسىنا عانا 70 مىڭداي ادام تارتىلعان. سونداي- اق ءبىرقاتار الەۋمەتتىك ماڭىزى بار ءىس- شارالار جۇزەگە اسىرىلۋدا. باعدارلاما اياسىندا بولىنگەن قاراجاتتى دەر كەزىندە جانە ءتيىمدى يگەرۋ قاجەت»، - دەدى مەملەكەت باسشىسى.

نۇرسۇلتان نازاربايەۆ قازىرگى جاعدايدى ەسكەرە وتىرىپ، يندۋستريالاندىرۋدىڭ ەكىنشى بەسجىلدىعىن جانداندىرۋ قاجەتتىگىنە نازار اۋداردى.

«ينۆەستيتسيالىق بەلسەندىلىك پەن سۇرانىس تومەندەۋدە، ال باسەكە تەك كۇشەيىپ كەلەدى. سوندىقتان يندۋستريالىق- يننوۆاتسيالىق باعدارلامانى جانداندىرۋ بارىسىندا ونىمدىلىك پەن تيىمدىلىكتى ارتتىرۋعا، ونىمدىلىگى از سالالاردى قولداۋدان باس تارتىپ، الدىمەن ەكسپورتقا باعىتتالعان پەرسپەكتيۆاسى بارىن عانا تاڭداۋعا دەن قويعان ءجون»، - دەدى قازاقستان پرەزيدەنتى.

مەملەكەت باسشىسى وتكەن جىلدارى كوپتەگەن يندۋستريالىق جوبالار ىسكە قوسىلعانىن ايتتى.

«الايدا، سولاردىڭ كوپشىلىگى قازىرگى جاعدايدا باسەكەگە قابىلەتسىز بولىپ، مەملەكەتتىك قولداۋدىڭ ەسەبىنەن عانا تۇر. وسىنىڭ ءبارى سان قۋالاۋدىڭ سالدارى. ءوڭىر باسشىلارى كىم كوپ قۇرىلىس سالادى دەگەن جارىس ۇيىمداستىردى. ەندى بۇل كاسىپورىندار جۇمىس ورىندارىن قىسقارتاتىنىن مالىمدەپ، ۇكىمەتتەن كومەك سۇراپ جۇگىرىپ ءجۇر. مۇنىڭ ءبارى وزەكتىلەندىرىلگەن يندۋستريالىق- يننوۆاتسيالىق باعدارلامادا ەسكەرىلۋى ءتيىس. 2016 -جىلدىڭ 1 -ساۋىرىنەن باستاپ ءبىز باعدارلامانىڭ جاڭا فورماتى بويىنشا جۇمىس ىستەۋگە ءتيىسپىز»، - دەدى نۇرسۇلتان نازاربايەۆ.

قازاقستان پرەزيدەنتى سوڭعى ۋاقىتتارى ءبىزدىڭ ەلمەن ىنتىماقتاسقىسى كەلەتىن الەمنىڭ جۇزدەن استام ءىرى كومپانيالارى باسشىلارىمەن كەزدەسكەنىن ايتتى.

«الەمدە قازاقستاندا بيزنەس جۇرگىزۋگە دەگەن زور قىزىعۋشىلىق بار. مەنىڭ جىل باسىنان بەرى مەملەكەت باسشىلارىمەن وتكەن كەزدەسۋلەرىمنىڭ بارىسىندا ۇلىبريتانيا، فرانسيا، قىتاي، جاپونيا سياقتى ەكونوميكالىق جاعىنان قۋاتتى ەلدەردىڭ ينۆەستورلارىمەن جالپى قۇنى شامامەن 46 ميلليارد دوللار بولاتىن 130 كەلىسىمگە قول قويىلدى. وسى ۋاعدالاستىقتارى جۇزەگە اسىرۋ بىزگە الەمدىك نارىقتا سۇرانىس بار تاۋارلار وندىرۋگە، مىڭداعان جاڭا جۇمىس ورىندارىن اشۋعا مۇمكىندىك بەرەدى. سوندىقتان ۇكىمەت پەن اكىمدەر وسى كەلىسىمدەردى جۇزەگە اسىرۋعا كىرىسىپ، قاتاڭ مونيتورينگ جاساۋى ءتيىس»، - دەدى مەملەكەت باسشىسى.

نۇرسۇلتان نازاربايەۆ ينۆەستيتسيالىق زاڭنامانى جەتىلدىرۋ، ينۆەستيتسيالىق سۋبسيديالار مەن سالىق ارتىقشىلىقتارىن ەنگىزۋ، شەتەلدىك جۇمىس كۇشىن اكەلۋ ۇدەرىسىن جەڭىلدەتۋ، ۆيزاسىز كىرۋ قاراستىرىلعان ەلدەر ءتىزىمىن ۇلعايتۋ سياقتى شارالار قاعاز جۇزىندە قالىپ قويماۋى تيىستىگىن ايتتى.

«ءبىزدىڭ ۆەدومستۆولارىمىزدىڭ اراسىندا ينۆەستيتسيا تارتۋ ماسەلەسىندە ۇيلەسىم جوق. بۇگىندە ينۆەستور ءۇشىن ء«بىر تەرەزە» بولماي تۇر. مەن مينيسترلەر مەن اكىمدەر ينۆەستور تارتۋعا تىكەلەي جاۋاپتى ەكەنىن بىرنەشە رەت ايتقان بولاتىنمىن. بۇل جۇمىس ناقتى ناتيجەگە - ينۆەستيتسيالىق جوبانى جۇزەگە اسىرۋعا باعىتتالۋى ءتيىس. بىزگە، ءسىرا، سالالىق مينيسترلەر مەن اكىمدەردىڭ قانشا ينۆەستيتسيا تارتقانى جانە قانشا جۇمىس ورنىن اشقانى جونىندە رەيتينگ ەنگىزۋ كەرەك شىعار»، - دەدى قازاقستان پرەزيدەنتى.

مەملەكەت باسشىسى سونداي- اق كاسىپكەرلىكتى قولداۋ جانە بولىنگەن قاراجاتتى ساپالى يگەرۋ جونىندەگى جۇمىستاردى ءتيىمدى جۇرگىزۋ قاجەتتىگىنە دە نازار اۋداردى.

ەلباسى «سامۇرىق- قازىنا» قورى اكتيۆتەرىنىڭ قۇرىلىمى ونىڭ شاعىن ءارى ءتيىمدى باسقارىلۋىن قامتاماسىز ەتەتىن مەجەگە دەيىن وڭتايلاندىرىلۋى كەرەكتىگىن ايتتى.

«قوردىڭ بارلىق ۆەرتيكالى بويىنشا فۋنكتسيالاردىڭ وڭتايلانۋىن باتىل ەنگىزىپ، ءتيىمسىز شىعىستاردى قىسقارتۋ قاجەت. مەن ساتىپ الۋدىڭ حالىقارالىق تاجىريبەگە نەگىزدەلگەن جاڭا مودەلى مەن دەمەۋشىلىكتىڭ جاڭارعان ۇلگىسىن قولدايمىن. قوردىڭ ءوزىنىڭ عانا ەمەس، ونىڭ ەنشىلەس ۇيىمدارىنىڭ دا شەتەلدەردەگى وكىلدىكتەرىنىڭ سانىن قىسقارتۋ ماسەلەسىن قاراستىرۋ كەرەك»، - دەدى مەملەكەت باسشىسى.

نۇرسۇلتان نازاربايەۆ بۇلاردى ۇستاپ تۇرۋ ءۇشىن جىل سايىن وراسان قاراجات جۇمسالاتىنىن، قارجى مينيسترلىگى بيۋدجەت قاراجاتى شىعىستارىن ءجىتى قاداعالاۋى كەرەكتىگىن ايتتى. مەملەكەت باسشىسى قوردىڭ قاجەتتى مولشەردە جوعارى بىلىكتىلىگى جانە جەتكىلىكتى تاجىريبەسى بار قىزمەتكەرلەرى بولۋعا تيىستىگىنە نازار اۋداردى.

«قازىرگى ساتتە قوردا «اينالمالى ەسىكتەر» قاعيداتى بويىنشا مەملەكەتتىك ورگانداردان «سامۇرىق- قازىناعا» جانە كەرى باعىتتاعى روتاتسيا ءۇردىسى بايقالىپ وتىر. شەتەلدىك تاجىريبەدە توپ- مەنەدجەرلار جەتىستىكتەرى مەن بيزنەس قۇرىلىمدارىندا جۇمىس ماشىعى جەتكىلىكتى كاسىپقويلار اراسىنان ىرىكتەلەدى. ال بىزدە قوردا، ۇلتتىق كومپانيالارداعى جوعارى لاۋازىمدارعا ءومىر بويى مەملەكەتتىك قىزمەتتە جۇمىس ىستەگەن ادامدار قابىلدانادى. سوسىن ول ادامدار اكتيۆتەردى، كومپانيالاردى مەملەكەتتىك قىزمەتتە اكىمدىكتى، دەپارتامەنتتى نەمەسە ءبولىمدى باسقارعانداي ادىستەرمەن باسقارادى. قوردىڭ 6 باسقارما مۇشەسىنىڭ 5 ەۋى بۇرىن بيزنەستە ءبىر كۇن دە جۇمىس ىستەپ كورمەگەن»، - دەدى نۇرسۇلتان نازاربايەۆ.

بۇل رەتتە قازاقستان پرەزيدەنتى ماڭىزدى ورىندارعا حالىقارالىق كومپانيالاردا تابىستى تاجىريبەلەرى بار كاسىپقويلاردى تارتقان ءجون ەكەنىن ايتتى.

«كەڭەسشىلەر تارتۋ بارىسىندا ولاردىڭ الدىنا وزدەرىن قازاقستاندىقتار اراسىنان الماستىراتىن ماماندار دايىنداۋ مىندەتىن قويعان ءجون. بۇل مەملەكەتتىك ورگانداردىڭ بارلىق ءبىرىنشى باسشىلارىنا دا قاتىستى، ويتكەنى الماستىراتىن ادام ىزدەگەندە كوبىنەسە ونىڭ توڭىرەگىندە دايىن كانديداتۋرالار بولماي شىعادى. جوعارى دەڭگەيدەگى كادرلار دايارلاۋ ءۇشىن مەملەكەت كوپ قاراجات شىعىندايدى. مەريتوكراتيا نورماعا اينالۋعا ءتيىس. بۇل قاعيدات بارلىق سالادا قولدانىلۋى كەرەك» ، - دەدى مەملەكەت باسشىسى.

نۇرسۇلتان نازاربايەۆ ۇكىمەتكە «سامۇرىق- قازىنا» قورىن ترانسفورماتسيالاۋ باعدارلاماسىن جۇزەگە اسىرۋ جونىندە قاجەتتى شارالار قابىلداۋدى، 2016 -جىلعى 1 -ساۋىرگە دەيىن باسقارۋدىڭ جاڭا مودەلى مەن قۇرىلىمىنا كوشۋىن قامتاماسىز ەتۋدى تاپسىردى.

قازاقستان پرەزيدەنتى سونداي- اق بۇگىن «مەملەكەتتىك قىزمەت تۋرالى» زاڭعا ءوزىنىڭ ۆەتو قويعانىن، ول جەتىلدىرىلۋ ءۇشىن پارلامەنتكە قايتارىلعانىن ايتتى.

«مەملەكەتتىك قىزمەتشىلەردىڭ زاڭدا بەكىتىلگەن زەينەت جاسىنا جەتكەن كەزدە زەينەتكە شىعۋىنا قاتىستى ناقتى ۇستانىمدى ايقىنداۋ قاجەت. بۇل پرەزيدەنت تاعايىندايتىن، زەينەتكە شىعۋ مەرزىمى 1 جىلدان 5  جىلعا دەيىن ۇزارتىلۋى مۇمكىن كەيبىر لاۋازىمداردان باسقا ساياسي مەملەكەتتىك قىزمەتشىلەرگە دە قاتىستى قولدانىلۋعا ءتيىس»، - دەدى نۇرسۇلتان نازاربايەۆ.

مەملەكەت باسشىسى ەلدە قابىلدانۋى ءتيىس مەيلىنشە ناقتى شارالار بيىلعى جىل سوڭىنا دەيىن قازاقستان حالقىنا ارنالعان جولداۋدا جاريا ەتىلەتىنىن ايتتى.

نۇرسۇلتان نازاربايەۆ كۇردەلى جاعدايدا دا ۇكىمەت پەن وڭىرلەردىڭ اكىمدەرى ەكونوميكالىق ءوسىمدى ىنتالاندىرۋ، جۇمىسپەن قامتۋ جانە حالىقتىڭ كىرىستەرىن قولداۋ ءۇشىن رەزەرۆتەر قاراستىرۋى تيىستىگىن اتاپ ءوتتى.

«ۇكىمەتتىڭ داعدارىستىق قۇبىلىستاردى ەڭسەرۋ جونىندەگى قالىپتاسقان امال- ادىستەرى مەن تەتىكتەرى بار ەكەنىن بىلەمىن. بيىلعى جىلعا ارنالعان رەسپۋبليكالىق بيۋدجەتتى ناقتىلاۋ جانە ءۇشجىلدىق بيۋدجەت ولشەمدەرىن وزگەرتۋ جونىندەگى ۇكىمەتتىڭ ۇسىنىستارىن مەن قولدادىم. ءبىز بۇگىندە الەۋمەتتىك ماڭىزى بار كوپتەگەن تاۋار تۇرلەرى باعاسىنىڭ ءوسىپ جاتقانىن كورىپ وتىرمىز. وسىعان بايلانىستى ۇكىمەت پەن اكىمدەر اسا قاجەتتى تاۋارلار باعاسىنىڭ مونيتورينگىن جۇرگىزۋ جۇمىسىن جانداندىرۋعا ءتيىس، ەگەر قاجەت بولسا، حالىقتىڭ ءالسىز توپتارىنا اتاۋلى الەۋمەتتىك كومەك ارقىلى قولداۋ كورسەتۋ كەرەك»، - دەدى مەملەكەت باسشىسى.

سونىمەن قاتار قازاقستان پرەزيدەنتى باعانى ۇستاپ تۇرۋ ىسكەرلىك احۋالدى ناشارلاتا وتىرىپ، بيزنەسكە قىسىم جاساۋ تەتىگىنە اينالماۋعا تيىستىگىنە نازار اۋداردى.

«باعانىڭ دالەلدى تۇردە ارتتىرىلۋ مەن پايدا تابۋ ماقساتىندا ءوسىرىلۋىن ايقىن اجىراتۋ قاجەت. تاۋاردىڭ شىنايى نارىقتىق باعاسى بولۋعا ءتيىس. اسا قاجەتتى تاۋارلارعا قاتىستى الىپساتارلىققا جول بەرمەگەن ءجون. بارلىق وڭىردەگى احۋالدى قاداعالاپ وتىرۋ كەرەك. ەڭ الدىمەن، بۇل ءۇشىن جەكە جاۋاپكەرشىلىك اكىمدەر مەن ۇكىمەت مۇشەلەرىنىڭ موينىندا بولادى»، - دەدى نۇرسۇلتان نازاربايەۆ.

مەملەكەت باسشىسى بارلىق باعىت بويىنشا ناتيجەلى جۇمىس تالاپ ەتىلەتىنىن ايتتى.

«بىزدەر ءۇشىن ىستەرىمىزدىڭ ار جاعىندا ناقتى ناتيجەلەر، ناقتى پايدا جانە قوعامنىڭ يگىلىكتەرى تۇراتىن جاڭا كەزەڭى باستالدى. ۇكىمەتتىڭ ءار مۇشەسى مەن ءاربىر ەڭبەككەردىڭ قىزمەتى وسىلاي باعالاناتىن بولادى. ءىس- قيمىلدى، رەفورمالاردىڭ جانە ەلىمىزدىڭ ەكونوميكاسىنىڭ جاڭا فورماعا كوشۋىنىڭ مەزگىلى كەلدى»، - دەدى قازاقستان پرەزيدەنتى.

جيىن بارىسىندا سونداي- اق ۇلتتىق ەكونوميكا ءمينيسترى ە. دوسايەۆ، ينۆەستيتسيالار جانە دامۋ ءمينيسترى ءا. يسەكەشيەۆ، «سامۇرىق- قازىنا» ۇ ءا ق» ا ق باسقارماسىنىڭ ءتوراعاسى ءو. شوكەيەۆ جانە ۇلتتىق بانك ءتوراعاسى د. اقىشەۆ بايانداما جاسادى.