ايتىسكەر اقىن رينات زايىتوۆ ءوزىن ايتىستان شەتتەتكەندەر تۋرالى ايتىپ بەردى
بۇل تۋرالى Baistars.kz حابارلايدى.
«مەن ەشقاشان ۇلتتىق مۇددەنى ساۋدالاعان ەمەسپىن، ساۋدالامايمىن دا! بۇل جاعداي بىلاي باستالدى. ەر جانىبەكتىڭ 300 جىلدىعىنا ارنالعان ايتىسقا ۇيىمداستىرۋشىلاردان شاقىرتۋ الدىم. سول كەزدە ءجۇرسىن ەرمان مەن داۋلەتكەرەي كاپ ۇلىنا استانا قالالىق مادەنيەت باسقارماسىنان «رينات زايىتوۆ قاتىسپاسىن، جوعارى جاقتان سولاي بۇيرىق كەلدى» دەپ تىكەلەي قوڭىراۋ شالادى.
قاي جوعارى جاق؟ بۇيرىق كىمنەن؟ بۇل سۇراقتار جاۋاپسىز قالادى. سودان جەڭىستىڭ 70 جىلدىعىنا ۇيىمداستىرىلعان ايتىستا ۇيىمداستىرۋشى قىزدار تەلەفون سوقتى. بىردەن ءىشىم سەزدى دە، وزدەرىنەن بۇرىن: «مەنى ايتىسقا قاتىستىرمايتىن بولدىڭدار ما؟» - دەپ ەدىم، «ءيا، اكىمشىلىك رۇقسات بەرمەي وتىر»، - دەدى. كۇلدىم دە قويدىم.
جالپى، مەنى شەتتەتكەندەردىڭ كىم ەكەنىن ءىشىم سەزەدى. ءالى كوپ ۇزاماي بەتى اشىلادى. مۇنىڭ ءبارى - جەكەلەگەن ادامداردىڭ مانسابىنان ايىرىلىپ قالۋدان، ياعني جەكە باسىنىڭ قامىن ويلاعان قورقاقتىعىنان تۋىنداپ وتىرعان جاعدايلار. ايتپەسە، پرەزيدەنت ريناتتى ايتىسقا قاتىستىرماڭدار دەپ ايتپاعان شىعار»، - دەيدى ءوزىنىڭ ايتىستان شەتتەتىلۋىنىڭ سەبەبىن تۇسىندىرگەن اقىن.
سونىمەن قاتار، ول كوپتەگەن ارىپتەستەرى سەكىلدى پارتيا قاتارىنا وتپەيتىنىن دە ايتقان.
«بۇعان دەيىن ەشقانداي پارتياعا كىرمەگەنمىن، كىرمەيمىن دە. سەبەبى كىم قاي پارتياعا كىرسە، سول پارتيانىڭ ءسوزىن سويلەۋگە مىندەتتى. كەشەگى وتكەن ايتىستا ءبىر نارسەگە قۋانىپ قايتتىم. «نۇر وتان» پارتياسىنىڭ تىكەلەي وكىلى باۋىرجان بايبەك مىرزا (قازىرگى الماتى قالاسىنىڭ اكىمى - رەد): «اقىندار قالاي ايتسا دا، ءبىز اقيقاتتى اقيقات دەپ قابىلدايمىز»، - دەدى. مەن ايتسام دا، باسقا بىرەۋ ايتسا دا، ءبارىمىزدىڭ ويلاعانىمىز - ءبىر قازاقتىڭ مۇددەسى. شىندىقتى دەڭگەيىمنىڭ جەتكەن جەرىنە دەيىن جەتكىزىپ ءجۇرمىن.
بيلىك پەن حالىقتىڭ ورتاسىنداعى كوپىر بولۋ مىندەتىم بولعان سوڭ، وسى جولدا جەكسۇرىن بولۋدان قورىقپايمىن. ەگەر ورىندى دالەل بولسا، ءوز قاتەلىگىمدى مويىنداۋدان، ءتىپتى كەشىرىم سۇراۋدان دا ارلانبايمىن. مەن ءۇشىن ەڭ ءبىرىنشى كەزەكتە تىنىشتىق پەن ىنتىماق تۇرادى.
وكىنىشكە قاراي، ءبىزدىڭ شەنەۋنىكتەر ءبارىن كەرىسىنشە جاسايدى. دانەكەر بولۋدىڭ ورنىنا مانسابى ءۇشىن باسىن الىپ قاشادى. ءبىرىن-ءبىرى ساتقانىمەن تۇرماي، استىنداعى كرەسلوسى ءۇشىن حالىقتى دا ساتادى، ءبىزدى دە جەكسۇرىن ەتىپ تىنادى. بۇل تازا ايۋاندىق دەر ەدىم» - دەيدى ايتىسكەر اقىن.
ول سونداي-اق ەشكىمدى ماقتامايتىنىن، ەشكىمگە ارناۋ ايتپايتىنىن دا جەتكىزدى.
«ونداي كۇمان بولماي-اق قويسىن! ەشقاشان!»، - دەيدى زايىتوۆ.
رينات زايىتوۆ ايتىستان شەت جۇرگەن كەزدەگى ءوزىنىڭ قىنجىلىسىن دا جاسىرعان جوق.
«قينالىس بولمادى ەمەس، بولدى. ءبىراق ايتىسقا شىقپاعانىم ءۇشىن قىنجىلعانىم جوق. تالاي جىل بىرگە جۇرگەن ارىپتەستەرىمنىڭ مەنىڭ جاي-كۇيىمە نەمقۇرايلى قاراپ، سۇحباتتاردا مەنىڭ ايتقاندارىمنىڭ ءبارىن بىردەي جوققا شىعارىپ، وزدەرىن كەرەمەت، مەنى جەكسۇرىن ەتىپ كورسەتكەندەرىنە قاتتى قىنجىلدىم. داۋلەتكەرەي كاپ ۇلى ۇنەمى: «رينات، ساحنادا جۇرگەننىڭ ءبارى بىردەي دوس ەمەس. ءبىر-اق كۇندە بەت-پەردەسى اشىلىپ، كىمنىڭ كىم ەكەنىنە كوزىڭ جەتەدى»، - دەيتىن. تۋرا سولاي ەكەن.
ولارعا قاراپ وتىرىپ جىلاعىم كەلەدى. وزىنەن-ءوزى قىسىلىپ، قىزارا ءبورتىپ جۇرگەندەرى دە بار. ولارمەن ءالى ساحنادا كەزدەسەرمىن. مىنە، سوندا «اڭگىمەلەسەرمىن» دەپ ءجۇرمىن. «ءار نارسەنىڭ ءوز ۋاقىتى كەلەر» دەيتىن قازاقپىن. ادامداردىڭ ساعان جاساعان تىرناقتاي جاقسىلىعى دا، جاماندىعى دا كوكىرەكتە قاتتالىپ، جازىلىپ تۇرادى. مەن ونى ەشقاشان ۇمىتپايمىن»، - دەيدى اقىن.
«قازىرگى ايتىسكەرلەردىڭ تەڭ جارتىسىنان كوبى - ءبىلىمسىز اقىندار. ولار - سول ينتەرنەتپەن عانا شەكتەلىپ جۇرگەندەر. باسقاسىن ايتپايىن، قۇرمانعازىنىڭ قاي جەردە تۋعانىن بىلمەيتىندەرى بار. سوعان قاراماي كولىك ءمىنىپ، كەرەمەت قوشەمەتتەلىپ-اق ءجۇر. وسىنداي اقىندار شىندىق بىلاي تۇرسىن، حالىققا نە ايتا الادى دەپ ويلايسىز؟!
ايتىسقا قۇبىلىس بوپ كەلىپ، بەتبۇرىس جاساعان، ءوز مەكتەبىن قالىپتاستىرعان ساناۋلى عانا اقىندار بار. ولار: ورازالى دوسبوسىنوۆ، مۇحامەدجان تازابەكوۆ، مەلس قوسىمبايەۆ، امانجول التايەۆ، بەكارىس شويبەكوۆ. وسى بۋىننىڭ ءىزىن الا بەرە وزىندىك ورنەگىمەن بالعىنبەك يماشەۆ كەلدى. مىنە، وسى اقىندار - ىشكى پاراساتى مەن ءبىلىمى تەڭەسكەن اقىندار.
ال ءبىزدىڭ قازىرگى ايتىس سولاردى قايتالاۋ عانا. ەڭ سوراقىسى، سول باياعى كەلىسىپ الىپ ايتىسۋدان ارى اسا الماي ءجۇرمىز»، - دەپ نازىن بىلدىرگەن رينات زايىتوۆ ەلىمىزدەگى شوۋ-بيزنەس سالاسىن دا سىناپ ءوتتى.
«ءسىز قانداي كرەم جاعاسىز؟ ۇستىڭىزدەگى كويلەكتى قايدان الدىڭىز؟» - وسى دا سۇراق پا؟! مىنە، وسىنىڭ ءبارى - مادەنيەت سالاسىنىڭ جۇگەنسىزدىگىنەن.
«استانا كۇنى قارساڭىندا قىزىل كىلەمگە شاقىرىلدىم. جىل سايىن شاقىرتۋ الامىن، ءبىراق بارمايمىن. بىرىنشىدەن، ۋاقىتىم، ەكىنشىدەن، قۇلقىم جوق. بۇل دا ۋاقىتشا نارسە.
وتكەندە حالىق قالاۋلىسى ورازكۇل اسانعازى قىزىمەن اڭگىمەلەسۋدىڭ ءساتى ءتۇستى. سوندا ول كىسى: «ۇسىنىستارىڭ بولسا ايتىڭدار، جەتكىزۋگە تىرىسايىن»، - دەدى. سول-اق ەكەن، جالما-جان كوكەيدە جۇرگەن قىجىلدى ايتا سالدىم. «سىزدەردەن ءوتىنىش: قانداي دا ءبىر قازاققا قاتىستى وتەتىن ءىس- شارا ما، كونسەرت پە، تەليەۆيزيالىق باعدارلامالار ما، ايتەۋىر وسىلاردىڭ باس پروديۋسەرلەرىنەن ەمتيحان الىڭىزدارشى»، - دەدىم.
وسى ماسەلەنى پارلامەنتتىك دەڭگەيدە كوتەرسە ەكەن دەگەن ءوتىنىش ايتتىم. ءوز ءتىلىن، ءدىنىن، ءداستۇرىن بىلمەيتىن ادام ەلگە قانداي ءونىم ۇسىنباق، ايتىڭىزشى؟! ولاردىڭ ويىندا ءبىر عانا نارسە - اقشا تابۋ. ءبىتتى!
مەنىڭ قىتىعىما تيەتىن تاعى ءبىر جامان قاعيدا بار. نەگە جاقسى دۇنيەنىڭ ءبارى استانا مەن الماتىدا وتكىزىلۋى كەرەك؟! نەگە سول كونسەرتىڭدى، سول «قىزىل كىلەمىڭدى» شىمكەنتكە، سەمەيگە، قىزىلورداعا نەمەسە ورالعا اپارىپ جاساماسقا؟!
ول جاقتاعى اعايىننىڭ دا جاقسىلىق كورۋگە حاقىسى بار. استانا كۇنىن تەك استانادا عانا تويلاۋ شارت پا؟! نەگە سول قىزىقتىڭ ءبارىن استانا مەن الماتىنىڭ عانا حالقى كورۋى كەرەك؟! بايدىڭ ۇيىندەگىلەردى قازى-قارتامەن تاڭعالدىرا المايسىڭ عوي! ءبارىن اكەلىپ استاناعا تىقپالايدى. مۇنىڭ سىرى دا بەپ-بەلگىلى. ۇيىمداستىرۋشىلار ول جاقتان دىتتەگەن اقشاسىن الا الماي قالادى»، - دەيدى اقىن.
