ن. نازاربايەۆ فرانسيانىڭ قازاقستانداعى ەلشىلىگىندە بولدى
مەملەكەت باسشىسى فرانسيا مەن ءبىزدىڭ ەلىمىزدىڭ اراسىنداعى ايرىقشا جوعارى دەڭگەيدەگى قارىم- قاتىناستى، سونداي- اق تاياۋدا وتكەن ساپار بارىسىندا قازاقستان تاراپىنا كورسەتىلگەن سىي- قۇرمەتتى باعالاي وتىرىپ، قازاقستان حالقىنىڭ اتىنان كوڭىل ايتۋ ءۇشىن ەلشىلىككە ارنايى كەلگەنىن ايتتى.
قازاقستان پرەزيدەنتى پاريجدە زۇلىمدىقپەن جاسالعان تەررورلىق ارەكەتتەر سالدارىنان كوپتەگەن جازىقسىز ازاماتتار قازا بولعانىن اتاپ ءوتتى.
- وسى ازالى كۇندەرى ءبىز فرانسيا حالقىمەن بىرگەمىز. بۇل ەل الەمدىك تاريح پەن مادەنيەت وشاقتارىنىڭ ءبىرى سانالادى. سوندىقتان مۇنداي وقيعا ءبىزدىڭ بارىمىزگە دە اۋىر تيەدى. بۇل نارازىلىق پەن قىنجىلىس تۋدىرىپ قانا قويمايدى، بارشا ادامزاتتى وسىنداي ارەكەتتەرگە قارسى كۇرەسۋگە ۇندەيدى. تەرروريزمنىڭ ۇلتى مەن ءدىنى بولمايدى. بۇل - جالپىعا ورتاق قاسىرەت. بىرىككەن ۇلتتار ۇيىمىنىڭ تاياۋدا وتكەن سەسسياسىندا مەن «يسلام تەرروريزمگە قارسى» فورۋمىن ۇيىمداستىرۋ، سونداي- اق وسىناۋ زۇلىمدىقپەن كۇرەستىڭ دۇنيەجۇزىلىك جەلىسىن قۇرۋ تۋرالى ۇسىنىس ايتتىم، - دەدى نۇرسۇلتان نازاربايەۆ.
