ك. ءماسىموۆ: قازاقستان مەن رەسەي ۆاليۋتالارى بىردەي جاعدايدا
بۇل تۋرالى ەلوردادا ەۋرازيالىق ىقپالداستىقتىڭ نەگىزگى ماسەلەلەرىن تالقىلاۋعا ارنالعان استانا كلۋبىنىڭ I وتىرىسىندا ق ر پرەمەر-ءمينيسترى كارىم ءماسىموۆ ءمالىم ەتتى.
«ە ا ە و- نىڭ ۆاليۋتالىق ساياساتىنا كەلەتىن بولساق، بىلتىرعى جىلدىڭ سوڭىنان 2015 -جىلدىڭ باسىنا دەيىن ءالى رەتتەلمەگەن ەدى. ءبىز نەگىزىنەن ساۋدا جانە كەدەندىك ماسەلەلەرگە كوڭىل بولدىك. ۇلتتىق بانكتەردىڭ ماسەلەلەرى مەن باعام ساياساتى اۆتوماتتى تۇردە كەلىسىلۋى ءتيىس بولۋى كەرەك. وكىنىشكە وراي، ول سولاي بولمادى. رەسەي فەدەراتسياسى ورتالىق بانكىنىڭ ينفلياتسيالىق تارگەتتەۋ ساياساتىنا كوشۋى ءبىز ءۇشىن ازداپ كۇتپەگەن جاعداي بولدى جانە ءبىز بىلتىر كۇزدە باعامدى وزگەرتۋدى ويلاماعان ەدىك. حالىقارالىق ۆاليۋتا قورىمەن ارنايى حالىقارالىق باعدارلامامىز بولدى جانە ينفلياتسيالىق تارگەتتەۋدىڭ ءوز ساياساتىمىز بار ەدى. ءبىز ونى الدەقايدا كەشىرەك جاساۋدى جوسپارلادىق. سوندىقتان بىزدە ۋاقىتتارىمىزدا وسىنداي قاتەلىك ورىن الدى. قازىر رەسەيدىڭ ينفلياتسيالىق تارگەتتەۋگە وتكەنىنە ءبىر جىل تولدى. جەلتوقساندا بىردەن قاتتى جوعارىلاۋ بايقالدى»، - دەدى ۇكىمەت باسشىسى.
ونىڭ ايتۋىنشا، بۇل قازاقستانعا ءبىرشاما قيىندىقتار اكەلدى.
«وسى جارتى جىل قازاقستان ەكونوميكاسى ءۇشىن كاسىپورىنداردىڭ باسەكەگە قابىلەتتىگى تۇرعىسىنان دا، ۇلتتىق رەزەرۆتەردىڭ ەسەبىنەن دوللار باعامىن ۇستاپ تۇرۋ تۇرعىسىنان دا وتە اۋىر بولدى. ءبىراق بۇل كەزەڭدە ءبىز ۇلكەن قادامدار جاسادىق. ۇكىمەتتەرىمىز دە، ورتالىق بانكتەرىمىز دە بەلسەندى تالقىلاۋلار جاساۋدا. ءبىز بولاشاقتا مۇنداي جاعدايلاردىڭ ورىن الماۋىنا كەپىلدىك بەرەتىن تەتىكتەر جاسادىق»، - دەپ اتاپ ءوتتى ك. ءماسىموۆ.
ونىڭ اتاپ وتكەنىندەي، قازىرگى ۋاقىتتا رۋبل مەن تەڭگە بىردەي دەڭگەيدە ورنالاسقان. جاعداي تۇراقتالدى دەسە دە بولادى.
«مەنىڭشە، بۇگىنگى ۋاقىتتا كاسىپورىندارىنىڭ باسەكەگە قابىلەتتىلىگى جاعىنان رەسەي مەن قازاقستان ۆاليۋتالارى تەڭگەرىمدى دەپ ويلايمىن. بۇگىندە تەڭگە مەن رۋبل بىردەي جاعدايدا. ءبىراق باسقا ەلدەر قيىندىق كورە باستادى. ماسەلەن، قىرعىزستان. ەۋرازيالىق وداققا كىرگەننەن كەيىن، قىرعىزستاندىق تاۋارلار قازاقستانعا اعىلادى دەپ ويلادىق. الايدا اتالمىش باعام ساياساتىنان بارلىعى كەرىسىنشە بولدى. وسى تاقىرىپ بويىنشا قوسىمشا تالقىلاۋلار ءجۇرۋى ءتيىس دەپ سانايمىن»، - دەدى پرەمەر- مينيستر.
اۆتور: جاسۇلان جولدىبايەۆ
