كەلەسى جىلى «نۇر وتان» پارتياسىنىڭ الدىندا اۋقىمدى جۇمىستار تۇر - ەلباسى

استانا. قازاقپارات - قازاقستان پرەزيدەنتى نۇرسۇلتان نازاربايەۆ «نۇر وتان» پارتياسى ءتوراعاسىنىڭ ءبىرىنشى ورىنباسارى اسقار مىرزاحمەتوۆتى قابىلدادى، دەپ حابارلادى اقوردانىڭ باسپا ءسوز قىزمەتى.

ا. مىرزاحمەتوۆ كەزدەسۋ بارىسىندا ەلباسىعا ساياسي كەڭەستىڭ سوڭعى بيۋرو وتىرىسىندا ايتىلعان تاپسىرمالاردىڭ ورىندالۋ بارىسى، سونداي- اق پارتيانىڭ نەگىزگى باعدارلامالارى تۋرالى باياندادى.

نۇرسۇلتان نازاربايەۆ كۇن تارتىبىندەگى ماسەلەلەردىڭ كوپتىگىنە بايلانىستى كەلەسى جىلى «نۇر وتان» پارتياسىنىڭ الدىندا اۋقىمدى جۇمىستار تۇرعانىن اتاپ ءوتتى.

«مەن باستاماشىلىق ەتكەن بەس ينستيتۋتسيونالدىق رەفورمانى جۇزەگە اسىرۋ اياسىندا سەكسەنگە جۋىق زاڭ قابىلدانادى. كەلەسى جىلدىڭ باسىنان «100 ناقتى قادام» ۇلت جوسپارىن جۇزەگە اسىرۋعا كىرىسەمىز. وسىعان بايلانىستى پارتيانىڭ الدىندا وتە ۇلكەن جۇمىستار تۇر»، - دەدى قازاقستان پرەزيدەنتى.

مەملەكەت باسشىسى سونداي- اق الەمدە قالىپتاسقان گەوساياسي جاعدايدى ەسكەرە وتىرىپ، الداعى رەفورمالاردىڭ ماڭىزدىلىعىن ايتتى.

«الەمدەگى احۋال قازىر كۇردەلى، ءبىزدىڭ وڭىردە دە تىنىش ەمەس. وسىنىڭ ءبارى بىزگە ىقپال ەتپەي قويمايدى. بولىپ جاتقان وقيعالاردى نازارعا الا وتىرىپ، حالىققا ءتۇسىندىرۋ جۇمىستارىن جۇرگىزۋ كەرەك. وسىنداي قيىن كەزەڭدە بىزگە كۇردەلى رەفورمالاردى جۇزەگە اسىرۋعا تۋرا كەلەدى. مۇنىڭ ءبارى حالىقتىڭ يگىلىگى ءۇشىن جاسالۋدا. قازىرگى جاعدايدىڭ قيىن ەكەنىنە قاراماستان، رەفورمالاردى جۇزەگە اسىرۋ بولاشاقتاعى يگىلىكتىڭ نەگىزىن قالاۋ ءۇشىن قاجەت. الداعى رەفورمالار كۇردەلىلىگى جاعىنان ءبىزدىڭ 90-جىلداردىڭ باسىندا جۇرگىزگەن رەفورمالارىمىزدان كەم تۇسپەيدى. وسىعان بايلانىستى «نۇر وتان» پارتياسىنا بارشا ءتۇسىندىرۋ جۇمىستارىن ءوز موينىنا الۋدى تاپسىرامىن»، - دەدى نۇرسۇلتان نازاربايەۆ.

 كەزدەسۋ قورىتىندىسى بويىنشا قازاقستان پرەزيدەنتى ءبىرقاتار ناقتى تاپسىرمالار بەردى.