ن. نازاربايەۆ پاريجدە بولعان تەررورلىق ارەكەتتەرگە بايلانىستى فرانسيا پرەزيدەنتىنە كوڭىل ايتتى

 استانا. قازاقپارات - قازاقستان پرەزيدەنتى نۇرسۇلتان نازاربايەۆ پاريج قالاسىندا بولعان تەررورلىق ارەكەتتەرگە بايلانىستى فرانسۋز رەسپۋبليكاسىنىڭ پرەزيدەنتى فرانسۋا وللاندقا كوڭىل ايتۋ جەدەلحاتىن جولدادى.

بۇل تۋرالى اقوردانىڭ باسپا ءسوز قىزمەتىنەن حابارلادى.

جەدەلحاتتا پاريج قالاسىندا جاسالعان جانتۇرشىگەرلىك ارەكەتتەر سالدارىنان كوپ ادامنىڭ قازا بولعانى تۋرالى سۋىت حاباردى مەملەكەت باسشىسى زور كۇيزەلىسپەن قابىلداعانى ايتىلعان.

«قازىرگى تاڭدا تەرروريزمنىڭ ەتەك الۋى بارلىق مەملەكەتتەر ءۇشىن ورتاق قاۋىپ- قاتەرگە اينالىپ وتىر. قازاقستان حالىقارالىق قاۋىپسىزدىككە قاتەر توندىرەتىن لاڭكەستىك پەن ەكسترەميزمنىڭ كەز كەلگەن ءتۇرىن ايىپتايدى» ، - دەلىنگەن جەدەلحاتتا.

 نۇرسۇلتان نازاربايەۆ قاسىرەت قۇرباندارىنىڭ تۋعان- تۋىستارى مەن جاقىندارىنا، سونداي- اق بارشا فرانتسيا حالقىنا جەكە ءوزىنىڭ جانە قازاقستان حالقىنىڭ اتىنان كوڭىل ايتتى.