پاريجدە تۇراتىن قازاق جۇما كۇنى بولعان شابۋىلداردان كەيىنگى قالاداعى جاعدايدى ايتىپ بەردى
فرانسيا بيلىگى تەراكتىلەرگە كۇدىكتى ءبىر ادامنىڭ انىقتالعانىن حابارلادى. شابۋىلدان قازا بولعاندار سانى ارتقان. پاريج قازاعى ابدۋلسامەت التاي كوشەدە تەكسەرىس كۇشەيگەنىن ايتادى.
«مەن ءوزىم قالا ورتالىعىندا، مەترودان 50-60 مەتر جەردە عانا تۇرامىن. جەرگىلىكتى تەلەارنالار پاريجگە ەكى مىڭ سارباز جەتكىزىلگەنىن حابارلادى. 14- كۇنى قالا ءىشى تىم-تىرىس بولدى. ساعات كەشكى تورتتەن كەيىن كوشەگە شىققانىمدا بىرەن-ساران ادامدار عانا ۇشىراستى. كوشەدەگى كوپشىلىك قاۋىم بولعان وقيعا جايلى ايتۋعا قۇلىقسىز. ساعات ونعا دەيىن مەترو مەن دۇكەندەردىڭ بارلىعى جابىق بولدى. كەشكە دەيىن دۇنيەدە نە بولىپ جاتقانىنان تەك تەلەديدار ارقىلى حاباردار بولىپ وتىردىق، گازەت-جۋرنالدار دا كەلمەي قالدى»، - دەيدى ابدۋلسامەت التاي.
ونىڭ ايتۋىنشا، پاريجدەگى شابۋىلداردى فرانسۋز اقپارات قۇرالدارى سيريامەن بايلانىستىرىپ جاتىر.
ابدۋلسامەت التايدىڭ سوزىنشە، تەكسەرىس ءتىپتى كوبەيگەن ەندى ءوزى سەكىلدى مۇسىلمان ادامدارعا قيىن تيەدى-اۋ دەگەن ويىن دا جاسىرمادى.
«بيىل قاڭتاردا Charlie Hebdo ساتيرالىق جۋرنالىنىڭ رەداكسياسىنا قارۋلى شابۋىل جاسالعاننان كەيىن پوليتسيا ۆوكزال ماڭىندا، مەشىت جانىندا جانە جۇرت كوپ كەلەتىن باسقا دا جەرلەردە ادامداردى توقتاتىپ، قۇجاتتارىن تەكسەرەتىن ەدى. ەندى سونداي تەكسەرىس ءتىپتى كوبەيگەن ءتارىزدى. اسىرەسە ءبىز سياقتى مۇسىلمان ادامدارعا قيىن تيەدى-اۋ دەپ ۋايىمدايمىز. جىل باسىنداعى شابۋىلدان كەيىن مەشىتكە كەلەتىندەر، ءتىپتى جۇما نامازى ۋاقىتىندا مەشىت جانىنا جينالاتىن قايىرشىلار دا كورىنبەي كەتكەن. ءبىراز ۋاقىتقا دەيىن جۇما نامازى كەزىندە قارۋلى كۇش وكىلدەرى كەلىپ، سىرتىمىزدان باقىلاپ تۇراتىن»، - دەيدى ول.
جەرگىلىكتى مۇسىلمان قاۋىمى تاراپىنان جۇما كۇنگى شابۋىلدارعا قاتىستى قانداي دا ءبىر مالىمدەمەلەر بولدى ما، دەگەن ساۋلاعا ابدۋلسامەت التايدىڭ ايتۋىنشا، وعان پاريجدەگى مۇسىلماندار كوميتەتىنىڭ جەتەكشىسى جاۋاپ قاتقان.
«فرانسيادا بىرنەشە ميلليون مۇسىلمان تۇرادى. كەشە وسىنداعى مۇسىلماندار كوميتەتىنىڭ جەتەكشىسى: «بۇل قىلمىس - مۇسىلماننىڭ ءىسى ەمەس. تازا مۇسىلمان مۇنداي قانتوگىس ارەكەتكە بارمايدى. بۇل - يسلامدى جامىلعانداردىڭ ءىس-ارەكەتى» دەپ مالىمدەدى»، - دەيدى التاي.
سونداي-اق، پاريج قازاعى قالاداعى قايعىلى وقيعالار سول جەردەگى قازاقتارعا قالاي اسەر ەتكەنىن دە ايتىپ بەردى.
«مەنىڭ ەسەبىم بويىنشا، مۇندا تۇركيادان كوشىپ كەلگەن ەكى ءجۇزدىڭ ۇستىندە قازاق وتباسى تۇرادى. كەيىنگى جىلدارى قازاقستاننان دا قونىس اۋدارعان قازاقتار بار. بۇل جەردەگى قازاقتار ءارتۇرلى شارالاردا باس قوسىپ تۇرامىز. مىسالى، كەشە وسىندا تۇراتىن قازاق جاستارىنىڭ جيىنى ءوتۋى ءتيىس ەدى. ءبىراق مىنا جاعدايدان كەيىن ونى كەلەسى سەنبىگە قالدىرىپتى. سونداي-اق، بۇگىن وسىنداعى قازاق مادەني ورتالىعىندا نارەستەنىڭ بەسىك تويى ءوتۋى كەرەك بولاتىن. ەندى ول دا بەلگىسىز بولىپ قالدى، بارار-بارماسىمىزدى بىلمەي وتىرمىز. ءار جەكسەنبى سايىن وسىندا تۇراتىن تۇرىك ۇلتىنىڭ وكىلدەرى جينالىپ، ءدىني سۇحبات وتكىزەتىن. وعان ءبىز دە قاتىساتىنبىز. ول جيىننىڭ بولمايتىنى حابارلاندى»، - دەيدى ابدۋلسامەت التاي.
ەسكە سالا كەتەيىك، 13- قاراشا كۇنى پاريجدىڭ بىرنەشە اۋدانىندا تەررورشىلار بەيبىت تۇرعىندارعا وق اتقان بولاتىن. قايعىلى وقيعادان 150 دەن اسا ادام قايتىس بولدى.
اتالعان تەررورلىق ارەكەتتى «يسلام مەملەكەتى» ءوز موينىنا الىپ، پاريجدە مۇنداي وقيعالار ءالى جالعاساتىنىن ايتتى.
«ازاتتىق»
